వైసీపీ రాజకీయం: ప్రకటనలు సరే.. పైసలెవరివి.?

కరోనా వైరస్‌ నేపథ్యంలో ఎటు చూసినా ఆర్థిక సంక్షోభమే కన్పిస్తోంది. మీడియా కూడా గట్టిగానే సంక్షోభాన్ని ఎదుర్కొంటోంది. మెయిన్‌ ఎడిషన్స్‌లో పేజీలు తగ్గిపోయాయి. లోకల్‌ ఎడిషన్స్‌ని మొత్తంగా ఎత్తేసి, మెయిన్‌ ఎడిషన్‌లో కలిపేశారు. ప్రకటనలు వచ్చే పరిస్థితే కన్పించడంలేదు. ఇది ఎన్నాళ్ళు కొనసాగుతుంది.? అన్నది ప్రస్తుతానికి సస్పెన్సే. కానీ, అధికార వైఎస్సార్‌ కాంగ్రెస్‌ పార్టీకి చెందిన ‘పత్రిక’కు మాత్రం ప్రకటనలు వచ్చేస్తున్నాయి. ఆ ప్రకటనలు కూడా వైసీపీ ముఖ్య నేతలనుంచీ.. అందునా మంత్రుల నుంచి ప్రకటనలు వచ్చి పడుతున్నాయి. ఇవి అధికారిక ప్రకటనలా.? అనధికారిక ప్రకటనలా.? అన్న సందేహం వ్యక్తమవుతోంది.

ప్రభుత్వ ఖజానా నుంచి సొమ్ములు వెచ్చించి ఈ ప్రకటనలు ఇప్పించుకుంటున్నారా.? అన్న చర్చ సాధారణ ప్రజానీకంలో జరుగుతుండడాన్ని ఎలా తప్పు పట్టగలం.? అయితే, ఎక్కడా ‘అధికారిక ప్రకటన’ అన్న ప్రస్తావన కన్పించడంలేదు. నిజానికి, తెరవెనుక బాగోతాలు చాలానే నడుస్తుంటాయి ఇలాంటి ప్రకటనలకు సంబంధించి. ఇక్కడా అదే జరుగుతోందా.? అంటే, ‘కాదు’ అని ఖచ్చితంగా చెప్పలేని పరిస్థితి. ‘ముఖ్యమంత్రికి అండగా వుందాం’ అనేది ఆ ప్రకటనల సారాంశం.

చిత్రమేంటంటే, కంటెంట్‌ ఒకటే.. ఆ ప్రకటనలు ఇచ్చిన వ్యక్తులే మారుతున్నారు. ఆ ప్రకటనల్లో మెజార్టీ వ్యక్తులు మంత్రులే. అన్నట్టు, ఓ ప్రముఖ జ్యుయెలరీ సంస్థ కూడా ఈ తరహా ప్రకటనే ఇచ్చింది. సదరు జ్యుయెలరీ సంస్థ మీద అధికార పార్టీ నేతల ఒత్తిడి నేపథ్యంలోనే ఈ ప్రకటన వచ్చిందనే గుసగుసలు ఓ పక్క విన్పిస్తుండగా.. అదేమీ లేదు, సదరు సంస్థ స్వచ్చందంగానే ప్రకటన ఇచ్చిందని అధికార పార్టీలో చర్చ జరుగుతోంది.

మరోపక్క, అధికార పార్టీకి చెందిన మీడియా ఛానల్‌లో వస్తున్న ప్రకటనల విషయంలోనూ జరుగుతున్న రచ్చ అంతా ఇంతా కాదు. రాష్ట్రంలో ప్రధాన మీడియాని పరిగణనలోకి తీసుకుంటే, ఒక్క వైసీపీ అనుకూల మీడియా తప్ప, ఇంక దేనికీ ప్రకటనలు పెద్దగా రావడంలేదంటే.. తెరవెనుక ఏదో ‘మతలబు’ జరుగుతోందనే కదా అర్థం.? అన్నది మెజార్టీ అభిప్రాయం.