గ్రామ వాలంటీర్లపై వైకాపా నేత సంచలన ఆరోపణలు.. డబ్బులు వసూలు చేసి..!!

జగన్ అధికారంలోకి వచ్చిన తరువాత నాలుగు లక్షల జాబులు ఇస్తున్నట్టుగా ప్రకటించారు. అవి ఏం ఉద్యోగాల్లో అనుకుంటే గ్రామ వాలంటీర్ ఉద్యోగాలు అని చెప్పి షాక్ ఇచ్చారు. సరే ఉద్యోగాలు లేక ఖాళీగా ఉండటం ఎందుకు అని చెప్పి చాలామంది యువత ఆ ఉద్యోగాల్లో చేరిపోయారు. ఉద్యోగాల్లో చేరిన కొంతమంది మొదట్లోనే బయటకు వచ్చేశారు. కారణం టార్చర్. గ్రామ వాలంటీర్లను అధికారులు టార్చర్ పెడుతున్నారని, సరైన సమాచారం, అవగాహన కల్పించకుండా ఒత్తిడి తీసుకురావడం మొదలుపెట్టారని అప్పట్లో చాలామంది ఉద్యోగాలకు రాజీనామా చేసి వెళ్లిపోయారు.

ఆ తరువాత గ్రామ వాలంటీర్లపై అనేక ఆరోపణలు వచ్చాయి. అందరూ ఒకేలా ఉండరు కదా. అక్కడక్కడా ఇలాంటివి జరగడం సహజమే అని సర్దుకుపోవడం మొదలుపెట్టారు. గ్రామాల్లో అయినా సరే నెలకు 5వేలరూపాయలు జీతం అంటే సరిపోతుందా చెప్పండి. చాలదు కదా. అందుకే ప్రభుత్వం వీరి జీతాలను రూ. 8000 లకు పెంచాలని అనుకుంటున్నట్టు సమాచారం. ఇదంతా వేరే విషయం.

అసలు మ్యాటర్ ఏమంటే, కర్నూలు జిల్లాలోని మంత్రాలయం పరిధిలో పనిచేసే గ్రామ వాలంటీర్లు లబ్ధిదారుల నుంచి డబ్బులు వసూలు చేస్తున్నారని ఆరోపణలు వస్తున్నాయి. ఇలా వసూలు చేసిన డబ్బులు నేతలకు ఇస్తున్నారని మంత్రాలయం ఎమ్మెల్యే బాలనాగిరెడ్డి అంటున్నారు. ఇందులో ఎంతవరకు నిజం ఉండొచ్చు అన్నది తెలియాల్సి ఉన్నది. గ్రామవాలంటీర్ వ్యవస్థను ఏర్పాటు చేసింది వైకాపా ప్రభుత్వమే. మరి అలాంటప్పుడు ఎలా ఈ వ్యవస్థను ఎలా తప్పుపడుతుంది. గ్రామ వాలంటీర్లు తప్పు చేస్తున్నారు అంటే దానికి బాధ్యులు ఎవరు? ప్రభుత్వమా లేక అధికారులా?