‘కరోనా’ కక్కుర్తిలో చైనాకి సాటెవ్వరు.?

కరోనా తొలుత వెలుగు చూసింది చైనాలో. అందుకే దీన్ని కరోనా వైరస్‌ (కోవిడ్‌ 19) అనడం కంటే, చైనా వైరస్‌ అనడం సబబు అని ప్రపంచ దేశాలు అభిప్రాయపడుతున్నాయి. చైనాలో సుమారు 80 వేల కరోనా వైరస్‌ పాజిటివ్‌ కేసులు వెలుగు చూస్తే, సుమారు 3 వేల మంది ప్రాణాలు కోల్పోయారు.

ప్రస్తుతం చైనా, కరోనా నుంచి కోలుకుంది. ఈ క్రమంలో చైనా పెద్ద సాహసమే చేసిందని చెప్పాలి. కానీ, అదే చైనా.. ప్రపంచానికి కరోనా వైరస్‌ని అంటించేయడాన్ని చరిత్ర క్షమించదు. ఎందుకంటే, చైనా కారణంగానే ఇప్పుడు ప్రపంచం కరోనా వైరస్‌ బారిన పడింది.

అగ్ర రాజ్యం అమెరికా శవాల దిబ్బగా మారబోతోందా.? అన్నట్లుగా అక్కడ కరోనా పాజిటివ్‌ కేసులు, కరోనా మరణాలు కన్పిస్తున్నాయి. ఇంతా చేసి, ఇప్పుడు తీరిగ్గా ‘మాస్క్‌లు’ అమ్ముకోవడంలో చైనా చాలా బిజీగా వుంది. గత కొద్ది రోజుల్లో చైనా తన ఉత్పాదక సామర్థ్యాన్ని గణనీయంగా పెంచేసింది. మాస్క్‌లు మాత్రమే కాదు, వెంటిలేటర్లు సహా.. కరోనా వైరస్‌ ట్రీట్‌మెంట్‌లో అవసరమయ్యే ముఖ్యమైన ‘మెడికల్‌’ ఐటవ్స్‌ు అన్నీ తయారు చేసి, ప్రపంచ దేశాలకు విక్రయిస్తోంది.

కరోనా దెబ్బకి చైనాలో ఆర్థిక పరిస్థితి కొంత అతలాకుతలమైన మాట వాస్తవం. కేవలం కొద్ది వారాల్లోనే ఆ సంక్షోభం నుంచి చైనా బయటపడి, ఆర్థికంగా అనూహ్యమైన ఉన్నత స్థానానికి చైనా చేరుతుందని అంచనా వేస్తున్నారు. చూస్తోంటే, ఇదంతా పక్కా ‘ప్లానింగ్‌’ అనే అనుమానాలు కలగకమానవు. కానీ, చైనా మాత్రం తామిప్పుడు ప్రపంచాన్ని ఉద్ధరించేస్తున్నామని చెప్పుకుంటోంది.

కొద్ది రోజుల క్రితం చైనా, కరోనా దెబ్బకు విలవిల్లాడుతోంటే, ప్రపంచ దేశాలన్నీ తలో చెయ్యి వేసి చైనాని ఆదుకున్నాయి. కానీ, కరోనా వైరస్‌ని పుట్టించిన చైనా, ఇప్పుడు ప్రపంచ దేశాలతో వ్యాపారం చేస్తోంది.