అమరావతి: ఉప్పాడ తీర ప్రాంత మత్స్యకారుల సర్వతోముఖాభివృద్ధిని లక్ష్యంగా చేసుకుని రాష్ట్ర ప్రభుత్వం సమగ్ర ప్రణాళికను సిద్ధం చేసింది. తీర కాలుష్య నివారణ, తీర కోత నియంత్రణ, మత్స్య సంపద పెంపకం, ఆధునిక పద్ధతుల్లో వేటకు సహాయం, మార్కెటింగ్ సదుపాయాల విస్తరణ, ప్రకృతి వైపరీత్యాల నుంచి రక్షణ వంటి అంశాలతో పాటు మత్స్యకార కుటుంబాల జీవితాలకు భద్రత, భరోసా కల్పించేలా ఈ ప్రణాళికను రూపొందించినట్టు ఉప ముఖ్యమంత్రి పవన్ కళ్యాణ్ తెలిపారు. గత ఏడాది అక్టోబర్ 9న కాకినాడ కలెక్టరేట్లో మత్స్యకారులు లేవనెత్తిన ప్రతి సమస్యను అధ్యయనం చేసి, వాటికి పరిష్కార మార్గాలు సూచించేలా కార్యాచరణ ప్రణాళిక సిద్ధం చేసినట్టు చెప్పారు.
ఈ ప్రణాళిక రూపకల్పనలో వివిధ శాఖల సమన్వయం కీలకంగా పనిచేసిందని, మెరైన్ ఫిషరీస్ నిపుణులు, జిల్లా అధికారులు కలిసి సూచనలు అందించారని తెలిపారు. ఉప్పాడ తీర ప్రాంత గ్రామాల్లో మౌలిక వసతులు మెరుగుపరచడం, తీర భద్రతను బలోపేతం చేయడం, వేట అనంతర నిల్వలు, రవాణా, విక్రయ వ్యవస్థను ఆధునీకరించడం ద్వారా మత్స్యకారులకు మెరుగైన ఆదాయం కల్పించడమే లక్ష్యంగా ప్రభుత్వం ముందుకు వెళ్తోందని పేర్కొన్నారు. అలాగే వ్యవసాయ అనుబంధ రంగాల అభివృద్ధి, ప్రత్యామ్నాయ ఉపాధి అవకాశాల కల్పనతో కుటుంబాల ఆర్థిక స్థిరత్వాన్ని పెంచే చర్యలు కూడా ప్రణాళికలో భాగమని తెలిపారు.
తీర ప్రాంతాల్లో తరచుగా ఎదురయ్యే తుపానులు, అలజడి, సముద్ర కాలుష్యం వంటి సమస్యల నేపథ్యంలో ముందస్తు హెచ్చరిక వ్యవస్థలు, రక్షణ మౌలిక సదుపాయాలు, అత్యవసర సేవలను పటిష్టం చేసే అంశాలను కూడా ప్రణాళికలో పొందుపరిచామని ఉప ముఖ్యమంత్రి వివరించారు. ఉప్పాడ మత్స్యకారుల జీవన ప్రమాణాలు మెరుగుపడి, యువతకు స్థిరమైన ఉపాధి అవకాశాలు అందేలా ఈ ప్రణాళికను అమలు చేస్తామని చెప్పారు. ఈ సమగ్ర కార్యాచరణను త్వరలో పిఠాపురం పర్యటన సందర్భంగా అధికారికంగా ప్రకటించేందుకు ఏర్పాట్లు జరుగుతున్నాయని ప్రభుత్వం వెల్లడించింది.