మాస్ ప్రేక్షకుల్ని ఆకట్టుకోవాలనేది ప్రతి హీరో కల. కానీ.. అంత తేలికైన విషయం కాదు. చేసే పాత్రలోనే కాదు.. హావభావాల్లో కూడా మాస్ ప్రతిబింబించాలి. అలా మాస్ ప్రేక్షకుల్ని మెప్పించిన హీరోల్లో నందమూరి బాలకృష్ణ ఒకరు. తనదైన బాడీ లాంగ్వేజ్, డైలాగ్స్, హావభావాలతో మాస్ ని మెప్పించారు బాలకృష్ణ. నిజానికి బాలకృష్ణ మాస్ పాత్రలంటే ప్రస్తుతం బోయపాటి శ్రీను దర్శకత్వంలో సినిమాలే స్ఫురణకు వస్తాయి కానీ.. 90వ దశకంలో ఆయన మాస్ సినిమాలతో అలరించారు. అదే వరుసలో తన ఎనర్జటిక్ పెర్మార్మెన్స్ తో అప్పట్లోనే ఆయన పలు హిట్లు అందుకున్నారు. లారీ డ్రైవర్, భలేదొంగ, రౌడీ ఇన్ స్పెక్టర్, ధర్మక్షేత్రం, నిప్పురవ్వ.. ఇలా తనదైన నటనతో మెప్పించారు. ఇవే బాలకృష్ణను మాస్ ప్రేక్షకులకు దగ్గర చేశాయి.
90ల్లోనే మాస్ జపం..
మాస్ సినిమాల్లో బాలకృష్ణ తన మార్కు స్పీడుతో చేసిన ఫైట్లు, డ్యాన్సులు కూడా నందమూరి అభిమానుల్ని విపరీతంగా ఆకట్టుకున్నాయి. నిప్పురవ్వలో బొగ్గు గని ఫైట్ సినిమాకే హైలైట్ గా నిలిచింది. టీమ్ అంతా ఆ ఫైట్ అద్భుతంగా రావడానికి ఎంత కృషి చేశారో బాలకృష్ణ అంతకు రెట్టింపు నిజంగానే గనిలో పోరాడిన ఫీల్ కలిగించారంటే అతిశయోక్తి కాదు. లారీ డ్రైవర్ లో కూడా పాత్రలో నటించి మెప్పించారు. బ్యాటరీ వీకైపోద్ది అనే మ్యానరిజంతో ఆకట్టుకున్నారు. బాలకృష్ణ రోరింగ్ పెర్ఫార్మెన్స్ కు మరో ఉదాహరణ రౌడీ ఇన్ స్పెక్టర్. డైలాగ్స్ చెప్పడంలో, పెర్ఫార్మెన్స్ లో ఇప్పటికీ బాలకృష్ణ ఫ్యాన్స్ కి విందు భోజనం ఈ సినిమా. ఇదే బాలకృష్ణను మాస్ ప్రేక్షకులకు మరింత దగ్గర చేశాయని చెప్పాలి.
మాస్ ప్లస్ క్లాస్..
ఈక్రమంలోనే ఆయన అనేక సినిమాలు మాస్ ఫార్మాట్ లోనే చేశారు. తనకు ఉన్న ఫ్యామిలీ ఆడియన్స్ ను మెప్పిస్తూ మాస్ ని ఆకట్టుకునేలా పలు సినిమాలు చేశారు. బొబ్బిలి సింహం, టాప్ హీరో, మాతోపెట్టుకోకు, యువరత్న రాణా, లక్ష్మీనరసింహ.. ఇలా హిట్లు ఫ్లాపులకు అతీతంగా బాలకృష్ణ సినిమాలు చేశారు. బొబ్బిలి సింహంలో మాస్, ఫ్యామిలీ కంటెంట్ ప్రేక్షకులను విపరీతంగా అలరించింది. మాతోపెట్టుకోకు మిశ్రమ ఫలితం దక్కినా మాస్ పాత్రలో బాలకృష్ణ తన మార్కు చూపించి మెప్పించారు. లక్ష్మీనరసింహ హిట్ తర్వాత వరుసగా మాస్ ఫార్మాట్ లోనే సినిమాలు చేసారు బాలయ్య. దీంతో పరిశ్రమలో బాలకృష్ణ మాస్ ఇమేజ్ కు తన మార్క్ స్టాండర్డ్స్ పెట్టుకుని రాణించారు.