Chiranjeevi Birthday Special: సినిమాకు క్లైమాక్స్ చాలా కీలకం. ప్రారంభం నుంచి రక్తి కట్టించే సినిమా ముగింపు ఎలా ఉంటుందనే ఆసక్తి ప్రేక్షకుల్లో ఉంటుంది. తెలుగు సినిమాలు హ్యాపీ ఎండింగ్ తోనే ఉండాలి. కొన్ని సినిమాల్లో క్లైమాక్స్ లో నటీనటుల పెర్ఫార్మెన్స్ మరీ కీలకం. కొన్నిసార్లు సినిమా టాక్ కు కీలకం అవుతాయి కూడా. అలా ఆర్ధృత కలిగిన సినిమాలు కమర్షియల్ హీరోగా తిరుగులేని ఇమేజ్ తెచ్చుకున్న చిరంజీవికీ ఉన్నాయి. తొలి సినిమా ‘ప్రాణం ఖరీదు’లోనే అటువంటి క్లైమాక్స్ చూడొచ్చు. తాయారమ్మ బంగారయ్య, కుక్కకాటుకు చెప్పుదెబ్బ వంటి సినిమాల్లో విలనిజంతో తనలోని నటనను మరో కోణంలో ఆవిష్కరించారు. ‘పున్నమినాగు’లో చిరంజీవిని.. పారిపో అని హీరో అంటే.. ‘ఎక్కడికని పోవాలి.. పోతే పుట్టలోకే పోవాల’ని చిరంజీవి చెప్పే డైలాగ్ ప్రేక్షకుల్ని కంటనీరే తెప్పిస్తుంది. అంతలా పాత్రకి ప్రాణం పోశారు చిరంజీవి.
చిరంజీవి నటనను, సినిమా స్థాయిని మరింత పెంచిన సినిమా రుద్రవీణ. సినిమాలో చిరంజీవి పాత్ర అణగారిన వర్గాలు కూడా సాటి మనుషులే.. అందరూ సమానమని నమ్మే వ్యక్తి. వారి కోసం ఊరి బాగు కోసం శ్రమించే సూర్యం పాత్రలో నటించారు చిరంజీవి. తండ్రి-కొడుకుల మధ్య సంఘర్షణలో చివరికి చిరంజీవి ఊరి కోసం శ్రమించి దేశ ప్రధాని స్థాయిలో గౌరవం తెచ్చుకోవడం.. నేను ‘సూర్యం తండ్రిని’ అని చెప్పుకునే క్లైమాక్స్ సినిమాకు హైలైట్. అప్పటికే చిరంజీవితో పలు సినిమాలు చేసిన చిత్ర దర్శకుడు కె.బాలచందర్.. ‘రజినీకాంత్ + కమల్ హాసన్ = చిరంజీవి’ అనేలా చేసింది. భారతీరాజా దర్శకత్వంలో వచ్చిన ‘ఆరాధన’ కూడా చిరంజీవి నటనలోని పలు వేరియేషన్స్ చూపిస్తుంది. పులిరాజు పాత్రలో చిరంజీవి ఆవేశం మాత్రమే కాదు.. ప్రేమ కోసం పరితపించే ప్రేమికుడిగా క్లైమాక్స్ లో నటన అద్భుతం.
చిరంజీవి నటించిన మరో అద్భుతమైన పాత్ర ‘ఆపద్భాందవుడు’లో మాధవ పాత్ర. గోవుల కాపరిగా.. అనాధగా తనను చేరదీసిన కుటుంబానికి విధేయుడిగా ఉండే పాత్రలో నటించారు. ముఖ్యంగా కథలోని తీవ్రమైన భావోద్వేగాల మధ్య క్లైమాక్స్ లో చిరంజీవి నటన ప్రతి ప్రేక్షకుడికి కంటనీరే తెప్పిస్తుంది. తనను ప్రేమించిన అమ్మాయిని తీవ్ర సంఘర్షణతో స్వీకరించే క్లైమాక్స్ మనసుల్ని చలింపజేస్తుంది. స్వాతంత్ర సమరయోధుడిగా చిరంజీవి నటించిన ‘సైరా..’ మూవీలో క్లైమాక్స్ చిరంజీవి కెరీర్లోనే పీక్స్ అని చెప్పాలి. ఉరికొయ్యపై నుంచున్నా చెదరని ఆత్మవిశ్వాసం చూపిస్తూ కళ్లతోనే చిరంజీవి నటన నభూతో..! సినిమాలో చిరంజీవి పాత్ర ముగిసినా ప్రేక్షకులు స్వీకరించారంటే ఎంతటి పట్టున్న క్లైమాక్స్ అర్ధం చేసుకోవాల్సిందే. ప్రేక్షకుల్ని సినిమాలో లీనమయ్యేలా చేయడమే కాదు కంటనీరు తెప్పించిన క్లైమాక్స్ ఇది.