సినిమా రివ్యూ : రాక్షసుడు

నటీనటులు : బెల్లంకొండ శ్రీనివాస్, అనుపమ పరమేశ్వరన్, రాజీవ్ కనకాల, కాశి విశ్వనాధ్, రవి తరుతరులు
రేటింగ్ : 2. 75 / 5
కెమెరా : వెంకట్ సి దిలీప్
సంగీతం : జిబ్రాన్
దర్శకత్వం : రమేష్ వర్మ
నిర్మాత : కోనేరు సత్యనారాయణ

అల్లుడు శీను తరువాత బెల్లంకొండ శ్రీనివాస్ ఛాయిస్ మారింది. మాస్ కథలతో సినిమాలు చేసేందుకు అయన ఎక్కువ ఆసక్తి చూపిస్తున్నాడు. ఈ నేపథ్యంలో మరోసారి పోలీస్ పాత్రలో నటించేందుకు రెడీ అయ్యాడు. తమిళంలో సూపర్ హిట్ అయిన రాక్షసన్ చిత్రాన్ని తెలుగులో రాక్షసుడు పేరుతొ రీమేక్ చేసారు. మర్డర్ మిస్టరీ నేపథ్యంలో తెరకెక్కిన ఈ సినిమాలో రాక్షసుడు ఎవరో తెలియాలంటే కథలోకి వెళ్లాల్సిందే ..

కథ :

అరుణ్ ( బెల్లంకొండ శ్రీనివాస్ ) దర్శకుడవ్వాలన్న సంకల్పంతో తిరుగుతూ ఉంటాడు. ఎన్ని ప్రయత్నాలు చేసిన అతనికి ఎవ్వరు అవకాశం ఇవ్వరు. ఆ తరువాత తన తండ్రి మరణాంతరం పోలీస్ జాబ్ చేయడానికి రెడీ అవుతాడు. పోలీస్ డ్యూటీ లో చేరిన అతనికి ఓ సవాల్ విసిరేలా వరుసగా స్కూల్ పిల్లలను దారుణంగా హతమార్చే సైకో కేసు ఇన్వెస్టిగేషన్ చేస్తుంటాడు. ఈ నేపథ్యంలో తన బావ ( రాజీవ్ కనకాల ) కూతురు కూడా కిడ్నప్ కు గురవడం .. ఆ తరువాత అదే సైకో చేతుల్లో మరణించడం జరుగుతుంది. దాంతో ఈ కేసు విషయంలో సస్పెండ్ అయిన అరుణ్ .. సొంతంగా ఇన్వెస్టిగేషన్ చేసి హంతకుడిని పట్టుకున్నాడా ? లేదా అన్నది మిగతా కథ.

నటీనటుల ప్రతిభ :

దర్శకుడిగా తిరిగే విషయంలో కానీ, ఓ పోలీస్ గా తన విధులు నిర్వర్తించే విషయంలో హీరో బెల్లంకొండ శ్రీనివాస్ చక్కగా చేసాడు. పోలీస్ గా అతని ఫిజిక్ బాగా సెట్ అయింది. ఎలాంటి హీరోయిజం లేకుండా ఓ సామాన్య పోలీస్ గా బాగా చేసాడు. అయితే కొన్ని హావభావాల విషయంలో ఇంకాస్త కేర్ తీసుకుంటే బాగుండేది. ఇక హీరోయిన్ అనుపమ టీచర్ పాత్రలో ఆకట్టుకుంది. ఈ పాత్రలో చాలా కొత్తగా కూడా అనిపిస్తుంది. అయితే ఈ సినిమాలో పాటలు లేకపోవడం , హీరోయిన్ పాత్రకు అంత ప్రాముఖ్యత లేకపోవడం కమర్షియల్ యాంగిల్ లో చూస్తే కొంత మైనస్ గా అనిపించే అంశం. రాజీవ్ కనకాల ఉన్నంతలో బాగానే చేసాడు. మిగతా నటీనటులు వారి వారి పాత్రల్లో చక్కగా నటించి ఆకట్టుకున్నారు. అయితే విలన్ విషయంలో అసలు ఆ ఆర్టిస్ట్ ఎవరన్న విషయాన్నీ చెప్పుకోవడానికి వీల్లేనంత మేకప్ లో ముంచేశారు .. దాంతో విలన్ విషయంలో నిరాశ కలిగేలా చేసింది.

