కోలుకుంటున్న జనం.. కోరలు చాస్తున్న కరోనా

జనసాంద్రత ఎక్కువగా వున్న భారతదేశంలో కరోనా వైరస్‌ (కోవిడ్‌-19) వ్యాప్తిని అడ్డుకోవడం అంత ఆషామాషీ వ్యవహారం కాదు. దేశంలో కరోనా పాజిటివ్‌ కేసుల సంఖ్య లక్ష దాటేసినా.. ప్రపంచంలోని చాలా దేశాలతో పోల్చితే మన దేశంలో లాక్‌డౌన్‌ కారణంగా మెరుగైన పరిస్థితే వుందని పలు సర్వేలు, నివేదికలు చెబుతున్నాయి. నిజానికి, అసలు సమస్య ఇప్పుడే మొదలవుతోంది. కేసుల సంఖ్య రోజు రోజుకీ మరింత పెరుగుతోంది. నిన్న దేశంలో 5600 కొత్త కేసులు నమోదయ్యాయి.

మరోపక్క, క్రమక్రమంగా సగటు భారతీయుడు ఊపిరి పీల్చుకుంటున్నాడు. ఇప్పుడిప్పుడే రకరకాల పనుల నిమిత్తం కాస్త స్వేచ్ఛగా బయటకొస్తున్నాడు చాలా రోజుల తర్వాత. లాక్‌డౌన్‌ ఇంకా అమల్లో వున్నప్పటికీ, కేంద్రం కల్పించిన వెసులుబాట్లు.. రాష్ట్రాలు ఇస్తున్న వెసులుబాట్లతో జనజీవనం ఇప్పుడిప్పుడే గాడిన పడుతోంది. అయితే, ఇంకా సొంతూళ్ళకు వలసదారులు పోటెత్తడం మాత్రం ఆగడంలేదు. అది ఇప్పట్లో ఆగేలా కన్పించడంలేదు కూడా.

‘ఏదీ మునుపటిలా వుండదు..’ అని చాలా సందర్భాల్లో చెప్పుకున్నాం. అది నిజం కూడా. బయట తిరుగుతున్నా, పక్కన వెళుతున్నవారిని అనుమానంతో చూడాల్సి రావడం ఎవరికైనా అత్యంత బాధాకరమైన విషయం. కానీ, తప్పదు. కరోనా వైరస్‌ అలాంటిది మరి. దేశంలో కరోనా పాజిటివ్‌ కేసులు లక్ష దాటేశాయ్‌.. అనేదొక్కటే కాదు.. కోలుకుంటున్నవారి సంఖ్య కూడా గణనీయంగా పెరుగుతోందన్న విషయాన్నీ గుర్తుంచుకోవాలి. మరణాల శాతం తక్కువగానే వున్నప్పటికీ, మనదేశంలో ఆ ‘శాతం’ అనేది అత్యంత కీలకం. దేశంలో ఏ ఒక్కరినీ కరోనా వదిలిపెట్టే అవకాశం లేదంటూ నిపుణులు హెచ్చరిస్తున్న వేళ 3 శాతం మరణాలు అంటే భారతదేశంలో చిన్న విషయం అని ఎలా అనుకోగలం.?

135 కోట్ల మంది జనాభా వున్న భారతదేశంలో కరోనా వైరస్‌ మొత్తంగా వ్యాప్తి చెందితే.. ఆ పరిస్థితిని అస్సలేమాత్రం ఊహించలేం. వీలైనంత త్వరగా వ్యాక్సిన్‌ వస్తే.. మరణాలకు ఫుల్‌స్టాప్‌ పడుతుంది. ఈలోగా వ్యక్తిగత పరిశుభ్రత, ఫిజికల్‌ డిస్టెన్స్‌ తప్పనిసరి. లాక్‌డౌన్‌ సడలింపులతో జనం కోలుకుంటుండడం ఆహ్వానించదగ్గ పరిణామమే. కూలీ నుంచి కార్పొరేట్‌ ఉద్యోగిదాకా.. అందరికీ ఇది ఉపశమనమే. కానీ, భయం భయంగా ఎన్నాళ్ళు ఈ జీవితం.? అన్నదే అందరి మదిలో మెదులుతున్న ఆవేదన.