ఆకాశంలో సగం కాదు.. పూర్తిగా వారే!

మహిళలను ఆకాశంలో సగం అని అభివర్ణిస్తుంటారు. కానీ వారిప్పుడు ఆకాశంలో సగం కాదు.. ఆకాసమంతా వారే. భువి నుంచి దివి వరకు అన్ని రంగాల్లోనూ పురుషులతో సమానంగా దూసుకుపోతున్నారు. తాజాగా ఇద్దరు మహిళలు పురుషులు లేకుండా స్పేస్ వాక్ చేసి చరిత్ర సృష్టించారు. ఇలా మహిళలు మాత్రమే స్పేస్ వాక్ చేయడం తొలిసారి కావడం విశేషం.

నాసాకు చెందిన మహిళా వ్యోమగాములు క్రిస్టినా కోచ్, జెస్సికా మెయర్ భారత కాలమానం ప్రకారం శుక్రవారం రాత్రి అంతర్జాతీయ అంతరిక్ష కేంద్రం నుంచి బయటకు వచ్చారు. అంతరిక్ష కేంద్రంలో పనిచేయని పవర్ కంట్రోలర్ బ్యాటరీని మార్చి తిరిగి లోనికి వెళ్లారు. మొత్తం ఏడు గంటల పదిహేడు నిమిషాలపాటు వీరిద్దరూ స్పేస్ వాక్ చేశారు.

గతంలోనూ మహిళా వ్యోమగాములు స్పేస్ వాక్ చేసినా.. అప్పుడు వారి వెంట పురుష వ్యోమగాములు ఉన్నారు. ఇప్పటివరకు 54 ఏళ్లలో మొత్తం 420 స్పేస్ వాక్ లు జరగగా.. 227 మంది పురుష వ్యోమగాములు, 14 మంది మహిళా వ్యోమగాములు అందులో పాలుపంచుకున్నారు. తాజాగా జరిగిన 421వ స్పేస్ వాక్ లో కేవలం ఇద్దరు మహిళలు మాత్రమే ఉన్నారు. క్రిస్టినా నాలుగోసారి స్పేస్ వాక్ చేయగా.. మెయర్ కు మాత్రం ఇదే తొలి స్పేస్ వాక్.

వాస్తవానికి ఆరు నెలల క్రితమే మహిళా వ్యోమగాముల స్పేస్ వాక్ జరగాల్సి ఉంది. అయితే, ఇద్దరికీ సరిపోయే స్పేస్ సూట్ అందుబాటులో లేకపోవడంతో ఈ ప్రక్రియ వాయిదా పడింది. కాగా, మహిళా వ్యోమగాములు స్పేస్ వాక్ చేసిన నేపథ్యంలో అమెరికా అధ్యక్షుడు డోనాల్డ్ ట్రంప్ అంతర్జాతీయ అంతరిక్ష కేంద్రానికి ఫోన్ చేసి మాట్లాడారు. క్రిస్టినా, మెయర్ కు అభినందనలు తెలిపారు.

స్పేస్ వాక్ అంటే…

అంతర్జాతీయ అంతరిక్ష కేంద్రంలో పనిచేసే వ్యోమగాములు.. ఏవైనా మరమ్మతులు చేయడానికి, కొన్ని ప్రయోగాలు చేయాలనికి బయటకు రావాల్సి ఉంటుంది. అలా బయటకు వచ్చి పనిచేయడాన్ని స్పేస్ వాక్ అంటారు. ఎక్స్ ట్రా వెహికల్ యాక్టివిటీ (ఈవీఏ) అని కూడా దీనికి పేరుంది. గాలి, వాతావరణం లేని శూన్య ప్రదేశంలో నడవడం అంత సులభం కాదు. దానికి ఎంతో శిక్షణ అవసరం. స్పేస్ సూట్ ధరించి, అంతరిక్ష కేంద్రానికి.. సూట్ కి ఓ తాడు వంటి పరికరాన్ని అనుసంధానించుకుని బయటకు వస్తారు. ఆ శూన్య ప్రదేశంలో అవసరమైన చోటకు వెళ్లి తాము చేయాల్సిన పని పూర్తి చేయాల్సి ఉంటుంది. ఇది అత్యంత సవాల్ తో కూడిన పని. 1865 మార్చి 18న రష్యా వ్యోమగామి అలెక్స్ లెవనోవ్ తొలిసారిగా స్పేస్ వాక్ చేశారు. దాదాపు 10 నిమిషాలపాటు ఆయన ఆ వాక్ చేశారు.