జగన్ కు పాలన చేతకాదు.. ప్రజలిచ్చిన ఒక్క చాన్స్ అయిపోయింది: చంద్రబాబు

ఏపీ చరిత్ర టీడీపీ రాకముందు.. వచ్చిన తర్వాత అని చదువుకోవాలని.. టీడీపీ కేవలం రాజకీయ పార్టీ మాత్రమే కాదని.. సేవా భావం ఉన్న పార్టీ అని టీడీపీ అధినేత చంద్రబాబునాయుడు అన్నారు. ఒంగోలులో జరుగుతున్న మహానాడులో ఆయన ప్రారంభోపన్యాసం చేశారు. ఈ సందర్భంగా ఆయన మాట్లాడుతూ.. ‘40 ఏళ్లలో పార్టీకి ఎదురైన ఇబ్బందులు ఒకెత్తయితే.. ఈ మూడేళ్లలో ఎదురైన ఇబ్బందులు ఒకెత్తు. చేతగాని దద్దమ్మ పాలనలో రాష్ట్రం అప్రతిష్టపాలైంది. జగన్ కు అభివృద్ధి చేయడం చేతకాదు. పోలీసులను అడ్డుపెట్టకుని పరిపాలన చేస్తున్నారు. అడిగితే కేసులు పెడుతున్నారు. మీరెంతగా రెచ్చగొడితే టీడీపీ కార్యకర్తలు అంతగా రెచ్చిపోతారు’.

‘అమ్మఒడి తీసుకొచ్చి.. నాన్న బుడ్డి కూడా తీసుకొచ్చారు. పోలవరం, ప్రత్యేకహోదా, విభజన హామీలేమయ్యాయి. 30లక్షల ఇళ్లని చెప్పిన కట్టింది మూడే ఇళ్లు. విదేశీ విద్య, పెళ్లి కానుక పథకాలేమయ్యాయి. మోటార్లు పెట్టడం వల్ల భవిష్యత్తులో ఇబ్బందులు వస్తాయి. రైతులకు మంచి రోజులు వస్తాయి. మేము అండగా ఉంటాం. మద్యపాన నిషేధం అని.. నాసిరకం బ్రాండ్లతో దండుకుంటున్నారు. మద్యం, గంజాయి, డ్రగ్స్ తో నేరాంధ్రప్రదేశ్ అయిపోయింది. ఇసుక దొరక్క నిర్మాణరంగం కుదేలైంది’.

‘సామాజిక న్యాయం అంటూ రాజ్యసభ సీట్లు ఎవరికి ఇచ్చారు..? ఎస్సీ వ్యక్తిని సొంత ఎమ్మెల్సీ బయటకు తీసుకెళ్లి హత్య చేసి.. కారులోనే ఇంటికి తీసుకొచ్చారు. దీనిని కప్పిపుచ్చేందుకు కోనసీమలో విధ్వంసం సృష్టించి ప్రజల దృష్టి మరల్చే ప్రయత్నం చేశారు. మంత్రి ఇంటిపై దాడి చేసినా అడ్డుకోకపోవడానికి కారణం ఏంటి..? గడపగడపకూ మన ప్రభుత్వం కార్యక్రమానికి స్పందన లేకపోవడంతో మంత్రుల బస్సు యాత్ర చేపట్టారు’.

‘ప్రజలన్నీ గమనిస్తున్నారు. వైసీపీ పాలనకు చరమగీతం పాడేందుకు సిద్ధంగా ఉన్నారు. కరెంట్ తీగే కదా.. ఓసారి పట్టుకుందామంటే ఏమవుతుంది..? ఏపీ పరిస్థితి అలానే అయింది. ఒక్క చాన్స్ అని తీసుకున్న చాన్స్ వైసీపీకి అయిపోయింది. నాకు సీఎం పదవి కొత్త కాదు. రాష్ట్రం ఎటూకాకుండా పోయిందనే బాధ.. ఆపదలో ఉన్న ప్రజలను కాపాడాలనే బాధ్యత ఉంది’ అని అన్నారు.