ఏపీలో డాక్టర్‌ సస్పెన్షన్‌.. ఏంటీ ఓవరాక్షన్‌.?

కరోనా కష్ట కాలంలో ఓ డాక్టర్‌ని సస్పెండ్‌ చేయడమంటే ఆషామాషీ వ్యవహారం కాదు. ఓ డాక్టర్‌ వంద మందికి.. కాదు కాదు, వెయ్యి మందికి వైద్య చికిత్స చేసే అవకాశముంటుంది. కానీ, అవేవీ పరిగణనలోకి తీసుకోలేదు ఆంధ్రప్రదేశ్‌ ప్రభుత్వం. ప్రభుత్వానికి వ్యతిరేకంగా వ్యాఖ్యలు చేశారన్నది సదరు డాక్టర్‌పై వచ్చిన ఆరోపణ.

నిజానికి, ప్రభుత్వంపై ఆ డాక్టర్‌ ఏమీ విమర్శలు చేయలేదు. కరోనా వైరస్‌ నేపథ్యంలో మాస్క్‌ల లభ్యతపై డాక్టర్‌ సుధాకర్‌ కీలక వ్యాఖ్యలు చేశారు. అంతే, అతనికి టీడీపీ నేత, మాజీ మంత్రి అయ్యన్నపాత్రుడితో సంబంధాలున్నాయంటూ సస్పెండ్‌ చేసి పడేశారు. కరోనా వైరస్‌ నేపథ్యంలో వినియోగించాల్సిన ప్రత్యేకమైన మాస్క్‌లను స్థానిక ప్రజా ప్రతినిథులు ఎక్కువగా వాడేస్తున్నారనీ, ఇలాగైతే రోగులకు వైద్య చికిత్స అందించే డాక్టర్ల పరిస్థితి ఏంటి.? అని డాక్టర్‌ సుధాకర్‌ ప్రశ్నించడం రాష్ట్ర వ్యాప్తంగానే కాదు, దేశవ్యాప్తంగానూ సంచలనం సృష్టించింది.

డాక్టర్‌ సుధాకర్‌, టీడీపీ నేత అయ్యన్నపాత్రుడు ఇంటికి వెళ్ళారనీ.. అక్కడే కుట్ర జరిగిందనీ ఓ వీడియో తెరపైకొచ్చింది. అంతే, రాజకీయ రచ్చ షురూ అయ్యింది. ఇదిలా వుంటే, అనంతపురంలో కరోనా పేషెంట్‌కి వైద్య చికిత్స అందించిన వైద్య సిబ్బందికి కరోనా సోకడం పరిస్థితి తీవ్రతను చెప్పకనే చెబుతోంది. వైద్యులకు కరోనా వైరస్‌ నుంచి ప్రొటెక్షన్‌ అందించే కిట్లు లేకపోవడమే ఈ పరిస్థితికి కారణం.

కానీ, అధికార పార్టీ నేతలు.. ‘జగనన్న కరోనా కానుక’ పేరుతో జనంలోకి వెళ్ళి, డబ్బులు పంచడం.. పార్టీ తరఫున ప్రచారం చేయడం కోసం అడ్డగోలుగా మాస్కుల్ని వాడేస్తున్నారు. ఈ నేపథ్యంలో మాస్కుల కొరత ఏర్పడుతోంది. టీడీపీ నేత ఒకరు ‘లాక్‌ డౌన్‌’ నిబంధనల్ని ఉల్లంఘించారంటూ అరెస్ట్‌ చేసిన పోలీసులు, అధికార పార్టీ నేతలపై చర్యలు తీసుకోకపోవడం గమనార్హం. ఏదిఏమైనా, డాక్టర్‌ సస్పెన్షన్‌ వ్యవహారం మాత్రం చాలా సీరియస్‌ అంశమే. డాక్టర్ల మనో స్థైర్యాన్ని దెబ్బ తీసే అంశమిది. అడ్డగోలుగా మాస్కులు వాడుతున్న ప్రజా ప్రతినిథులపై చర్యలు తీసుకోలేక.. నిలదీసిన డాక్టర్‌ని సస్పెండ్‌ చేయడం హాస్యాస్పదం కాక మరేమిటి.?