Chiranjeevi Birthday Special: యాక్షన్ సినిమాలు చేయడం చాలా కష్టం. ఇప్పుడంటే టెక్నాలజీ వచ్చి హీరోలకి కాస్త వెసులుబాటు దక్కింది కానీ.. 20 ఏళ్ల క్రితం వరకూ యాక్షన్ అంటే ఒళ్ళు వంచాల్సిందే.. దెబ్బలు తగలాల్సిందే. అయితే.. అంతకుముందు 20ఏళ్ల క్రితం కూడా హీరోలకు యాక్షన్ సులువే.. డూప్ తో కొంత వెసులుబాటు ఉండేది. కానీ, ఆ తరానికి, నేటి తరానికీ మధ్య ఓ హీరో వీటి హద్దుల్ని చెరిపేసి యాక్షన్, ఫైట్స్ అంటే ఇవీ అని లెక్కలే మార్చేశాడు. ఆయనే ‘చిరంజీవి’. యువ కెరటంలా సినిమాల్లోకి వచ్చిన చిరంజీవి తనదైన మార్క్ స్కిల్స్ తో యావత్ ఇండస్ట్రీ, తెలుగు ప్రేక్షకుల్ని.. ఫైట్స్ అంటే ఇలా చేయాలా..? అని మిగిలిన హీరోలూ అలా చేసేలా.. ప్రేక్షకులకు కొత్త అనుభూతినిచ్చిన హీరో ‘చిరంజీవి’.
నటుడు మురళీ మోహన్.. ‘అప్పటివరకూ ఫైట్స్ అంటే కెమెరా ముందు చేతులు ఊపుతూ, డూప్స్ తో కాస్త డ్రమటిక్ గా ఉండే ఫైట్స్ స్టయిల్ ను చిరంజీవి వచ్చి సమూలంగా మార్చేశా’రని చెప్పుకొచ్చారు ఓ ఇంటర్వ్యూలో. అది వంద శాతం నిజం. చొక్కా నలగకుండా.. జుట్టు చెదరకుండా.. మొహంలో అలసట లేకుండా చేసే ఫైట్లను చిరంజీవి పూర్తిగా మార్చేశారు. ‘ఖైదీ’లో పోలిస్ స్టేషన్ ఫైట్ ఇందుకు నిదర్శనం. అంతటి ఒరిజినల్ యాక్షన్ అప్పటివరకూ చూడని తెలుగు ప్రేక్షకులు చిరంజీవి ఫెరోషియస్ స్పీడ్ కు మంత్రముగ్దులైపోయారు. రియల్ స్టంట్స్ తెరపై అంతటి యాక్షన్ చూసి ఫిదా అయిపోయారు. అప్పటినుంచి చిరంజీవి నుంచి ఏ సినిమా వచ్చినా ఇందులో ఎంత స్టయిలిష్ గా ఫైట్స్ చేశారా? అని ప్రేక్షకులు ఎదురుచూడటం.. వారి అంచనాలకు తగ్గట్టే చిరంజీవి సరికొత్త ఫైట్స్ తో అలరించడం జరిగింది.
ఫైటర్ విజయరామరాజు.. ‘మొత్తం ఇండియాలోనే ఫైట్స్ పై అంత శ్రద్ధ పెట్టిన హీరోని నేను చూడలేదు. ఫైట్ అంటే నిప్పులా ఉంటాడాయన. అప్పట్లో తెల్లవారుఝాము చిరంజీవిగారి ఇంటివైపు వెళ్తే ఫైట్స్ కోసం ఆయన చేసే కసరత్తులు వినిపించేవి. అంతటి డెడికేషన్ మరెవరికీ లేవ’ని ఆయన మాట. అందుకు తగ్గట్టే నేటికీ ఏ తెలుగు హీరో చేయని విధంగా చిరంజీవి మాత్రమే చేసే ఫ్లిప్ ఇందుకు నిదర్శనం.
నేలపై పడుకుని గాల్లోకి ఎగిరి నిలబడే ఫ్లిప్ మరే హీరో చేయలేదు. యాక్షన్ లో కూడా జుట్టు నలగడం, షర్టు చిరగడం, మొహంపై గాయాలు, రక్తం.. ఇలా ఫైట్స్ అంటే ఒరిజినాలిటీ తీసుకొచ్చి తన కష్టంతో సరికొత్త విప్లవమే తీసుకొచ్చారు చిరంజీవి. ఇండస్ట్రీలో ట్రెండ్ సెట్టర్ గా నిలిచారు.
