ఈటీవీ ప్రభాకర్ వారసుడి తెరంగేట్రం

బుల్లి తెర మెగాస్టార్‌ గా పేరు దక్కించుకున్న ప్రభాకర్‌ తనయుడు చంద్రహాస్‌ త్వరలో ప్రేక్షకుల ముందుకు హీరోగా రాబోతున్నాడు. చంద్రహాస్‌ పుట్టిన రోజు సందర్భంగా ‘ఇంట్రడ్యూసింగ్‌ చంద్రహాస్‌’ పేరుతో మీడియా సమావేశం ఏర్పాటు చేసి చంద్రహాస్ ని ప్రభాకర్‌ పరిచయం చేశారు.

ఈ సందర్భంగా ప్రభాకర్‌ మాట్లాడుతూ… నేను ఇండస్ట్రీకి వచ్చి చాలా కాలం అయినా మీడియాతో ఇంటరాక్ట్‌ అవడం అరుదు. ఇప్పుడు ఈ ప్రెస్‌ మీట్‌ ఏర్పాటు చేయడానికి కారణం మా అబ్బాయి చంద్రహాస్‌ కూడా ఇండస్ట్రీని నమ్ముకుని నటననే ప్రొఫెషన్‌గా ఎంపిక చేసుకుని ఇండస్ట్రీలో అడుగు పెట్టబోతున్నాడు. తండ్రిగా వాడికి ఇష్టమైన దాన్ని ప్రోత్సహించడం నా ధర్మం కనుక ఇలా మీ ముందుకు వచ్చాను. హీరో కావాలనేది కేవలం చంద్రహాస్‌ కోరిక మాత్రమే.

ఓ రోజు నా దగ్గరకు వచ్చి నాకు కొంత డబ్బు ఇవ్వు డాడీ దాంతో నేను యూట్యూబ్‌లో కవర్‌ సాంగ్స్‌ చేసుకుంటాను అన్నాడు. అలా చేసిన ‘‘నాటు నాటు’’ అనే కవర్‌ సాంగ్‌ వీడికి మంచి పేరు తెచ్చిపెట్టింది. పేరుతో పాటు సినిమా హీరోగా కూడా రెండు అవకాశాలు వచ్చాయి. మా అబ్బాయి పుట్టిన రోజు సందర్భంగా మీడియాతో ఇంటరాక్ట్‌ అయితే బాగుంటుంది అనిపించింది… అందుకే ఈ సమావేశం ఏర్పాటు చేశాం. చంద్రహాస్‌ను నటనవైపు ఎక్కువగా ప్రోత్సహించింది వాళ్ల అమ్మ, నా భార్య మలయజ అన్నాడు.

మలయజ మాట్లాడుతూ… చంద్రహాస్‌ కూడా వాళ్ల నాన్నగారిలానే మంచి హార్డ్‌ వర్కర్‌. ఏదైనా అనుకుంటే చేసి తీరాల్సిందే అన్నట్టుగా ఉంటాడు. అలా పట్టుబట్టి ఈరోజు హీరోగా మారుతున్నాడు. నాకు చాలా సంతోషంగా ఉంది. తల్లిదండ్రులకు ఇంతకు మించి ఆనందం ఏముంటుంది. మా చంద్రహాస్‌ నిర్మాతలకు ఎప్పుడూ ఎస్సెట్‌ కావాలి అని కోరుకుంటున్నాను. మా అబ్బాయిని మీరందరూ కూడా ఆశీర్వదించాలని కోరుకుంటున్నాను అన్నారు.

చంద్రహాస్‌ మాట్లాడుతూ… ‘నాకు ఊహ తెలిసినప్పటి నుంచి షూటింగ్ వాతావరణంలో పెరిగాను. అందుకే సినిమాపై ఆసక్తి పెరిగింది. హీరో అవ్వాలనేది నా డ్రీమ్‌. దీని కోసం నాన్నగారిని ఎంతగా విసిగించినా పని అవ్వలేదు. ఆయన నీకు ఇంకా అంత వయస్సు రాలేదు. కనీసం 25 సంవత్సరాలు అన్నా రావాలి అన్నారు. ‘‘నాటు నాటు’’ కవర్‌ సాంగ్‌ చూసి నాకు అవకాశం ఇచ్చారు మా దర్శక, నిర్మాతలు. మీ అందరి ఆశీర్వాదాలు తీసుకోవాలని ముందుగా మిమ్మల్ని కలిసేందుకు మీ ముందుకు వచ్చాం అన్నాడు.