కరోనా అలర్ట్‌: శ్రీకాకుళం జిల్లాకి పాకిన కరోనా.!

రాష్ట్రమంతా కరోనా వైరస్‌ పాజిటివ్‌ కేసులు నమోదవుతున్నా, ఆంధ్రప్రదేశ్‌లోని శ్రీకాకుళం, విజయనగరం జిల్లాలు మాత్రం నిన్నటివరకూ ఈ లిస్ట్‌లో లేకపోవడం గమనార్హం. అయితే, అనూహ్యంగా శ్రీకాకుళం జిల్లాలో 3 కరోనా పాజిటివ్‌ కేసులు ఈ రోజు నమోదయ్యాయి. దాదాపు నెల రోజులపాటు ప్రశాంతంగా వున్న శ్రీకాకుళం జిల్లాలో కరోనా పాజిటివ్‌ కేసులు నమోదు కావడంతో ఒక్కసారిగా అలజడి రేగింది. ‘ఢిల్లీ లింకులు’ వున్నాయని అధికారులు చెబతున్నా, నెల రోజులపాటు వెలుగు చూడని కేసులు, లాక్‌డౌన్‌ అమల్లో వున్నాక.. ఇప్పుడు ఎలా వెలుగు చూశాయన్నది సగటు శ్రీకాకుళం వాసుల ఆవేదనగా కన్పిస్తోంది.

కరోనా పాజిటివ్‌ వ్యక్తులతో కాంటాక్ట్‌ వున్నవారిగా భావిస్తున్న 67 మందిని అధికారులు క్వారంటైన్‌కి పంపినట్లు తెలుస్తోంది. శ్రీకాకుళం జిల్లాలో కరోనా కేసులు నమోదవడంతో, పొరుగునే వున్న విజయనగరం జిల్లాలోనూ కేసులు నమోదవుతాయేమోనన్న ఆందోళన వ్యక్తమవుతోంది. కాగా, కొందరు రాజకీయ నాయకులే శ్రీకాకుళం జిల్లాకి కరోనా వైరస్‌ని అంటించారన్న చర్చ జిల్లా వాసుల్లో జరుగుతుండడం గమనార్హం. లాక్‌డౌన్‌ పకడ్బందీగా అమల్లో వున్నా, కొందరు రాజకీయ నాయకులు మాత్రం యధేచ్చÛగా జిల్లాల మధ్య చక్కర్లు కొట్టేస్తున్నారనీ, వారి అనుచరులూ ‘అధికారం తమదే’ అన్న అత్యుత్సాహం ప్రదర్శించడమే ఈ పరిస్థితి కారణమన్న చర్చ జిల్లాలో విన్పిస్తోంది.

రాజకీయ నాయకుల ఓవరాక్షన్‌ కారణంగా కృష్ణా, గుంటూరు, కర్నూలు, చిత్తూరు జిల్లాల్లో పరిస్థితులు చెయ్యిదాటిపోయిన విషయం విదితమే. అయితే, ప్రభుత్వం మాత్రం.. కరోనాని రాజకీయ కోణంలోగానీ, మత కోణంలోగానీ చూడటం తగదని చెబుతోంది. ఏదిఏమైనా, ప్రభుత్వం లాక్‌డౌన్‌ విషయంలో మరింత పకడ్బందీ చర్యలు చేపట్టాల్సి వుందన్నది నిర్వివాదాంశం. ఇదిలా వుంటే, రాష్ట్రంలో ఈ రోజు కొత్తగా 61 కరోనా పాజిటివ్‌ కేసులు నమోదయ్యాయి. దాంతో, కరోనా పాజిటివ్‌ కేసుల సంఖ్య మొత్తంగా 1016కి చేరుకుంది. తెలుగు రాష్ట్రాల్లో వెయ్యి మార్క్‌ దాటిన చెత్త ఘనత ఆంధ్రప్రదేశ్‌ మూటగట్టుకోవడం బాధాకరం.