‘గ్యాంగ్ లీడర్’కు 30 ఏళ్లు..! ఇండస్ట్రీ రికార్డులను రఫ్ఫాడేసిన మెగాస్టార్

మెగాస్టార్ చిరంజీవి ప్రభ అప్రతిహతంగా వెలిగిపోతున్న దశలో వచ్చిన సినిమా ‘గ్యాంగ్ లీడర్’. ఈ సినిమాను చిరంజీవి కెరీర్లో ఓ ల్యాండ్ మార్క్ అనొచ్చు. ఫ్యాన్స్ ను, ఫ్యామిలీ ఆడియన్స్ ను ఒకేవిధంగా ఆకట్టుకున్న ఈ సినిమా చిరంజీవి కెరీర్లో ప్రత్యేకం. అప్పట్లో 1987 నుంచి 1992 వరకూ వరుసగా ప్రతి ఏడాదీ ఓ ఇండస్ట్రీ హిట్ తో తెలుగు సినిమాపై తిరుగులేని ఆధిపత్యం సాధించారు చిరంజీవి. ఈక్రమంలోని సినిమానే ‘గ్యాంగ్ లీడర్’. చిరంజీవి కెరీర్ ను, క్రేజ్, ఇమేజ్ ను ఎవరెస్టు ఎత్తులో నిలిపిందీ సినిమా. ఈ సినిమా సాధించిన సంచలన విజయం చిరంజీవిని తిరుగులేని నెంబర్ వన్ హీరోగా ఆయన స్థానాన్ని సుస్థిరం చేసేసింది. 1991 మే 9న విడుదలైన ఈ సినిమా నేటితో 30 ఏళ్లు పూర్తి చేసుకుంది.

మాస్, ఫ్యామిలీ కథాంశంతో తెరకెక్కిన ఈ సినిమా ప్రేక్షకుల్ని విపరీతంగా ఆకట్టుకుంది. ముఖ్యంగా సినిమాలో చిరంజీవి బాడీ లాంగ్వేజ్, మేనరిజమ్స్, స్టయిల్, డైలాగ్ డిక్షన్, రఫ్ గెడ్డంతో లుక్స్,. ఫ్యాన్స్ కు పూనకాలే తెప్పించాయి. నలుగురు స్నేహితులకు లీడర్ గా, కుటుంబానికి దిక్కుగా.. చిరంజీవితో నట విశ్వరూపమే సినిమాలో కనిపిస్తుంది. దర్శకుడు విజయబాపినీడు సినిమా అద్భుతంగా రావడంలో తన దర్శకత్వ ప్రతిభ చూపించారు. మొదట బాపినీడు ఈ కథను చిరంజీవికి చెప్తే పెద్దగా నచ్చలేదు. ఈ విషయం తెలుసుకున్న పరుచూరి బ్రదర్స్ మార్పులు చేసారు. అదే కథను మళ్లీ చిరంజీవికి వినిపిస్తే అద్భుతం అని.. సినిమా చేద్దామన్నారట.

ఆ తర్వాత గ్యాంగ్ లీడర్ సృష్టించిన ప్రభంజనానికి ఆకాశమే హద్దు అయింది. బప్పీలహరి అందించిన సంగీతం మేజర్ హైలైట్. పాటలన్నీ బ్లాక్ బస్టర్ హిట్టే. పాటల్లో చిరంజీవి డ్యాన్సులకు ధియేటర్లలు దద్దరిల్లిపోయాయి. విజయశాంతితో వానా వానా వెల్లువాయే పాట ఓ క్లాసిక్. మాగంటి రవీంద్రనాధ్ చౌదరి నిర్మాతగా శ్యాంప్రసాద్ ఆర్ట్స్ బ్యానర్ పై ఈ సినిమా నిర్మించారు. అంతకుముందు ఏడాది జగదేకవీరుడు అతిలోక సుందరి సినిమాతో చిరంజీవే సృష్టించిన ఇండస్ట్రీ రికార్డును గ్యాంగ్ లీడర్ తుడిచిపెట్టేసింది. ‘రఫ్ఫాడించేస్తాను’ అనే చిరంజీవి మేనరిజమ్ పేలిపోయింది. ఈ సినిమా శతదినోత్సవ వేడుకలను ఒకేరోజు హైదరాబాద్, తిరుపతి, విజయవాడ, ఏలూరు నగరాల్లో నిర్వహించడం విశేషం.