టెక్నీకల్ హైలెట్స్ :

ఈ సినిమాకు స్క్రిప్ట్ పెద్ద బలం అని చెప్పాలి .. అయితే ఇదేమీ కొత్త కథ కాదు .. ఇప్పటికే చాలా సార్లు వచ్చిన కథ. దానికి కొత్త నేపథ్యం రాసుకున్నాడు దర్శకుడు. జిబ్రాన్ అందించిన మ్యూజిక్ సినిమా మూడ్ ని అదే టెంపోలో ఉంచేసింది. సినిమాటోగ్రఫీ సూపర్. ప్రతి షాట్ కొత్తగా అనిపిస్తుంది. కలర్, మూడ్ విషయంలో కేర్ తీసుకున్నాడు కెమెరా మెన్ వెంకట్. కథను థ్రిల్లింగ్ గా నడిపించే విషయంలో కెమెరా కీలకంగా పనిచేసింది. అయితే చాలా సన్నివేశాల్లో తమిళ సినిమా సీన్స్ అలాగే ఉంచేశారు. నిర్మాణ విలువలు బాగున్నాయి. ఇక దర్శకుడు రమేష్ వర్మ .. కథను ఫ్లో మిస్ అవ్వకుండా జాగ్రత్తగా నడిపించే ప్రయత్నం చేసాడు. డైలాగ్స్ పరవాలేదు. ఇందులో దర్శకుడు కొత్తగా రాసుకున్న సన్నివేశాలు ఏమిలేవు. మొత్తానికి నేటివ్ విషయంలో ఎక్కడా ఇబ్బంది రాకుండా జాగ్రత్త పడ్డాడని చెప్పాలి.

విశ్లేషణ :

ఇలాంటి సైకో నేపథ్యంలో అప్పట్లోనే చాలా సినిమాలు వచ్చాయి. ఇదేమి కొత్త కథ కాదు .. కానీ ఎంచుకున్న నేపథ్యం, హీరో సినిమా దర్శకుడు అవ్వాలన్న కోరికతో ఓ సైకో కథను రాసుకోవడం .. దానిపై రీసెర్చ్ చేయడం .. అతను పోలీస్ అయ్యాకా మళ్ళీ అలంటి కేసు వస్తే అది సులభంగా డీల్ చేయడం అన్నది కొత్త అంశం తప్ప మిగతా కథ చాలా సార్లు చూసేసిందే. తమిళంలో సూపర్ హిట్ అయిన ఈ చిత్రాన్ని తెలుగులో యాజ్ ఇట్ ఈజ్ గా దించేశారు కాబట్టి .. ఈ సినిమా విషయంలో పెద్దగా ఎవరికీ క్రెడిట్ దక్కకపోవచ్చు. అయితే హీరోగా నటించిన బెల్లంకొండ శ్రీనివాస్ నటనతో ఆకట్టుకున్నాడు. గత సినిమాలతో పోల్చితే అతని నటనలో మెచ్యూరిటీ కనిపిచింది. అయితే ఇంకొన్ని ఎమోషనల్ సన్నివేషాల విషయంలో బాగా చేయాలి. హీరోయిన్ అనుపమ, మిగతా పాత్రల్లో నటించిన నటులు పరవాలేదనిపించారు. మొత్తానికి రాక్షసన్ అనే టైటిల్ తో వచ్చిన ఈ సినిమా విషయంలో అసలు విలన్ ను ఎక్కడ చూపించకుండా దాచి ఉంచడం కూడా కొంత నిరాశ కలిగిస్తుంది.

ట్యాగ్ లైన్ : రాక్షసుడు … థ్రిల్ చేస్తాడు !!