విశాఖపై విషం చిమ్మిన గ్యాస్ ఫ్యాక్టరీ: 8 మంది మృతి

విశాఖపట్నంలో ఓ కెమికల్‌ ఫ్యాక్టరీ విషం చిమ్మింది. విష వాయువులు వెలువడ్డంతో ఆ ఫ్యాకటఈ పరిసరాల్లోని గ్రామాల్లోగల ప్రజలు తీవ్ర అస్వస్థతకు గురయ్యారు. సుమారు 250 మందికి పైగా ప్రజలు ఈ విషవాయువల ప్రభావానికి గురైనట్లు తెలుస్తోంది. 8 మంది చనిపోయినట్లు ప్రాథమికంగా తెలుస్తోంది. తీవ్ర అస్వస్థతకు గురైనవారి సంఖ్య చాలా ఎక్కువగా వుండడంతో, మృతుల సంఖ్య భారీగా పెరిగే అవకాశం వుందనీ, దీన్ని భోపాల్‌ గ్యాస్‌ దుర్ఘటనతో పోల్చవచ్చన్న అభిప్రాయాలు స్థానికుల నుంచి వ్యక్తమవుతున్నాయి. మురికి కాల్వలోనూ జనం అచేతనావస్థలో పడి వున్నారంటే పరిస్థితి అక్కడ ఎంత హృదయ విదారకంగా వుందో అర్థం చేసుకోవచ్చు.

లాక్‌డౌన్‌ సమయంలో ఫ్యాక్టరీలో పనులు ఎలా నడుస్తున్నాయి.? అన్న విషయమై ఇప్పుడు చాలా అనుమానాలు వెల్లువెత్తుతుండడం గమనార్హం. ఇదిలా వుంటే, మృతుల్లో చిన్నారులు, వృద్ధులు ఎక్కువగా వుండే అవకాశం వుందని వైద్య నిపుణులు చెబుతున్నారు. వెలువడిన విష వాయువు అత్యంత ప్రమాదకరమని ప్రముఖ డాక్టర్‌ ఒకరు చెప్పారు. వెంటనే బాధితులకు ఆక్సిజన్‌ అందించాలనీ, లేకపోతే మృతుల సంఖ్య అనూహ్యంగా పెరుగుతుందని ఆ డాక్టర్‌ హెచ్చరిస్తున్నారు.

ఒక్కసారిగా విషవాయువు వెలువడ్డంతో ఏం చేయాలో స్థానిక ప్రజలకు అర్థం కాలేదనీ, శరీరం మీద దద్దుర్లు రావడం, వాంతులు అవడం, ఆ తర్వాత అపస్మారక స్థితిలోకి వెళ్ళిపోవడం జరిగిందని ప్రత్యక్ష సాక్షులు చెప్పారు. చూస్తుండగానే తమవారు కుప్పకూలిపోవడంతో ఏం చేయాలో అర్థం కాలేదనీ, వారిని ఆసుపత్రులకు తరలించేందుకు చాలా ఇబ్బందులు ఎదుర్కొన్నామనీ బాధితుల కుటుంబ సభ్యులు వాపోయారు. తమ పరిస్థితీ దారుణంగా తయారైనా, శక్తి కూడగదీసుకుని తమవారిని ఆసుపత్రులకు తరలించామని, ఆ తర్వాత ఆసుపత్రుల్లో తమకూ చికిత్సను వైద్యులు అందించారని బాధితులు చెప్పారు.

అందరినీ కలచి వేస్తున్న వీడియోస్:

విశాఖ గ్యాస్ లీక్ ప్రమాదానికి సంబందించిన కొన్ని ఫోటోలు