ఆంధ్రప్రదేశ్ ఫారెస్ట్ డిపార్ట్మెంట్ సహకారంతో రూపొందుతున్న ‘డిస్కవర్ ఆంధ్ర’ డాక్యుమెంటరీ టైటిల్, గ్లింప్స్ లాంఛ్ శనివారం ఘనంగా జరిగింది. ఏపీ ఉప ముఖ్యమంత్రి పవన్ కళ్యాణ్ అనుమతి, మార్గదర్శకతతో నిర్మాతలు పడాల సురేందర్ రెడ్డి, శ్రావ్య కూనం ఈ ప్రత్యేక ప్రాజెక్ట్ను తీసుకువస్తుండగా, నవదీప్ పల్లపొలి, సుప్రీమ్ హీరో సాయి దుర్గ తేజ్ సమర్పణలో శ్రీకాంత్ మన్నెపూరి ఈ డాక్యుమెంటరీని తెరకెక్కించారు. ఆంధ్రలో ఉన్న సహజ సంపద, అడవులు, జలపాతాలు, అపురూపమైన వైల్డ్ లైఫ్ను ప్రపంచానికి పరిచయం చేయబోతున్న ఈ ప్రాజెక్ట్పై సినీ ప్రముఖులు, ప్రేక్షకుల్లో ఆసక్తి పెరిగింది.
సాయి దుర్గ తేజ్ మాట్లాడుతూ, ఆంధ్రలో ఇన్ని అద్భుతాలు మన కళ్లముందే ఉన్నా కూడా వాటిని గుర్తించలేకపోతున్నామని, వాటిని ఇంత అందంగా చూపించినందుకు శ్రీకాంత్కు కృతజ్ఞతలు తెలిపారు. 2020లో పర్యావరణంపై తనకెక్కువగా ఆలోచనలు రావడంతో ‘గ్రీన్ పాస్’ అనే ఎన్జీవోను స్నేహితుడితో కలిసి ప్రారంభించిన విషయం గుర్తుచేశారు. బీచ్ క్లీన్అప్స్, కోస్టల్ జీవుల రక్షణ, పక్షుల సంరక్షణ కోసం చేస్తున్న పనులను వివరించారు. ‘రిపబ్లిక్’ సినిమాలోనూ పర్యావరణ పరిరక్షణపై సందేశం ఇచ్చినట్టు చెప్పి, ఇప్పుడు ‘డిస్కవర్ ఆంధ్ర’లో మన నేచర్, కల్చర్ను కాపాడుకోవాల్సిన అవసరాన్ని మరింత బలంగా చూపించినట్టు పేర్కొన్నారు. ఈ ప్రాజెక్ట్కు మణిశర్మ సంగీతం పెద్ద బలమైందన్నారు. మీడియా, ఆడియెన్స్ ఇలాంటి ప్రాజెక్ట్లకు మరింత సపోర్ట్ ఇవ్వాలంటూ అభిలషించారు.
నవదీప్ మాట్లాడుతూ, శ్రీకాంత్ 2014లో ప్రారంభించిన వైల్డ్ లైఫ్ జర్నీ తనను షాక్కు గురిచేసిందని, ఆంధ్రలో ఇంత అపురూపమైన వైల్డ్ లైఫ్ ఉందన్న విషయం డాక్యుమెంటరీ చూసే వరకు తెలుసుకోలేదని తెలిపారు. అడవిలో గడిపిన ప్రతి క్షణం తనను రీఫ్రెష్, రీసెట్ చేసినట్టు చెప్పారు. సమాజంలో మనం పక్క జీవుల్ని హింసిస్తూ బతికేస్తున్నాం కానీ ప్రకృతి మనకు ఇస్తున్న అద్భుతాల్ని మనమే పట్టించుకోవడం లేదని వ్యాఖ్యానించారు. ఆంధ్ర వైల్డ్ లైఫ్ను ప్రపంచానికి చూపాలన్న శ్రీకాంత్ సంకల్పం తనను, సాయి దుర్గ తేజ్ను ఈ ప్రాజెక్ట్తో అనుసంధానించిందన్నారు. విజువల్స్ చూసిన తేజ్ వెంటనే స్పందించి పవన్ కళ్యాణ్ను కలిపి కావాల్సిన సహాయం అందేలా చేశారని తెలిపారు. 72 నిమిషాల నిడివితో రూపొందిన ఈ డాక్యుమెంటరీ చూసిన తర్వాత ప్రేక్షకులందరూ “మన రాష్ట్రంలో ఇన్ని అద్భుతాలున్నాయా?” అని ఆశ్చర్యపోతారని నవదీప్ నమ్మకంగా చెప్పారు.
దర్శకుడు శ్రీకాంత్ మన్నెపూరి మాట్లాడుతూ, గ్రాడ్యుయేషన్ పూర్తయ్యాక వైల్డ్ లైఫ్పై చేసిన రీసెర్చ్లో తన తెలుగు రాష్ట్రాల అద్భుతాలు అందరికీ తెలియకపోవడం బాధ కలిగించిందన్నారు. ఫారెస్ట్ డిపార్ట్మెంట్లో వాలంటీర్గా పనిచేసిన తర్వాత ఆంధ్రలో ఉన్న అసలైన సహజసంపద తన కళ్లకు కనిపించిందని చెప్పారు. మన దగ్గరున్న వైవిధ్యం గురించి ప్రజలకు అవగాహన కల్పించాలన్న ఉద్దేశంతోనే ‘డిస్కవర్ ఆంధ్ర’ ఆలోచన వచ్చిందన్నారు. వైల్డ్ లైఫ్ అంటే ఆంధ్ర గుర్తుకు రావాలని, ఈ డాక్యుమెంటరీ అందుకు మొదటి అడుగవుతుందని చెప్పారు. టైటిల్, గ్లింప్స్ తో అందర్నీ ఆకట్టుకున్నామని, త్వరలోనే ట్రైలర్తో మరింత మంత్రముగ్ధులను చేయబోతున్నామని తెలిపారు. ఈ ప్రయాణంలో సపోర్ట్ చేసిన పవన్ కళ్యాణ్, నవదీప్, సాయి దుర్గ తేజ్కి కృతజ్ఞతలు చెప్పారు. మణిశర్మ అందించిన సంగీతం ప్రాజెక్ట్కు కొత్త ప్రాణం పోసిందని అన్నారు.
ఆంధ్రప్రదేశ్కి చెందిన సహజ అద్భుతాలు, అరుదైన జంతువులు, ప్రకృతి అందాలు ప్రపంచానికి చేరవేసే ‘డిస్కవర్ ఆంధ్ర’ కోసం ఇప్పుడు ప్రేక్షకుల్లో భారీ ఆసక్తి నెలకొంది. ఈ డాక్యుమెంటరీ విడుదల కోసం అందరూ ఎదురుచూస్తున్నారు.