డ్రగ్స్‌ కేసులో వాళ్ళకి ‘ఎస్కేప్‌ ప్లాన్‌’ వుందట.!

బాలీవుడ్‌లో డ్రగ్స్‌ కేసు పెను ప్రకంపనలు సృష్టిస్తోంది. బాలీవుడ్‌ నటుడుసుశాంత్‌ సింగ్‌ రాజ్‌పుట్‌ డెత్‌ మిస్టరీ వీడుతుందో లేదోగానీ, ఈలోగా డ్రగ్స్‌ కేసు మాత్రం.. మీడియాకి బోల్డంత స్టఫ్‌ ఇస్తోంది. దేశంలో చాలా ముఖ్యమైన అంశాలు ఈ డ్రగ్స్‌ కేసు కారణంగా మీడియా దృష్టిలో సైడ్‌లైన్‌ అయిపోతున్నాయి.

ఓ నేషనల్‌ మీడియా వెబ్‌సైట్‌, బాలీవుడ్‌ డ్రగ్స్‌ కేసుకి సంబంధించి సెన్సేషనల్‌ న్యూస్‌.. అంటూ ఓ లింక్‌ని సోషల్‌ మీడియాలో పోస్ట్‌ చేసింది. తీరా ఆ లింక్‌ని క్లిక్‌ చేస్తే, రైతుల సమస్య గురించిన ఆర్టికల్‌ దర్శనమిచ్చింది. ‘మీరు ఎదురుచూస్తున్న వార్త కాదిది. కానీ, దేశానికి ఇది అత్యంత ముఖ్యమైన విషయం..’ అంటూ పంజాబ్‌ తదితర రాష్ట్రాల్లో రైతులు చేస్తోన్న పోరాటం గురించి ఆ కథనంలో ప్రస్తావించారు. ఇదీ దేశంలో మీడియా పరిస్థితి.

రియా చక్రవర్తిని డ్రగ్స్‌ కేసులో అరెస్ట్‌ చేశారు. దీపికా పడుకొనే, శ్రద్ధా కపూర్‌, సారా అలీ ఖాన్‌, రకుల్‌ ప్రీత్‌ సింగ్‌లను ఈ కేసులో నార్కోటిక్స్‌ కంట్రోల్‌ బ్యూరో విచారించింది. ఇంకోసారి విచారణకు పిలిచే అవసరం రాకపోవచ్చు.. అంటూ దీపిక విచారణ తర్వాత ఎన్‌సిబి అధికారులు స్పష్టం చేశారు. కానీ, నేషనల్‌ మీడియా మాత్రం ఈ విషయాన్ని ఇక్కడితో వదిలేలా కనిపించడంలేదు. రేపో మాపో రకుల్‌ని అరెస్ట్‌ చేస్తారట.. సారా అలీఖాన్‌ నిండా ఈ కేసులో మునిగిపోయిందట.. దీపికనే ఈ దందాలో కీలక పాత్ర పోషించిందట.. రియా చక్రవర్తి అసలు ఈ కేసు నుంచి బయటపడే అవకాశమే లేదట.. అంటూ కథనాలు అల్లేస్తోంది నేషనల్‌ మీడియా.

‘అయితే, వాళ్ళందరికీ ఎస్కేప్‌ ప్లాన్‌ సిద్ధంగానే వుంది..’ అంటూ ఇంకో వార్త నేషనల్‌ మీడియాలో హల్‌చల్‌ చేస్తోంది. ఇదంతా ఎందుకు.? అంటే, ఎన్‌సిబి తన పని తాను చేసుకోనివ్వకుండా, దేశంలో అతి ముఖ్యమైన రైతు సమస్య హైలైట్‌ కాకుండా వుండేందుకే మీడియా ఇంతలా తన స్థాయిని దిగజార్చేసుకుంటోందన్న విమర్శ వినిపిస్తోంది.