డెల్టా ప్లస్ వచ్చేసింది.. రాజకీయం చూస్తే సిగ్గేస్తోంది.!

నవ్విపోదురుగాక మనకేటి సిగ్గు.? అన్నట్టుంది రాజకీయ నాయకుల తీరు. కొందరు రాజకీయ ప్రముఖులు కరోనా మొదటి వేవ్, కరోనా రెండో వేవ్ సమయాల్లో ప్రాణాలు కోల్పోయారు. ఆ కారణంగా ఉప ఎన్నికలూ వచ్చాయి. అయినా, కరోనా పట్ల రాజకీయ నాయకులకు బాధ్యత లేదు.

రాజకీయ నాయకుల సంగతి పక్కన పెడితే, సామాన్యులు చాలామంది దేశవ్యాప్తంగా కరోనా దెబ్బకు ప్రాణాలు కోల్పోయారు.. వందలు, వేలు.. కాదు లక్షల్లో వుంది మరణాల సంఖ్య. అయినా, రాజకీయాల్లో బాధ్యత లేదు.. రాదు. కరోనా వైరస్ డెల్టా ప్లస్ వేరియంట్ అప్పుడే దేశంలోని కొన్ని రాష్ట్రాలో వెలుగు చూసినట్లు కేంద్రం స్వయానా వెల్లడించింది. మరి, కరోనా మూడో వేవ్ పట్ల రాజకీయ నాయకులు బాధ్యతగా వుండాలా.? లేదా.? ప్రభుత్వాలూ నిర్లక్ష్యంగానే వ్యవహరిస్తున్నాయి.

లాక్ డౌన్ వెళ్ళిపోయి.. అన్ లాక్ వచ్చేసింది. త్వరలో విద్యా సంస్థలూ తెరుస్తారట. అంటే, ఇదేదో కావాలనే జనాన్ని కరోనా వైరస్‌కి బలి చేసేందుకు ప్రభుత్వాలు నడుపుతున్నవారు ప్రయత్నిస్తున్నారా.? అన్న అనుమానాలు జనంలో వ్యక్తమవుతున్నాయి. ‘ఎంత కాలం లాక్‌డౌన్‌లో వుంటాం? ఆర్థిక కార్యకలాపాలు దెబ్బతింటే, అది కరోనా వైరస్ కంటే ఎక్కువ నష్టం కలిగిస్తుంది..’ అన్నది ప్రభుత్వ పెద్దల వాదన.

ఆర్థిక కార్యకలాపాలు సరే.. విద్యా సంస్థలు ఎందుకు తెరవడం.? తప్పదు మరి.. విద్యా వ్యవస్థ కూడా వ్యాపారమే అయిపోయింది కదా.? రాజకీయ నాయకులు మీటింగులు పెట్టేస్తున్నారు.. ఓ మంత్రిగారు.. పైగా డాక్టరు.. ఓ సంక్షేమ కార్యక్రమం ప్రచారం కోసం పెద్దయెత్తున జనాన్ని పోగేసి రోడ్డుమీదకు లాక్కొచ్చేశారు. ఇంకా కర్ఫ్యూ నిబంధనలు అమల్లోనే వున్నా ఆ ఘనకార్యం చేశారు సదరు మంత్రిగారు.

అధికారులు ఏం చేస్తున్నారు.? పోలీసులు ఏం చేస్తున్నారు.? ఓ ముఖ్యమంత్రి సహపంక్తి భోజనాలు షురూ చేశారు. సభ్య సమాజానికి వీళ్ళంతా ఏం సందేశం ఇస్తున్నట్లు.? రావాల్సిందే.. మూడో వేవ్ రావాల్సిందే.. అన్నట్లుంది పొలిటికల్ కోవిడియట్స్ తీరు.. అంటూ జనం ఛీత్కరించుకునే పరిస్థితి కనిపిస్తోంది సర్వత్రా.