తెనాలిలో పలు కార్యక్రమాలు ముగించుకుని, రేవేంద్రపాడు మార్గం ద్వారా ప్రయాణిస్తున్న కేంద్ర సహాయ మంత్రి డాక్టర్ చంద్రశేఖర్ పెమ్మసాని గారు, మార్గమధ్యంలో ఒక హృదయవిదారక ఘటనను గమనించారు. ఒక లారీ ఢీకొనడంతో తీవ్ర గాయాలపాలైన వృద్ధుడు రోడ్డుపక్కన రక్తస్రావంతో పడిఉండటం ఆయన దృష్టికి వచ్చింది.
ఈ దృశ్యం చూసిన మంత్రి గారు క్షణం ఆలస్యం చేయకుండా తన కాన్వాయ్ను ఆపమని ఆదేశించారు. వెంటనే వాహనం నుంచి దిగి, ప్రమాద స్థలానికి వెళ్లి గాయపడిన వృద్ధుడి పరిస్థితిని పరిశీలించారు. అక్కడ ఉన్నవారితో మాట్లాడి, సంఘటన ఎలా జరిగిందో తెలుసుకున్నారు.
ఆ వృద్ధుడిని వెంటనే వైద్యం అందించేందుకు తన సొంత వాహనంలో ఆసుపత్రికి తరలించేలా ఏర్పాట్లు చేశారు. అంతేకాకుండా, ఆసుపత్రి చేరిన తర్వాత వైద్యులతో స్వయంగా ఫోన్లో మాట్లాడి, అతనికి తక్షణమే అవసరమైన చికిత్స అందించాలని సూచించారు.
డాక్టర్ చంద్రశేఖర్ పెమ్మసాని గారి ఈ చర్యను చూసి, అక్కడున్న ప్రజలు ఆయన మానవత్వాన్ని ప్రశంసించారు. సాధారణంగా రాజకీయ నాయకులు కాన్వాయ్ ఆపి సహాయం చేయడం అరుదు, కానీ మంత్రి గారి ఈ తక్షణ స్పందన ప్రజల మనసులను గెలుచుకుంది.