సితార ఎంటర్టైన్మెంట్స్ నిర్మిస్తున్న ప్రొడక్షన్ నెం.32కి ‘ఎపిక్ – ఫస్ట్ సెమిస్టర్’ అనే ఆకట్టుకునే టైటిల్ను అధికారికంగా ప్రకటించారు. ‘బేబీ’ తరువాత మరొకసారి ఆనంద్ దేవరకొండ – వైష్ణవి చైతన్య జంటగా నటిస్తున్న ఈ చిత్రాన్ని ‘90s’ వెబ్ సిరీస్తో గుర్తింపు తెచ్చుకున్న ఆదిత్య హాసన్ తొలిసారి దర్శకుడిగా రూపొందిస్తున్నారు. సోమవారం హైదరాబాద్ ఆర్కే సినీప్లెక్స్లో టైటిల్ గ్లింప్స్ను రంగరంగుల వేడుకగా విడుదల చేశారు.
విడుదలైన గ్లింప్స్లో లండన్ బ్యాక్డ్రాప్లోని స్నాతకోత్సవ వాతావరణం ప్రత్యేకతను చాటింది. వైష్ణవి చైతన్య తనకు కావాల్సిన భర్త గురించి చెప్పే సందర్భంలో, గద్దర్ను గుర్తు చేసే లుక్లో ఆనంద్ దేవరకొండ కనిపించడం అందరినీ సర్ప్రైజ్ చేసింది. “శేఖర్ కమ్ముల సినిమాలో హీరోలా ఉన్న అబ్బాయి, సందీప్ రెడ్డి వంగా సినిమాలో హీరోయిన్లాంటి అమ్మాయి ప్రేమ పడితే ఎలా ఉంటుంది?” అన్న డైలాగ్తో సినిమా ఎంత వైవిధ్యంగా, ఎంత వినోదంగా ఉండబోతుందో చూపించింది. ‘90s’ సిరీస్లో ప్రేక్షకుల హృదయాల్లో నిలిచిపోయిన ‘ఆదిత్య’ పాత్ర ప్రయాణమే ఈ సినిమాలో కొనసాగుతుండటం కూడా ఆసక్తిని పెంచుతోంది.
గ్లింప్స్ విడుదల సందర్భంగా ఆనంద్ దేవరకొండ ఈ చిత్రం తనకు చాలా దగ్గరైన కథ అని, విద్యార్థిగా ఉన్నప్పుడు తాను కూడా ఇలా తడబడుతూ మాట్లాడేదానని గుర్తుచేసుకున్నారు. లండన్లో జరిగే కథ అయినా, మన ఇంట్లో జరిగే కథలా ప్రతి సన్నివేశం ప్రేక్షకులకు కనెక్ట్ అవుతుందని చెప్పారు. తెలుగులో పూర్తిస్థాయి రొమాంటిక్ కామెడీలు చాలా అరుదుగా వస్తున్న నేపథ్యంలో, ‘ఎపిక్’ ఆ లోటును నింపే చిత్రంగా నిలుస్తుందని అభిప్రాయపడ్డారు.
వైష్ణవి చైతన్య ఈ ప్రేమకథలో యువతను ఆకట్టుకునే భావాలు, అందమైన జ్ఞాపకాలు ఉంటాయని చెప్పారు. హీరో పాత్రతో అబ్బాయిలు, హీరోయిన్ పాత్రతో అమ్మాయిలు బలంగా కనెక్ట్ అవుతారని తెలిపారు. జీవితంలో మనం దాటి వచ్చిన చిన్న చిన్న భావోద్వేగాలను గుర్తుచేసేలా చిత్రమంతా ఉంటుంది అని అన్నారు.
దర్శకుడు ఆదిత్య హాసన్ మాట్లాడుతూ, నిజాయితీని మించిన శక్తి ఏదీ లేదని, ‘90s’లా ఈ చిత్రానికి కూడా అదే నిజాయితీ పునాది అని చెప్పారు. మధ్యతరగతి యువకుడి ప్రేమకథగా రూపొందుతున్న ఈ సినిమాలో ప్రతి ఒక్కరూ తాము అనుభవించిన క్షణాలను గుర్తుచేసుకుంటారని నమ్మకం వ్యక్తం చేశారు.
నిర్మాత నాగవంశీ మాట్లాడుతూ, ఇది మొదటి భాగం మాత్రమే, దీనికి కొనసాగింపు కూడా ఉంటుందని తెలిపారు. ఆదిత్య చెప్పిన ఈ రొమాంటిక్ కామెడీ కథ మొదట విన్నప్పుడే సినిమా చేయాలని నిర్ణయించుకున్నానని చెప్పారు. మంచి భావాలతో, అందమైన భావోద్వేగాలతో రూపొందిన ఈ సినిమా ప్రేక్షకులను తప్పకుండా ఆకట్టుకుంటుందని విశ్వాసం వ్యక్తం చేశారు.
‘ఎపిక్ – ఫస్ట్ సెమిస్టర్’ యువ ప్రేమ కథను హృదయానికి హత్తుకునేలా, నిజాయితీతో చూపించబోతున్న చిత్రం. అతి త్వరలో భారీ స్థాయిలో విడుదలకు సిద్ధమవుతోంది. చిత్రానికి సంబంధించిన మరిన్ని అప్డేట్లు త్వరలోనే రానున్నాయి.