క్రికెట్‌పై కరోనా ఎఫెక్ట్‌: ఇకపై అవేవీ కన్పించవా.?

కరోనా వైరస్‌ నేపథ్యంలో ప్రపంచ వ్యాప్తంగా అన్ని రంగాల్లోనూ పెను మార్పులు చోటు చేసుకోనున్నాయి. ‘ఏదీ ఇంతకు ముందులా వుండదు..’ అని కరోనా వైరస్‌పై నిపుణులు తమ అభిప్రాయాల్ని కుండబద్దలుగొట్టేస్తున్న విషయం విదితమే. మరి, క్రికెట్‌ పరిస్థితి ఏంటి.? మైదానంలో ఇదివరకటిలా అభిమానుల హోరు వుండదా.? మైదానంలో ఆటగాళ్ళ మధ్య ఆత్మీయ ఆలింగనాలు వుండవా.? గెలుపు సంబరాల్ని మైదానంలో చూడలేమా.? ఇలా ఎన్నెన్నో అనుమానాలు అభిమానుల్ని వేధిస్తున్నాయి.

అయితే, ముందు ముందు ప్రపంచం మళ్ళీ సాధారణ స్థాయికి వస్తుందనీ, చిన్న చిన్న జాగ్రత్తలు మాత్రం తప్పనిసరి అన్న భావన వ్యక్తమవుతోంది. లాక్‌డౌన్‌ నుంచి సడలింపులు వస్తున్నాయి.. దశల వారీగా లాక్‌డౌన్‌ని ఎత్తివేయబోతున్నారు కూడా. దాంతో, అతి త్వరలో క్రికెట్‌ మ్యాచ్‌ల నిర్వహణపైనా స్పష్టత రావొచ్చు. బంతిపై ఉమ్ము రాయకూడదు.. మైదానంలో ఉమ్మి వేయకూడదు.. ఇలాంటి నిబంధనలు ఆటగాళ్ళకు సంబంధించి తప్పదు.

ఇక, స్టేడియంలో సోషల్‌ డిస్టెన్సింగ్‌ ఎలా పాటిస్తారన్నదానిపైనా ఐసీసీతోపాటు ఆయా దేశాల్లోని క్రికెట్‌ బోర్డులూ మార్గదర్శకాల్ని రూపొందించే పనిలో పడ్డాయి. మైదానంలో అభిమానులు ఖచ్చితంగా వుండాల్సిందే.. అదీ వీలైనంత ఎక్కువమంది వుండాల్సిందే. అది లేకపోతే మ్యాచ్‌లో ‘కిక్కు’ వుండదు. కానీ, అభిమానులు ఎక్కువైతే.. ఆ తర్వాత పరిస్థితులు వేరేలా వుంటాయ్‌. మరెలా.? సాంకేతిక పరిజ్ఞానాన్ని ఉపయోగించి.. మైదానంలో తక్కువమంది అభిమానులతోనే మ్యాజిక్‌ చేసి, ఆటగాళ్ళలో ఉత్సాహం నింపాలన్న ఆలోచనలు జరుగుతున్నాయి.

అయితే, ‘టెస్ట్‌ మ్యాచ్‌లలో రెండో రోజు ఓ కీలక ఆటగాడికి కరోనా వైరస్‌ సోకినట్లు తేలితే ఏం చేస్తారు.?’ అంటూ మాజీ క్రికెటర్‌ రాహుల్‌ ద్రావిడ్‌ వేసిన ప్రశ్న చాలా చాలా ముఖ్యమైనది. వన్డేలు, టీ20ల వరకూ అయితే కాస్త ఫర్వాలేదంతే. నిజానికి, అంతా సర్వసన్నద్ధం అనుకున్నవేళ ఆటగాళ్ళలో ఒకరికో, ఇద్దరికో ఇంకా ఎక్కువమందికో కరోనా పాజిటివ్‌ అని తేలితే.. మ్యాచ్‌ నిర్వహణ అటకెక్కిపోతుంది. సో, క్రికెట్‌ మాత్రమే కాదు, ఇతర క్రీడలకు సంబంధించి కూడా చాలా చాలా ఆలోచించి ఆయా బోర్డులు నిర్ణయాలు తీసుకోవాల్సి వుంటుంది. సో, మైదానాల్లో క్రికెట్‌ అనే కాదు.. ఏ ఇతర ఆటలూ ఇప్పట్లో అంత సాధ్యమయ్యే అవ్యవహారాలే కాదన్నమాట.