ఆప్ వైపు సీబీఐ మాజీ జేడీ చూపు?

ఉద్యోగాన్ని సైతం వదిలేసి రాజకీయాల్లో అడుగుపెట్టిన సీబీఐ మాజీ జేడీ వీవీ లక్ష్మీనారాయణ తదుపరి పయనం ఎటు? జనసేనకు రాజీనామా చేసిన ఆయన బీజేపీలో చేరతారా లేక ఆమ్ ఆద్మీ పార్టీ వైపు మొగ్గు చూపుతారా అనే అంశంపై చర్చ సాగుతోంది.

వైఎస్సార్ సీపీ అధినేత వైఎస్ జగన్ మోహన్ రెడ్డిపై కేసుల దర్యాప్తుతో ఒక్కసారిగా వెలుగులోకి వచ్చిన ఆయనకు టీడీపీ అనుకూల మీడియా ఎనలేని ప్రాధాన్యత ఇవ్వడంతో హీరో అయిపోయారు. ఏకంగా ఏపీలోని పలుచోట్ల ఆయనకు అభిమాన సంఘాలు కూడా ఏర్పడ్డాయి. వీటన్నింటినీ చూసుకుని రాజకీయ ఆరంగేట్రం చేశారు. తొలుత టీడీపీ నుంచే బరిలోకి దిగుతారని అంతా భావించారు. కానీ ఆయన అనూహ్యంగా జనసేనను ఎంచుకున్నారు.

విశాఖ ఎంపీ స్థానం నుంచి పోటీ చేశారు. కానీ వైసీపీ గాలిలో నిలువలేక ఓటమి చవిచూశారు. తర్వాత జరిగిన పరిణామాలతో జనసేనకు గుడ్ బై చెప్పారు. ఆయన పార్టీ వీడటానికి చెప్పిన కారణం కూడా చాలా సిల్లీగా అనిపించింది. పవన్ కల్యాణ్ తిరిగి సినిమాల్లో నటించడం ఇష్టం లేకనే తాను పార్టీకి రాజీనామా చేస్తున్నట్టు ప్రకటించారు.

ప్రస్తుతం ఏ పార్టీలోనూ చేరని లక్ష్మీనారాయణ.. బీజేపీ వైపు వెళతారనే ప్రచారం జరిగింది. దానికి తగినట్టుగానే ఆ పార్టీ లైన్ లో పలు వ్యాఖ్యలు చేశారు. తాజాగా ఆప్ వైపు ఆయన మొగ్గు చూపుతున్నారనే టాక్ వినిపిస్తోంది. ఢిల్లీ అసెంబ్లీ ఎన్నికల్లో తిరుగులేని విజయం సాధించిన ఆప్.. దేశవ్యాప్తంగా తమ పార్టీని విస్తరించే ప్రణాళిక రచిస్తోంది. ఇకపై దేశంలో జరిగే ప్రతి స్థానిక సంస్థల ఎన్నికల్లోనూ తాము పోటీ చేస్తామని ఆ పార్టీ ప్రకటించింది.

ఈ నేపథ్యంలో ఏపీలో లక్ష్మీనారాయణ ఆధ్వర్యంలో ఆప్ ను బలోపేతం చేయాలని వారు భావిస్తున్నారని, ఆ దిశగా సంప్రదింపులు జరుపుతున్నామంటూ లీకులు వదులుతున్నారు. ఇందులో నిజానిజాలు పూర్తిగా తెలియలేదు. ఇందుకు సంబంధించి క్లారిటీ రావాలంటే మరికొంత కాలం వేచి చూడక తప్పదు.