ఎన్ కౌంటర్ పై అప్పుడలా.. ఇప్పుడిలా..

దిశ హత్యాచార నిందితులను పోలీసులు ఎన్ కౌంటర్ చేయడాన్ని మృతుల కుటుంబీకులు తీవ్రంగా తప్పుబడుతున్నారు. తమ బిడ్డలను అన్యాయంగా చంపేశారంటూ పోలీసులపై మండిపడుతున్నారు. తమ బిడ్డలు చేసింది తప్పని, వారిని చంపేసినా పర్లేదని తొలుత పేర్కొన్నవారే తాజాగా ధ్వజమెత్తుతున్నారు. హత్యలు, అత్యాచారాలు చేసినోళ్లు ప్రాణాలతో తిరగట్లేదా.. ఇంత అన్యాయంగా మా వాళ్లను చంపేస్తారా అంటూ తూర్పారబడుతున్నారు.

దిశ హత్యాచార ఘటనపై దేశవ్యాప్తంగా ఆందోళనలు రేకెత్తడం, నిందితులను పోలీసులు 24 గంటల్లోనే అరెస్టు చేయడం, అనంతరం ఎన్ కౌంటర్ లో నలుగురు నిందితులూ హతమవడం తెలిసిందే. నిందితుల ఎన్ కౌంటర్ పై దేశవ్యాప్తంగా హర్షాతిరేకాలు వెల్లువెత్తాయి. అత్యాచారానికి పాల్పడి జైళ్లలో ఉన్నవారిని సైతం ఇలాగే ఎన్ కౌంటర్ చేసేయాలంటూ డిమాండ్లు రేగాయి.

అయితే, కొన్ని మహిళా, ప్రజా సంఘాలు మాత్రం ఎన్ కౌంటర్ ను వ్యతిరేకించాయి. అలాగే జాతీయ మానవ హక్కుల సంఘం కూడా దీనిపై సుమోటోగా విచారణ జరుపుతోంది. ఈ నేపథ్యంలో మృతుల కుటుంబీకుల వైఖరిలోనూ మార్పు వచ్చింది. తమ బిడ్డలు ఇలా చేయడాన్ని జీర్ణించుకోలేకపోయిన వార తల్లిదండ్రులు.. వారిని చంపేసినా పర్లేదని తొలుత పేర్కొన్నారు.

ఏ తల్లిదైనా కడుపు కోతేనని, ఆ అమ్మాయిని చంపినట్టుగానే తన కొడుకును చంపినా పర్లేదంటూ మృతుల్లో ఒకరైన చెన్నకేశవులు తల్లి జయమ్మ అప్పుడు స్పష్టంచేసింది. ఎన్ కౌంటర్ లో తన కొడుకు చనిపోయాడని తెలిసిన తర్వాత పోలీసులపై ఆమె తీవ్రంగా మండిపడుతోంది. తనకున్న రెండెకరాలు అమ్మి అయినా సరే.. ఆ ఎన్ కౌంటర్ చేసిన పోలీసుల పని పడతానని హెచ్చరించింది.

పైగా తప్పు మొత్తం దిశదే అనే రీతిలో అభ్యంతకర వ్యాఖ్యలు కూడా చేసింది. లారీ వాళ్లు అలాగే ఉంటారని, ఆ అమ్మాయికి రాత్రి 9 గంటల తర్వాత అక్కడ ఏం పని అంటూ ప్రశ్నలు గుప్పించింది. ఈ విషయంలో మానవ హక్కుల కమిషన్ ముందు కూడా తన గోడు వెళ్లబోసుకుంది. తమ బిడ్డలను అన్యాయంగా పొట్టనబెట్టుకున్నారంటూ మృతుల కుటుంబ సభ్యులు కమిషన్ సభ్యుల ముందు వాపోయారు.

మరోవైపు పోలీసులు మాత్రం పక్కా ఆధారాలతో సన్నద్ధమవుతున్నారు. అది నిజమైన ఎన్ కౌంటరే అని నిరూపించాలని భావిస్తున్నారు. ఇక జాతీయ మీడియా సైతం ఈ ఎన్ కౌంటర్ పై భిన్నాభిప్రాయాలు వ్యక్తం చేస్తోంది. దేశవ్యాప్తంగా అత్యాచార ఆరోపణలు ఎదుర్కొంటున్న ఎంపీలు, ఎమ్మెల్యేలను ఇలాగే ఎన్ కౌంటర్ చేయగలరా అని ప్రశ్నిస్తోంది. మొత్తానికి దిశ నిందితుల ఎన్ కౌంటర్ కొత్త చర్చకు దారితీసింది.