బీజేపీనా.? వైసీపీనా? జెడి లక్ష్మినారాయణ చేరేది ఏ పార్టీలో.?

అసలు పేరు వివి లక్ష్మినారాయణ అయినా, సీబీఐ జేడీగా పనిచేసినందున ఆ ‘జెడి’ అలా ఇంటి పేరులా మారిపోయిందాయనకి. 2019 ఎన్నికల్లో జనసేన పార్టీ తరఫున విశాఖపట్నం నుంచి లోక్‌సభకు పోటీ చేసి ఓడిపోయిన లక్ష్మినారాయణ, ఎక్కువ కాలం జనసేన పార్టీలో వుండలేకపోయారు. ‘ఫుల్‌ టైమ్ పాలిటిక్స్‌ చేయాలనుకున్నాను.. కానీ, అక్కడ కుదరలేదు..’ అంటూ జనసేన నుంచి బయటకు రావడానికి ‘కారణాన్ని’ తనదైన స్టయిల్లో వెతుక్కున లక్ష్మినారాయణ, ప్రస్తుతం ఏ పార్టీలోనూ లేకపోయినా, ప్రజలకు దగ్గరగానే వున్నానని చెబుతుండడం గమనార్హం.

ప్రధాని నరేంద్ర మోడీ, ప్రపంచ పటంలో భారతదేశానికి ప్రత్యేక స్థానం కల్పించారన్నది లక్ష్మినారాయణ అభిప్రాయం. మరోపక్క, కరోనా వైరస్‌ వేళ రాష్ట్ర ప్రభుత్వం (వైఎస్‌ జగన్‌ ప్రభుత్వం)తో అన్ని రాజకీయ పార్టీలూ కలిసి పనిచేయాలని పిలుపునిస్తున్నారు. అదే సమయంలో విపక్షాలు ఇచ్చిన సూచనలు, సలహాల్ని ప్రభుత్వం స్వీకరించాలి తప్ప, ఎదురుదాడి చేయకూడదని చెబుతున్నారు.

ఇంతకీ, లక్ష్మినారాయణ ఏ పార్టీలో చేరబోతున్నారు.? ఈ ప్రశ్నకు ఆయన సమాధానమిస్తూ, ‘నాకంటూ ఖచ్చితమైన అభిప్రాయాలు, కార్యాచరణ వున్నాయి. సమయం వచ్చినప్పుడు అన్ని వివరాలూ చెబుతాను..’ అని అన్నారు. బీజేపీలో చేరతారా.? వైసీపీలో చేరతారా.? అన్న ప్రశ్నలకు ఆయన స్పష్టమైన సమాధానమివ్వలేదు.

అయితే, 2024లో వైఎస్సార్సీపీ నుంచి విశాఖ లోక్‌సభ బరిలోకి ఆయన దిగడం ఖాయమన్న చర్చ రాజకీయ వర్గాల్లో జరుగుతోంది. ‘నేను విశాఖ నుంచే పోటీ చేస్తాను.. ఏ పార్టీ అన్నది ముందు ముందు మీకే తెలుస్తుంది.. అది నాకు హోమ్ గ్రౌండ్‌ లాంటిది. అక్కడ నాకు అడ్వాంటేజ్‌ వుండడం సహజమే కదా..’ అని తనదైన శౖలిలో చెప్పుకొచ్చారు జేడీ లక్ష్మినారాయణ.

ఇదిలా వుంటే, బీజేపీ నుంచి జెడి లక్ష్మినారాయణకు గతంలోనే ‘ఆఫర్‌’ వచ్చిందంటూ ప్రచారం జరుగుతున్న విషయం విదితమే. అప్పట్లో బీజేపీ తరఫున ఆయన ముఖ్యమంత్రి అభ్యర్థి అవుతారనే వార్తలూ వచ్చాయి. ఓ దశలో ఆయన టీడీపీ వైపు వెళ్ళొచ్చని కూడా గుసగుసలు విన్పించాయి.

ఇంతకీ, జేడీ లక్ష్మినారాయణ రాజకీయ ఆలోచనలు ఎటువైపుగా సాగుతున్నట్లు.? ఏమో, చివరి నిమిషంలో అందరికీ షాకిచ్చే నిర్ణయాలు తీసుకోవడం ఆయనకు కొత్తేమీ కాదు. కానీ, చూస్తోంటే బీజేపీ వైపే ఆయన ఎక్కువ ఆసక్తి చూపుతున్నట్లు కన్పిస్తోంది.