Dragon: జూ.ఎన్టీఆర్ ఫ్యాన్స్ ఆశలను మోసుకుంటూ వచ్చిన ఎన్టీఆర్-నీల్ ప్రాజెక్ట్ వారి ఎదురుచూపులకు తెర దించింది. మే 20న ఎన్టీఆర్ పుట్టినరోజు సందర్భంగా చిత్ర యూనిట్ మూవీ గ్లింప్స్ రిలీజ్ చేసింది. మంగళవారం రాత్రి విడుదలైన టీజర్ ఎన్టీఆర్ ఫ్యాన్స్ ని పూర్తిగా సంతృప్తిపరచిందని చెప్పాలి. సినిమాకు ‘డ్రాగన్’ అనే టైటిల్ ను ఫిక్స్ చేశారు. అయితే.. సినిమా విడుదలకు మాత్రం ఫ్యాన్స్ ఇంకా ఏడాదిపాటు ఎదురుచూడాల్సిందే. 11 జూన్ 2027న సినిమా విడుదల కానుంది.
దర్శకుడు ప్రశాంత్ నీల్ తన పూర్వ సినిమాల మాదిరే చీకటి సామ్రాజ్యం కథనే ఎంచుకున్నాడు. టీజర్ మొత్తం నాలుగు నిముషాలు ఉంది. ఇందులో గ్యాంగ్ స్టర్, హెరాయిన్ డ్రగ్స్ కథాంశం, విలన్లు, హీరో క్యారెక్టరైజేషన్ ను పరిచయం చేసిన విధానం బాగుంది. ఎవరెవరు ఏంటనేది ఒక్కొక్కరినే బ్యాటిల్ ఆఫ్ వార్ కు సిద్ధమైనట్టుగా పరిచయం చేస్తూ హీరో ఎన్టీఆర్ పాత్రను పరిచయం చేశారు. ‘దేవుడు నాకో గొప్ప వరం ఇచ్చాడు. ట్రిగ్గర్ నొక్కగానే మరచిపోవడం. నిద్రపోయినప్పుడు నా కలలలోకి నేను చంపిన వారి ముఖాలు రావు. మిగిలున్న శత్రువుల ముఖాలే కనపడతాయి. పొరపాటున కూడా నా కలలలోకి రావొద్ద’ని ఎన్టీఆర్ చెప్పిన డైలాగ్ హీరో శక్తి సామర్ధ్యాలు ఏంటో తెలిసేలా చేశాడు.
పూర్తి రగ్గడ్ లుక్ లో ఎన్టీఆర్ చాలా పవర్ ఫుల్ గా, మాసివ్ అవతార్ లో కనిపించాడు. తన మేకోవర్ తో ఫ్యాన్స్ కు ఫుల్ మీల్స్ పెట్టేశాడు. రవి బస్రూర్ బీజీఎమ్ టీజర్ కు ప్లస్ లా నిలిచింది. విజువల్స్ కూడా బాగున్నాయి. బ్రిటిషర్లు ఎలా ఇండియాలోకి వచ్చారు.. ఎందుకు వచ్చారు.. ఆఫ్గనిస్థాన్ కు ఈ మాఫియాకు లింకేంటనేది సినిమా కథగా టీజర్ ద్వారా తెలుస్తుంది. రుక్మిణి వసంత్ హీరోయిన్ గా నటించింది. హీరో పరిచయం, డార్క్ బ్యాటిల్, స్లో మోషన్ నెరేషన్ మాత్రం ప్రశాంత్ నీల్ గత సినిమాల మాదిరే ఉన్నాయి. మొత్తంగా ఎన్టీఆర్ తన బర్త్ డేకి ఫ్యాన్స్ కు ఫుల్ ఫీస్ట్ ఇచ్చేశారు.