కోహ్లీ వర్సెస్‌ రోహిత్‌: ఎవరి వికెట్‌ పడుతుందో..

టీమిండియాకి సంబంధించినంతవరకు కెప్టెన్‌ విరాట్‌ కోహ్లీ.. వైస్‌ కెప్టెన్‌ రోహిత్‌ శర్మ.. ఇద్దరూ ఇద్దరే.! ఇద్దరి ట్రాక్‌ రికార్డ్‌ని పరిశీలిస్తే.. ఒకర్ని తక్కువ అని, ఒకర్ని ఎక్కువ అని అనడానికి వీల్లేని పరిస్థితి. ఇద్దరూ ఒకప్పుడు మంచి స్నేహితులు.. కానీ, ఇప్పుడు కాదు. వరల్డ్‌ కప్‌ క్రికెట్‌ పోటీల సందర్భంగా ఇద్దరి మధ్యా గ్యాప్‌ పెరిగిందన్నది తాజాగా జరుగుతున్న ప్రచారం.

అయితే, చాలాకాలంగా ఇద్దరి మధ్యా నివురుగప్పిన నిప్పులా వున్న ‘అభిప్రాయ బేధాలు’ ఇప్పుడు తారాస్థాయికి చేరి, ఒకరంటే ఒకరికి అస్సలేమాత్రం గిట్టని పరిస్థితి వరకూ వెళ్ళిందట. సోషల్‌ మీడియాలో ‘ఫాలో – అన్‌ ఫాలో’ వ్యవహారాలతో ఈ రచ్చ మరింత ముదిరింది. కోహ్లీ సతీమణి అనుష్క శర్మని, రోహిత్‌ శర్మ అన్‌ ఫాలో అవడం, ఆ వెంటనే రోహిత్‌ శర్మ భార్యని అనుష్క అన్‌ ఫాలో అవడం.. ఆ తర్వాత అనుష్క ఈ మొత్తం వ్యవహారాలపై స్పష్టత ఇవ్వడం.. అయినా వివాదం కొనసాగుతుండడం తెలిసిన సంగతులే.

ఇక్కడ విరాట్‌ కోహ్లీ వ్యవహార శైలిని పరిశీలిస్తే.. చాలా కోపిష్టి అనే ఆరోపణలు అతని మీద వున్నాయి. ఎవరి మీదన్నా పంతం పడితే.. ఆ పంతం నెగ్గించుకోవడానికి టీమిండియా ప్రయోజనాల్ని దెబ్బతీయడానికీ వెనుకాడడని అంటారు. మాజీ క్రికెటర్‌ అనిల్‌ కుంబ్లే టీమిండియా కోచ్‌గా పనిచేసినప్పుడు అతనితో విభేదాలు వచ్చాయి కోహ్లీకి. ఆ విభేదాల కారణంగానే టీమిండియా ఛాంపియన్స్‌ ట్రోఫీని చేజార్చుకోవడం అప్పట్లో పెద్ద దుమారం రేపింది.

వరల్డ్‌ కప్‌ సెమీ ఫైనల్‌కి ముందు రోహిత్‌తో విభేదాల కారణంగానే కోహ్లీ, చెత్త బ్యాటింగ్‌ చేశాడంటూ చాలా పుకార్లు వచ్చాయి. ఆ పుకార్ల మాటెలా వున్నా, జట్టు కూర్పు విషయమై కెప్టెన్‌ వైఖరిని రోహిత్‌ శర్మ పరోక్షంగా తప్పుపడుతున్న విషయం విదితమే. ఇద్దరు స్టార్‌ క్రికెటర్ల మధ్య ఇలాంటి అభిప్రాయ బేధాలు.. జట్టు ప్రయోజనాల్ని దెబ్బతీస్తాయని బీసీసీఐ గట్టిగా నమ్ముతోంది. అయితే, ఎవరినీ మందలించే పరిస్థితి లేదు.. వేటు వేసే పరిస్థితీ అసలే వుండకపోవచ్చు.

వెస్టిండీస్‌ టూర్‌ కోసం కోహ్లీకి రెస్ట్‌ ఇవ్వాలని జట్టు మేనేజ్‌మెంట్‌ భావించింది. దాంతో రోహిత్‌ కెప్టెన్సీలో టీమిండియా, వెస్టిండీస్‌తో తలపడాల్సి వుంది. అది ఇష్టం లేకనే, కోహ్లీ తనకు రెస్ట్‌ వద్దంటూ ముందుకొచ్చాడన్నది ఇంకో వివాదం. ఏదిఏమైనా, ఈ వివాదాలు ముదిరితే ఖచ్చితంగా ఓ పెద్ద వికెట్‌ పడిపోతుంది. అది కోహ్లీదా.? రోహిత్‌దా.? అన్నది రానున్న రోజుల్లో తేలుతుంది.