Bala Krishna Birthday specials: బాలకృష్ణను ఇప్పుడు నటసింహం అంటున్నారు కానీ.. 90ల్లో ఆయన్ను యువరత్న అని పిలిచుకునేవారు అభిమానులు. కానీ.. అదే 90ల్లో బాలకృష్ణకు మరో పేరు కూడా ఉంది. అదే బాక్సాఫీస్ బోనాంజా. ఈ బిరుదుకు తగ్గట్టే ఆయనకు బాక్సాఫీస్ హిట్లు కలెక్షన్లు ఉండేవి. మాస్, ఫ్యామిలీ కంటెంట్స్ తో ఆయనకు హిట్లు ఉన్నాయి. అయితే.. బాలకృష్ణలోని అసలైన మాస్ ను బయటకు తీసుకొచ్చింది మాత్రం రాయలసీమ బ్యాక్ డ్రాప్ సినిమాలే. ఈ జోనర్ ను బాలకృష్ణ ఒడిసి పట్టుకున్న తీరు అద్భుతం. ఏకంగా ఆయనే ఫ్యాక్షన్ సినిమాలకు బ్రాండ్ అంబాసిడర్ లా మారిపోయారు. రాయలసీమ ఫ్యాక్షన్ నేపథ్యంలో రెండేళ్ల వ్యవధిలో ఏకంగా రెండు ఇండస్ట్రీ హిట్లు కొట్టి బాలకృష్ణ ఆ జోనర్లో తన పొటెన్షియాలిటీని చూపారు. అవే.. సమరసింహారెడ్డి, నరసింహనాయుడు.
సమరసింహారెడ్డి వీర విహారం..
బాలకృష్ణ కెరీర్లో బిగ్గెస్ట్ రోరింగ్ హిట్స్ లో ఒకటి సమరసింహారెడ్డి. తన కెరీర్లో తనకు నచ్చిన టాప్ 3 సినిమాల్లో ఒకటి కూడా. బాలకృష్ణ మేకోవర్.. రాయలసీమ పౌరుషాన్నే చూపించిందంటే అతిశయోక్తి కాదు. ముఖ్యంగా రైల్వే స్టేషన్ ఫైట్ సీన్, కుటుంబాన్నే హతమార్చిన అనంతర సన్నివేశాలు సినిమాకే హైలైట్. గట్టిగా తొడ కొట్టానంటే.. ఆ సౌండ్ కే చస్తావురా, నీ ఇంటికొచ్చా.. నట్టింటికొచ్చా.. అని బాలకృష్ణ చెప్పిన డైలాగులకు, వీరోచిత నటనకు ఫ్యాన్స్ మురిసారు. పరుచూరి బ్రదర్స్ డైలాగులకు బాలకృష్ణ ప్రాణ ప్రతిష్ట చేశారని చెప్పాలి. బి.గోపాల్ దర్శకత్వం, మణిశర్మ పాటలు, బ్యాక్ గ్రౌండ్ స్కోరింగ్ సినిమాను ఎక్కడా తగ్గనివ్వలేదు. దీంతో బాలకృష్ణ కెరీర్లో ఒక ఇండస్ట్రీ హిట్, ల్యాండ్ మార్క్ మూవీగా నిలిచింది. కలెక్షన్లు, సెంటర్లలో రికార్డులు నెలకొల్పింది.
నరసింహానాయుడు విశ్వరూపం..
సమరసింహారెడ్డితో బాలకృష్ణ సృష్టించిన రికార్డులను మరో రెండేళ్లకే ఆయనే బ్రేక్ చేసుకోవడం విశేషం. ఆ సినిమానే నరసింహానాయుడు. బాలకృష్ణ తన నటనలోని ఫోర్స్ మరోసారి చూపిన సినిమా. కథలో కీలక మలుపులు, హీరో పాత్ర ప్రేక్షకుల్ని కట్టిపడేశాయి. రైల్వే స్టేషన్లో తోబుట్టువుల్ని ట్రైన్ ఎక్కించే ఫైట్, చైల్డ్ సెంటిమెంట్, ఫ్లాష్ బ్యాక్.. బాలకృష్ణకు రెండో ఇండస్ట్రీ హిట్ ఇచ్చాయి. క్లైమాక్స్ లో ఎర్ర శాలువా కప్పుకుని బాలకృష్ణ వస్తుంటే.. ఆ శాలువా కప్పుకునే మా అయ్యను చంపాడు అనే ఎలివేషన్ సినిమాను పీక్స్ కు తీసుకెళ్లిపోయింది. ఈ సినిమాల తర్వాత బాలకృష్ణ చేసిన చెన్నకేశవరెడ్డి కూడా బాలకృష్ణ కెరీర్లో చెప్పుకోదగ్గ హిట్. అనేక సినిమాలు ఇదే జోనర్లో చేసిన బాలకృష్ణ ఫ్యాక్షన్ బ్యాక్ డ్రాప్ సినిమాకు సెల్ఫ్ బికేమ్ బ్రాండ్ అంబాసిడర్ అయ్యారని చెప్పాలి.