చేతులెత్తేసిన కేంద్రం: కోవిడ్ మృతులకు పరిహారమివ్వలేరట.!

కరోనా వల్ల తల్లిదండ్రుల్ని కోల్పోయిన చిన్నారులకు పది లక్షల రూపాయలదాకా సహాయమందించేందుకు కొన్ని రాష్ట్రాల్లో ప్రభుత్వాలు ముందుకొచ్చాయి.. కేంద్రం కూడా ఆ దిశగా కొన్ని కార్యక్రమాలు చేపడుతోంది. మరి, కోవిడ్ కారణంగా మృతి చెందినవారి కుటుంబాలకు పరిహారం ఎందుకు కేంద్రం ఇవ్వలేదు.? ఒక్కో కుటుంబానికీ 4 లక్షల రూపాయల చొప్పున పరిహారమివ్వాలనే డిమాండ్ వినిపిస్తోంది. ఆ మేరకు న్యాయస్థానాల్లో పిటిషన్లు కూడా దాఖలయ్యాయి.

ఈ వ్యవహారంపై కేంద్రం స్పందించింది. పరిహారం ఇవ్వలేమంటూ చేతులెత్తేసింది.. న్యాయస్థానానికి ఇదే విషయాన్ని కేంద్రం తెలియజేసింది. ప్రభుత్వాల నిర్వాకం ఇంత గొప్పగా తగలడింది మరి. దేశ ప్రజలందరికీ వ్యాక్సిన్ ఇవ్వలేని అసమర్థత కేంద్ర ప్రభుత్వానిది. రోజులు గడుస్తున్నాయ్.. నెలలు గడుస్తున్నాయ్.. వ్యాక్సిన్ మాత్రం, అందరికీ అందుబాటులోకి రావడంలేదు. సరే, 130 కోట్ల మంది ప్రజానీకానికి ఒకేసారి వ్యాక్సిన్ అంటే సాధ్యమైన పని కాకపోవచ్చు. కానీ, వ్యాక్సిన్ ఉత్సవాలను చేపట్టేందుకు కేంద్రం ముహూర్తాలు ఖరారు చేసేసి, ఉత్సవాలు నిర్వహించేసినప్పుడు.. వ్యాక్సిన్ విషయమై ప్రభుత్వాల అసమర్థతను ప్రజలు ప్రశ్నించకుండా వుంటారా.?

కరోనా చికిత్స పేరు చెప్పి ప్రైవేటు ఆసుపత్రులు జనాన్ని నిలువునా దోచేస్తే, ఆ ఆసుపత్రులపై చర్యలు తీసుకోలేని అసమర్థత మన ప్రభుత్వాలది. ఈ అసమర్థత విషయంలో కేంద్ర, రాష్ట్ర ప్రభుత్వాలు ఒకదానితో ఒకటి పోటీ పడ్డాయి. వైద్య చికిత్స సంగతి దేవుడెరుగు.. అంత్యక్రియల నిర్వహణలోనూ ప్రజలు నానా తంటాలూ పడాల్సి వచ్చిందంటే.. ప్రభుత్వాలు ప్రజలకు ఏం సాయం చేసినట్టు.? ఈ దేశంలో బతకడానికి సరైన దారి లేదు.. చచ్చాక కూడా గౌరవం లేదా.? అన్న ఆవేదన సగటు భారతీయుడిలో వ్యక్తమయ్యింది.

నిజానికి కరోనా పాపం.. కేంద్ర, రాష్ట్ర ప్రభుత్వాలదే. నిర్లజ్జగా అధికారంలో వున్న పార్టీలు, కరోనా వేళ రాజకీయ కార్యక్రమాలు నిర్వహించాయి.. ప్రజలకి కరోనా అంటించాయి. ఈ లెక్కన.. అయితే ప్రభుత్వాలు ప్రజలకు నష్టపరిహారమివ్వాలి.. లేదంటే, అధికారాన్ని నడుపుతున్న పార్టీల నుంచి ఆ పరిహారాన్ని రాబట్టాలి. కానీ, ఇలాంటి పద్ధతుల్ని మన ఘన ప్రజాస్వామ్య భారతం నుంచి ఆశించగలమా.? ఇక్కడెప్పుడో బాధ్యత కాలగర్బంలో కలిసిపోయింది మరి.