మాజీ సీఎం మరదలు.. డాక్టరేట్ గ్రహీత.. అథ్లెట్..! నేడు ఫుట్‌పాత్‌పై దీనస్థితిలో..!!

జీవితంలో ఉన్నత హోదా, గౌరవం, పేరు ప్రఖ్యాతులు దక్కినా.. విధిరాతకు మాత్రం తల వంచాల్సిందే. డాక్టరేట్, క్రీడా అథ్లెట్, ఉపాధ్యాయురాలు.. అంతకుమించి రాష్ట్రాన్ని ముఖ్యమంత్రిగా పదేళ్లు పాలించిన అత్యంత సమీప బంధువు జీవితం ఎలా ఉంటుందో కనీసం ఆలోచించినా ఉన్నతంగానే ఉంటుంది. కానీ.. ఏమైందో ఏమో.. అంతటి విద్యావంతురాలు ప్రస్తుతం ఫుట్ పాత్ పై బిచ్చమెత్తుకుంటూ దుర్భర జీవితం గడుపుతున్నారు. వివరాల్లోకి వెళ్తే..

పశ్చిమ బెంగాల్ ముఖ్యమంత్రిగా బుద్ధదేవ్ భట్టాచార్య పదేళ్లు పని చేశారు. ఆయన భార్య మీరా తోడబుట్టిన సోదరే ఇరా బసు. ప్రస్తుతం ఆమె రాష్ట్రంలోని ఉత్తర 24 పరగణాల జిల్లా బరాబజార్ ప్రాంతంలోని దున్లాప్ లో ఫుట్ పాత్ పై మాసిన దుస్తులతో దుర్భర జీవితం గడుపుతున్నారు. ఐరా బసు వైరాలజీలో పీహెచ్‌డీ చేశారు. ఆమె బెంగాలీతో పాటు ఇంగ్లీష్ అద్భుతంగా మాట్లాడతారు. రాష్ట్రస్థాయి టేబుల్ టెన్నిస్, క్రికెట్లో ఆమె ఆడారు. 1976లో ప్రియానాధ్ బాలిక పాఠశాలలో ఉపాధ్యాయురాలిగా ఉద్యోగంలో చేరి 2009లో పదవీ విరమణ పాందారు.

ఆమె ఉపాధ్యాయురాలిగా ఉన్నప్పుడే బుద్ధదేవ్ ముఖ్యమంత్రిగా ఉన్నారు. అప్పట్లో బరానగర్ లో నివసిస్తున్న ఐరా తర్వాత ఖర్దాలోని లిచూ బాగాన్ కు మారారు. అయితే.. పదవీ విరమణ అనంతరం ఏమైందో.. ఏమో..! ఆమె ఇప్పుడు ఫుట్ పాత్ పై నివసిస్తున్నారు. దీనిపై ప్రియానాధ్ పాఠశాల ప్రధానోపాధ్యాయుడు స్పందిస్తూ.. ‘పదవి విరమణ అనంతరం ఫించన్ కోసం దరఖాస్తు చేసుకోమని కోరినా ఆమె చేసుకోలేదు. కారణాలు తెలీదు’ అన్నారు. అయితే.. మొన్నటి ఉపాధ్యాయ దినోత్సవం నాడు ఆమె విద్యార్ధులు, స్థానిక సంఘాల నాయకులు కొందరు ఆమెను సన్మానించారు.

‘నన్ను గుర్తు చేసుకుంటున్నవారికి ధన్యవాదాలు. ఇప్పటికీ నా విద్యార్ధులు నన్ను ప్రేమిస్తున్నారు. కొందరు నా పరిస్థితి చూసి జాలి పడుతున్నారు.. కన్నీళ్లు పెట్టుకుంటున్నారు. బుద్ధదేవ్ సీఎంగా ఉన్నప్పటి నుంచే నేను ఏ లబ్ది పొందలేదు. నాకు ఇప్పుడు తగిన గుర్తింపు ఇవ్వనవసరం లేదు’ అని వ్యాఖ్యానించారు. అయితే.. ఆమె పరిస్థితి తెలుసుకున్న అధికారులు.. ఆమెను కోల్ కతాకు తీసుకెళ్లారు. ఆమెకు వైద్య పరీక్షలు చేయించి ప్రభుత్వ సాయం అందించే ఏర్పాట్లు చేస్తున్నారు.