విశాఖ గ్యాస్‌ లీకేజీని, భోపాల్‌ ఘటనతో పోల్చగలమా.?

కరోనా వైరస్‌ దెబ్బకి రాష్ట్రంలో 30 మందికి పైగా ప్రాణాలు కోల్పోయినా, ముఖ్యమంత్రి అమరావతిని విడిచి బయటకు రాలేదు. దేశంలో పలు రాష్ట్రాల్లో వృద్ధాప్యంలో వున్న ముఖ్యమంత్రులు, ప్రాణాలకు తెగించి మరీ ప్రజల వద్దకు వెళ్ళారు కరోనా పరిస్థితుల్లోనూ.! మరి, జగన్‌ ఎందుకు జనంలోకి రాలేదు.? ఈ ప్రశ్నకు సమాధానం చెప్పలేని పరిస్థితి అధికార పక్షానిది.

అయితే, వైఎస్‌ జగన్‌ మోహన్‌రెడ్డి, అమరావతి నుంచి బయటకు రాక తప్పలేదు. కారణం విశాఖలో చోటు చేసుకున్న ప్రమాదకర గ్యాస్‌ లీక్‌ దుర్ఘటన. ఈ ఘటనలో 10 మంది ప్రాణాలు కోల్పోయారు. వందలాది మంది తీవ్ర అస్వస్థతకు గురయ్యారు. ‘పెద్దగా భయపడాల్సిందేమీ లేదట.. ఆక్సిజన్‌ పెట్టుకుంటే సరిపోతుందట..’ అంటూ అధికార పార్టీకి చెందిన ఛానల్‌లో, ఓ సీనియర్‌ జర్నలిస్టు తనకెవరో చెప్పిన విషయాన్ని ప్రస్తావించి అభాసుపాలయ్యారు. కరోనా వైరస్‌కి పారాసిటమాల్‌ అన్నట్లే వుందీ వ్యవహారం. కానీ, సమస్యలో సీరియస్‌నెస్‌ ఏంటన్నది, ముఖ్యమంత్రి హుటాహుటిన విశాఖ రావడంలోనే తేలిపోయింది. దీన్ని భోపాల్‌ దుర్ఘటనతో పోల్చుతున్నారు చాలామంది.

అయితే, ‘అంత తీవ్రత లేదు ఈ ఘటనకి’ అని కొందరు అభిప్రాయపడ్తున్నారు. ఇలాంటి ఘటనల్లో ప్రమాద తీవ్రతని వెంటనే అంచనా వేయలేం. 10 మంది ప్రాణాలు కోల్పోగా, చాలామంది ఆసుపత్రుల్లో వైద్య చికిత్స పొందుతున్నారు. వారిలో ఎంతమంది కోలుకుంటారు.? ఎంతమంది ప్రాణాలు కోల్పోతారు.? అన్నదాని చుట్టూనే ప్రమాద తీవ్రతపై ఓ స్పష్టత వస్తుంది.

గాలి, నీరు, నేల.. ఇలా అన్నీ ఆ ప్రాంతంలో విష తుల్యంగా మారతాయి. 3 కిలోమీటర్ల మేర ఈ విష ప్రభావం వుంటుందని అంచనా వేస్తున్నారు. ముఖ్యమంత్రి చెబుతున్నదాన్ని బట్టి 15 వేల మంది ఎఫెక్టెడ్‌ పీపుల్‌ వున్నారు. సో, ఇది చిన్న ఘటన కానే కాదు. ఈ రంగానికి చెందిన నిపుణులు విశాఖ చేరుకుంటున్నారు, పరిస్థితుల్ని అధ్యయనం చేయాల్సి వుంది. దీర్ఘకాలిక రోగాలు తప్పకపోవచ్చని, సదరు కెమికల్‌ గుణంపై వైద్యులు అంచనా వేస్తుండడం చూస్తోంటే, ప్రమాద తీవ్రత ఊహించినదానికన్నా ఎక్కువే వుండొచ్చు.