హ్యాపీ లేని నెస్ట్ మాకెందుకు?

ఏపీ రాజధాని అమరావతిలో సీఆర్డీఏ నిర్మించి ఇచ్చే హ్యాపీ నెస్ట్ ఫ్లాట్లపై కొనుగోలుదారులు విముఖత వ్యక్తం చేస్తున్నారు. రాజధాని ప్రాంతంలో నివాసం ఉండాలనే ఉద్దేశంతో తాము అందులో ప్లాట్ల కొనుగోలుకు ఆసక్తి చూపించామని, ప్రస్తుతం రాజధాని అక్కడ ఉండే పరిస్థితి లేనందున తమకు ఆ ఫ్లాట్లు అవసరం లేదని పలువురు పేర్కొంటున్నారు.

అమరావతి నేలపాడు సమీపంలోని 14.5 ఎకరాల విస్తీర్ణంలో 19 టవర్లలో 1200 ఫ్లాట్లు కట్టి విక్రయించాలని సీఆర్డీఏ నిర్ణయించింది. దీంతో పలువురు కొంత మొత్తం అడ్వాన్స్ చెల్లించి ఫ్లాట్లు బుక్ చేసుకున్నారు. ఈలోగా ప్రభుత్వం మారడం.. రాజధానిని వైజాగ్ కు తరలించాలని ప్రతిపాదించడంతో అమరావతిలో నిర్మాణ కార్యకలాపాలు నిలిచిపోయాయి.

అమరావతిని లెజిస్లేచివ్ కేపిటల్ గా ఉంచి, విశాఖలో ఎగ్జిక్యూటివ్ కేపిటల్, కర్నూలులో జ్యుడీషియరీ కేపిటల్ ఏర్పాటు చేయాలని నిర్ణయించిన జగన్ సర్కారు.. ఆ దిశగా కదులుతున్న సంగతి తెలిసిందే. ఈ బిల్లు ఇంకా ఆమోదం పొందుకున్నా వైజాగ్ కు రాజధాని తరలించాలని జగన్ ప్రభుత్వం కృత నిశ్చయంతో ఉంది. ఈ నేపథ్యంలో అమరావతిలో రియల్ ఎస్టేట్ భారీగా పడిపోయింది. దీంతో అమరావతిలో ఉందామని భావించిన పలువురు ఆ ప్రయత్నాలు విరమించుకున్నారు. దీంతో హ్యాపీ నెస్ట్ లో తమకు ఫ్లాట్ వద్దని.. తాము కట్టిన అడ్వాన్స్ తిరిగి ఇచ్చేయాలంటూ సీఆర్డీఏకి వినతులు వస్తున్నట్టు సమాచారం.

మరోవైపు అమరావతి ప్రాంతంలో నిర్మాణ కార్యకలాపాలు నిలిపివేసిన ప్రభుత్వం.. హ్యాపీ నెస్ట్ ను మాత్రం నిర్మించాలని నిర్ణయం తీసుకుంది. దీనికి కూడా రివర్స్ టెండరింగ్ నిర్వహించాలని నిర్ణయించి, రూ.656.44 కోట్ల అంచనా వ్యయంతో బిడ్లను ఆహ్వానించింది. ఈ రివర్స్ టెండరింగ్ ద్వారా డబ్బు ఆదా అయి, ఆ మేరకు ఫ్లాట్ ధర కూడా తగ్గితే కొనుగోలుదారులు తమ నిర్ణయాన్ని మార్చుకుంటారేమో చూడాలి.