ఆ జీవోకు ఏపీ హైకోర్టు ఓకే.. సర్కారుకు ఊరట.!

ఏపీ హైకోర్టులో ఆ రాష్ట్ర ప్రభుత్వానికి వరుసగా ఎదురుదెబ్బలు తగులుతున్న తరుణంలో ఓ ఊరట కలిగించే తీర్పు వెలువడింది. నిరాధారమైన, తప్పుడు కథనాలు ప్రచురించే లేదా ప్రసారం చేసే మీడియా సంస్థలపై కేసులు పెట్టడానికి వీలుగా తీసుకొచ్చిన జీవోను ఉన్నత న్యాయస్థానం సమర్థించింది. ఏపీ సీఎంగా వైఎస్ జగన్ మోహన్ రెడ్డి అధికారం చేపట్టినప్పటి నుంచి ఈ ఏడాది కాలంలో ఏకంగా 66 కేసుల్లో వ్యతిరేక ఫలితాలే చవిచూశారు. ప్రభుత్వం ప్రతిష్టాత్మకంగా భావించిన పలు విషయాల్లో హైకోర్టులో చుక్కెదురైంది. దీంతో వైసీపీ నేతలు, ఆ పార్టీ కార్యకర్తలు హైకోర్టుపై అసహనం వ్యక్తంచేస్తూ సోషల్ మీడియాలో పోస్టులు కూడా పెట్టారు. వాటిని తీవ్రంగా పరిగణించిన ఉన్నత న్యాయస్థానం.. పలువురికి నోటీసులు కూడా జారీ చేసింది.

ఈ నేపథ్యంలో ప్రభుత్వానికి అనుకూలమైన తీర్పు వెలువడటం వైసీపీ నేతలకు ఊరట కలిగించినట్టయింది. ప్రభుత్వానికి వ్యతిరేకంగా నిరాధారమైన, వాస్తవ విరుద్ధమైన, తప్పుడు కథనాలు ప్రచురించినా.. ప్రసారం చేసినా సదరు మీడియా సంస్థలపై కేసులు పెట్టే అధికారాన్ని ఆయా శాఖల అధిపతులకు కట్టబెడుతూ జగన్ సర్కారు జీవో నెం.2430 జారీచేసిన సంగతి తెలిసిందే. దీంతో జగన్ పై పెద్ద ఎత్తున విమర్శలు వ్యక్తమయ్యాయి. పత్రికా స్వేచ్ఛను అణగదొక్కే చర్య అని ప్రతిపక్షాలు మండిపడ్డాయి. వెంటనే ఈ జోవోను ఉపసంహరించాలని డిమాండ్ చేశాయి. అయినా ప్రభుత్వం ఏమాత్రం పట్టించుకోలేదు.

దీంతో ఈ జీవోను సవాల్ చేస్తూ హైకోర్టులో పిటిషన్ దాఖలైంది. ఈ కేసులు వాదప్రతివాదనలు విన్న ధర్మాసనం.. తాజాగా తీర్పు వెలువరించినట్టు ఏపీ సమాచార, పౌరసంబంధాల శాఖ ఓ ప్రకటనలో వెల్లడించింది. ఆ జీవోను సవాల్ చేస్తూ దాఖలు చేసిన వ్యాజ్యాన్ని న్యాయస్థానం తోసిపుచ్చినట్టు తెలిపింది. అంటే.. ఇకపై ఏ మీడియా సంస్థ అయినా ఇష్టమొచ్చినట్టు కథనాలు ప్రచురించడానికి, ప్రసారం చేయడానికి కుదరదన్న మాట. ఆధారాల్లేకుండా ఆరోపణలు చేస్తే కేసులు ఎదుర్కోక తప్పదు.