సీబీఐ దత్త పుత్రుడికి పదేళ్ళు.! ట్రెండింగ్‌లో హ్యాష్ ట్యాగ్.!

సరిగ్గా పదేళ్ళ క్రితం సీబీఐ, అక్రమాస్తుల కేసులో వైఎస్ జగన్ మోహన్ రెడ్డిని అరెస్ట్ చేసింది. దాదాపు 16 నెలలు ఆయన జైల్లో వున్నారు. వైఎస్ జగన్ మోహన్ రెడ్డితో పాటు పలువురు రాజకీయ నాయకులు, ఐఏఎస్ అధికారులు కూడా అప్పట్లో ఈ కేసుల్లోనే అరెస్టయి జైలుకు వెళ్ళారు. అలా జైలుకు వెళ్ళివచ్చినవారిలో చాలామంది ఈ రోజు వైఎస్ జగన్ మోహన్ రెడ్డి వెంట వున్నారు. వారిలో చాలామందికి కీలక పదవులు, పోస్టింగులు కూడా లభించాయ్.!

వైఎస్ జగన్ మోహన్ రెడ్డి స్థాపించిన వైఎస్సార్ కాంగ్రెస్ పార్టీలో చేరాలంటే, కనీసం ఆర్నెళ్ళయినా జైలు శిక్ష అనుభవించాల్సిందే.. అంటూ అప్పట్లో ఎగతాళి చేసిన నాయకులు, ఆ తర్వాత వైసీపీలో చేరి, మంత్రులయిన సందర్భాలూ లేకపోలేదు. ఇదీ నేటి రాజకీయం.! ప్రజల కోసం జైలుకెళ్ళి, ప్రజా పోరాటాలతో జైలు గోడల నడుమ మగ్గి నాయకులుగా చరిత్రలో తమ పేర్లను సువర్ణాక్షరాలతో లిఖించుకున్నారు కొందరు. అది గతం. నేటి రాజకీయం లెక్క వేరు. నేర చరితులైతేనే రాజకీయాల్లో రాణిస్తారనడానికి చాలా ఉదాహరణలు కనిపిస్తున్నాయ్.

మొన్నామధ్య టీడీపీ జాతీయ ప్రధాన కార్యదర్శి నారా లోకేష్ మాట్లాడుతూ, ‘డజనుకు తక్కువ కాకుండా క్రిమినల్ కేసులు వుంటేనే, మీరు సరిగ్గా పని చేస్తున్నట్లు..’ అంటూ పార్టీ నాయకులకు ‘చక్కటి సందేశం’ పంపారు. బహుశా, వైసీపీని చూసి టీడీపీ స్ఫూర్తి పొందాలనుకుంటున్నట్టుంది.

టీడీపీ – వైసీపీ మధ్య పంచాయితీ వ్యవహారాన్ని పక్కన పెడితే, ‘సీబీఎన్ దత్త పుత్రుడు పవన్ కళ్యాణ్..’ అంటూ జనసేన పార్టీ అధినేత మీద వైసీపీ అధినేత వైఎస్ జగన్ చేస్తున్న రాజకీయ విమర్శలకు ‘సీబీఐ దత్త పుత్రుడు వైఎస్ జగన్’ అంటూ జనసేన పార్టీ కౌంటర్ ఎటాక్ చేస్తోన్న సంగతి తెలిసిందే.

ఈ నేపథ్యంలోనే, ‘సీబీఐ దత్త పుత్రుడు జగన్’ అనే హ్యాష్ ట్యాగ్‌ని ట్రెండింగ్‌లోకి తెచ్చారు జనసైనికులు. సీబీఐ దత్త పుత్రుడికి పదేళ్ళు.. అంటూ, పదేళ్ళ క్రితం జగన్ అరెస్టయిన విషయాన్ని పేర్కొంటున్నారు. వివిధ పత్రిలకల్లో వచ్చిన కార్టూన్లు, అప్పట్లో జగన్ మీద విమర్శలు చేసిన ప్రస్తుత వైసీపీ నేతల తీరు.. వీటన్నిటినీ జనసైనికులు ప్రస్తావిస్తున్నారు.