బోయపాటి ఆ విషయంలో వెనక్కి తగ్గినట్లేనా?

బోయపాటి శ్రీను గతేడాది వినయ విధేయ రామ చిత్రంతో దారుణమైన ప్లాప్ ను అందుకున్నాడు. ఈ సినిమా ప్లాప్ అవ్వడమే కాకుండా తనపై ఎన్నో విమర్శలను కూడా తీసుకొచ్చింది. ఈ సినిమాలో చూపించిన కొన్ని సీన్లు తర్వాత ట్రోల్ చేసే వాళ్లకు బాగా ఉపయోగపడ్డాయి. ఈ నేపథ్యంలో బోయపాటి శ్రీను కచ్చితంగా సూపర్ హిట్ కొట్టాలని అనుకుంటున్నాడు. దీనికి నందమూరి బాలకృష్ణ సినిమానే సరైనదిగా భావిస్తున్నాడు. మరోవైపు బాలయ్య కూడా వరస ప్లాపులతో సతమతమవుతున్నాడు. సో ఇద్దరికీ ఈ సినిమాతో సూపర్ హిట్ కొట్టడమన్నది అనివార్యం.

బాలయ్య – బోయపాటి కాంబినేషన్ లో స్టోరీ సిద్ధమై సెట్స్ పైకి కూడా వెళ్ళింది. అయితే కరోనా వైరస్ కారణంగా ఒక షెడ్యూల్ పూర్తైన కొద్ది రోజులకే షూటింగ్ ను వాయిదా వేయాల్సి వచ్చింది. ఈ చిత్రంలో బాలకృష్ణ రెండు పాత్రల్లో కనిపించనున్నాడని ముందు నుండీ వినిపిస్తోంది. ఒకటి పవర్ఫుల్ ఫ్యాక్షన్ లీడర్ పాత్ర కాగా మరొకటి అఘోరా పాత్ర. ఈ సినిమా సెకండ్ హాఫ్ లో చాలా భాగం బాలయ్య అఘోర గెటప్ లో కనిపిస్తాడని, దానికి డైలాగులు కూడా ఉండవని రకరకాల ఊహాగానాలు వినిపించాయి. అయితే దీనిపై బాలయ్య అభిమానులు తీవ్రంగా ఆందోళన చెందారు. అసలే అఘోరా పాత్ర ఎలా ఉంటుందో తెలీదు దానికి తోడు ఈ రూమర్లు రావడంతో బాలకృష్ణ అభిమానులు సోషల్ మీడియాలో గొడవ చేయడం మొదలుపెట్టారు.

ఈ ఫీడ్ బ్యాక్ ను పరిగణలోకి తీసుకున్న బోయపాటి శ్రీను ఇప్పుడు ఖాళీ టైమ్ దొరికింది కాబట్టి మార్పులు చేర్పులు చేద్దామని చూస్తున్నాడట. అందుకే సెకండ్ హాఫ్ లో వచ్చే అఘోరా పాత్రను వీలైనంత మేరకు తగ్గించాలని డిసైడ్ చేసినట్లు తెలుస్తోంది. ఇది అభిమానులకు కొంత మేర రిలీఫ్ ఇచ్చేదే.