ఆత్మకూరు ఉప ఎన్నికలో గెలిచిన విక్రమ్ రెడ్డి.! అయితే ఏంటి.?

ప్రధాన ప్రతిపక్షం తెలుగుదేశం పార్టీ ఎన్నికల బరిలోకి దిగలేదు. జనసేన పార్టీ కూడా పోటీ చెయ్యలేదు. బీజేపీ మాత్రం బరిలో నిలిచింది. సిట్టింగ్ ఎమ్మెల్యే మృతితో ఆత్మకూరు అసెంబ్లీ నియోజకవర్గ ఉప ఎన్నిక జరిగింది. అధికార వైసీపీ, ఇక్కడ అవలీలగా గెలిచేస్తుందని అందరికీ తెలుసు.

కారణం, మాజీ మంత్రి మేకపాటి గౌతమ్ రెడ్డి వివాద రహితుడు, అజాత శతృవు. గుండె పోటుతో అకాలమరణం చెందారు.. అదీ మంత్రిగా పనిచేస్తున్న సమయంలోనే. ఈ నేపథ్యంలో గౌతమ్ రెడ్డి కుటుంబం పట్ల సానుభూతి వుంటుంది. స్వాయానా గౌతమ్ రెడ్డి సోదరుడు విక్రమ్ రెడ్డి ఎన్నికల బరిలోకి దిగారు. గెలిచారు కూడా.!

‘బంపర్ మెజార్టీతో గెలిచాం.. ఇదీ మా సత్తా..’ అంటోంది వైసీపీ, విక్రమ్ రెడ్డి గెలుపు నేపథ్యంలో. గెలిచి, వైసీపీ అదనంగా సాధించేదేముంది.? ‘మా ప్రభుత్వం అమలు చేస్తున్న సంక్షేమ పథకాలు.. మా ప్రభుత్వం చేస్తున్న అభివృద్ధి.. ఇవే మమ్మల్ని గెలిపించాయి..’ అని వైసీపీ నేతలు చెప్పుకుంటున్నారు.

ఆత్మకూరు నియోజకవర్గంలో జరిగిన ఉప ఎన్నిక కేవలం ‘సానుభూతి’ కోణంలోనే జరిగింది. బీజేపీకి దాదాపు ఇరవై వేల ఓట్లు వచ్చినట్లు తెలుస్తోంది. నిజానికి, బీజేపీకి అన్ని ఓట్లు రావడమంటే అది విశేషమే. కానీ, డిపాజిట్ రాలేదంటూ వైసీపీ ఎగతాళి చేస్తోంది. బీజేపీ – వైసీపీ మధ్య తెరవెనుకాల వున్న అవగాహన గురించి కొత్తగా చెప్పేదేముంది.?

ఏపీ బీజేపీ, వైసీపీ మీద గుస్సా అవుతుటుంది.. ఢిల్లీలో మాత్రం బీజేపీకి, వైసీపీ ‘గులాం గిరీ’ చేస్తుంటుంది. సో, అసలు ఆత్మకూరు ఉప ఎన్నికలో ‘పోటీ’ అన్న మాటకే అర్థం లేదు. బీజేపీ టైమ్ పాస్ చేసింది. వైసీపీ మాత్రం కిందా మీదా పడింది. చాలామంది మంత్రులు ఆత్మకూరులో మోహరించారు. ఓటుకి రెండు వేల రూపాయల దాకా అధికార పార్టీ ఖర్చు చేసింది. నిజానికి, ఇలా డబ్బులు పంచడమంటే, గౌతమ్ రెడ్డిని అవమానించడమే.

అందుకేనేమో, ఆత్మకూరు ఉప ఎన్నికలో ఓటింగ్ శాతం చాలా తక్కువగా నమోదయ్యింది. అయినా, అధికార పార్టీ అహంకారం రెట్టింపయ్యిందే తప్ప తగ్గడంలేదు. తగ్గితే, అది వైసీపీ ఎందుకు అవుతుంది.?