Chiranjeevi: ఎంత ఎదిగినా ఒదిగి ఉంటారు కొందరు.. జీవితంలో తాము ఎదుర్కొన్న పరిస్థితులు మరొకరు చూడొద్దు అనుకుంటారు మరికొందరు.. సంపాదనలో కొంత ఇతరులకు సాయం చేయాలనే మనస్తత్వం కొందరిది.. తమతోపాటే ప్రయాణించిన వారు అవసరాల్లో ఉంటే ఆదుకుంటారు మరికొందరు.. ఉన్నత స్థానానికి వెళ్లినా మూలాల్ని మరువని వారు ఇంకొందరు. వారిలో చిరంజీవి ప్రధమ వరుసలో ఉంటారు. సాధారణంగా మొదలై.. మహోన్నత స్థితికి వెళ్లారు సినీ రంగంలో. మధ్యతరగతి మనస్తత్వాలు, జీవితాలు చాలా దగ్గరగా బాల్యంలోనే చూసిన చిరంజీవి ఆ మూలాల్ని మరువలేదు. కుటుంబాన్ని పైకీ తీసుకొచ్చారు. తన చుట్టూ ఉన్నవారిని ఆదుకున్నారు. ఫ్యాన్స్ అభిమానాన్ని సేవా మార్గం వైపు మళ్లించారు. వ్యక్తిగతంగా ఎన్నో సేవా కార్యక్రమాలు చేపట్టారు.. నిరంతరంగా కొనసాగిస్తున్నారు.
తనతో ఫిల్మ్ కోర్స్ చేసిన స్నేహితులకు సినిమా చేశారు. ఆర్ధికంగా నిలబెట్టారు. అప్పటికి ఎన్నో చిన్న సినిమాలకు సంగీతం అందించిన అప్పటి యువ ద్వయం రాజ్-కోటికి అవకాశం ఇచ్చి.. ఒక్క సినిమాతోనే వారు టాప్ పొజిషన్ కు వెళ్లేలా ప్రోత్సహించారు. తెలుగు సినిమా కామెడీకి వన్నెలద్దిన బ్రహ్మానందం టాలెంట్ ను బాగా ప్రోత్సహించారు. తన హాస్యాన్ని తొలినాళ్లలోనే చిరంజీవి ఎక్కువగా ఇష్టపడేవారని బ్రహ్మానందం ఎన్నో సందర్బాల్లో చెప్పుకొచ్చారు. తోటి ఇనిస్టిట్యూట్ విద్యార్ధి, ప్రముఖ నటుడు నాజర్ కు సైతం కెరీర్ తొలినాళ్లలో చిరంజీవి ప్రోత్సాహం అందించేవారు. తమిళ నటుడు పొన్నాంబళంకు రూ.40లక్షల వ్యయం అయ్యే వైద్య చికిత్స అందించి ఆయనకు ఊపిరి పోశారు.
ప్రత్యక్షంగా ఎందరిని ఆదరించారో.. పరోక్షంగా అందరిపై ప్రభావం చూపారు చిరంజీవి. నటుడిగానే కాకుండా సేవా మార్గంలోనూ తనదైన ప్రత్యేక దారిలోనే వెళ్లారు. దేశంలో మరే హీరో చేయని విధంగా అభిమానులనే సేవా మార్గంలో నడిచేలా చేశారు. దశాబ్దాలుగా అభిమానులు ఆయన బాటలోనే నడుస్తూండటం విశేషం. ఎందరో అభిమానులను ఆర్ధికంగా కూడా ఆదుకున్నారు. శుభకార్యాలకైనా.. వైద్య ఖర్చులకైనా అభిమానులను తనవారిగానే చూడటం చిరంజీవి నైజం. మధ్యతరగతి నుంచి వచ్చిన వ్యక్తిగా మూలాల్ని మరువక.. తన ఆలోచనలను అలానే ఉంచుకోవడం చిరంజీవి స్థితప్రజ్ఞతకు నిదర్శనం. అందుకు హీరోగానే కాదు.. ఆయన వ్యక్తిత్వానికీ అభిమానం దక్కింది.