ఉద్యోగాలపై కరోనా ప్రభావం ఎలా ఉండనుంది?

ప్రపంచవ్యాప్తంగా తీవ్ర ఆందోళన రేకెత్తిస్తున్ కరోనా వైరస్ కారణంగా పెద్ద సంఖ్యలో ఉద్యోగాలు కూడా రిస్క్ లో పడనున్నాయా? ఇప్పటికే ఆర్థిక వ్యవస్థను అతలాకుతలం చేస్తున్న ఈ మహమ్మారి ప్రభావం ఉపాధిపైనా పడనుందా అంటే ఔననే సమధానాలు వినిపిస్తున్నాయి. కరోనా వైరస్ కారణంగా ఇప్పటికే పర్యాటక రంగంతోపాటు విమానయానం, హోటల్స్, వినోద రంగం వంటివాటిపై ప్రభావం పడింది.

టూర్లకు వెళ్లడానికి ఎవరూ సాహసించకపోవడంతో పర్యాటకరంగం తీవ్రంగా ప్రభావితమైంది. ఫలితంగా దీనిపై ఆధారపడి ఉన్న రవాణా, విమానయానం, హోటల్స్ వంటి వాటికి సెగ తగులుతోంది. ఇక సినిమా షూటింగులు ఆగిపోవడం, సినిమా హాళ్లు మూసివేడం కూడా ఆయా రంగాలపై ఆధారపడి ఉన్నవారికి ఇబ్బంది కలిగించే అంశమే.

కరోనా వైరస్ ప్రభావం ఏప్రిల్ నాటికి తగ్గే అవకాశం ఉందని పలువురు శాస్త్రవేత్తలు చెబుతున్నారు. ఎండ వేడికి ఆ వైరస్ తట్టుకోలేదని, ఏప్రిల్ నాటికి ఎండలు పెరగుతాయి కాబట్టి దాని ప్రభావం తగ్గుతందన్నది వారి అంచనా. అదే నిజమైతే ఈ రంగాల్లో ఉన్నవారికి ఈ నెల రోజులు తప్ప ఇక ఎలాంటి సమస్యా ఉండదు. ఒకవేళ ఈ వైరస్ తన సామర్థ్యాన్ని మెరుగుపరుచుకుని తన దాడి కొనసాగిస్తే, అప్పటిలోగా వాక్సిన్ లేదా మందు దొరక్కపోతే ఇబ్బంది తప్పదనే అభిప్రాయాలు వ్యక్తమవుతున్నాయి.

ముఖ్యంగా అమెరికాలో దాదాపు సగానికి పైగా ఉద్యోగాలు ప్రమాదంల పడే అవకాశం ఉందని ఓ నివేదిక అంచనా వేసింది. ముఖ్యంగా రవాణా, ఆతిథ్య రంగాలపై తీవ్రంగానూ.. రిటైల్, మాన్యుఫ్యాక్చరింగ్, కనస్ట్రక్షన్, ఎడ్యుకేష్ రంగాలపై స్పల్పంగానూ కరోనా ప్రభావం ఉంటుందని పేర్కొంది. ఈ నేపథ్యంలో ప్రపంచ దేశాలన్నీ ఏకమై ఈ మహమ్మారిపై పోరాడటంతోపాటు నియంత్రణకు తగిన చర్యలు తీసుకోవాల్సిన అవసరం ఉందని ఆ నివేదిక సూచించింది.

కీడెంచి మేలెంచమన్నారనే సామెత చందంగా.. ఒకవేళ సమీప భవిష్యత్తులో కరోనా వైరస్ కారణంగా ఇబ్బందులు పడే రంగాల్లో ఉన్న ఉద్యోగులు తగిన జాగ్రత్తలు తీసుకోవాలన్నదే ఈ కథనం ఉద్దేశం. ఇప్పటి నుంచే కొంత మొత్తాన్ని బ్యాకప్ గా ఉంచుకోవడంతోపాటు ఆర్థికపరమైన క్రమశిక్షణ, పొదుపు చర్యలు పాటించడం మంచిదని నిపుణులు సూచిస్తున్నారు.