ఏపీలో తెరపైకి కొత్త ఎస్ఈసీ?

ఏపీలో రాష్ట్ర ఎన్నికల కమిషనర్ నియామక వ్యవహారం కొత్త మలుపులు తిరుగుతోంది. నిమ్మగడ్డ రమేశ్ కుమార్ ను ఎట్టి పరిస్థితుల్లోనూ ఎస్ఈసీగా నియమించకూడదనే రీతిలో రాష్ట్ర ప్రభుత్వం సాగుతోంది. హైకోర్టు తీర్పును సవాల్ చేస్తూ ఇప్పటికే సుప్రీంకోర్టులో పిటిషన్ దాఖలు చేసింది. హైకోర్టు తీర్పులో పలు పాయింట్లు లేవనెత్తి, స్టే ఇవ్వాలని అభ్యర్థించింది.

మరోవైపు సుప్రీంకోర్టు స్టే ఇస్తే.. ఈ కేసు తేలేలోగా కొత్త వ్యక్తిని ఎస్ఈసీగా నియమించాలని భావిస్తున్నట్టు సమాచారం. ఈ మేరకు ప్రత్యేక సీఎస్ కేడర్ లో పదవీ విరమణ చేసిన మన్మోహన్ సింగ్ పేరును పరిశీలిస్తున్నట్టు తెలుస్తోంది. ఈ కేసు తేలవరకు రాజ్యాంగబద్ధమైన పదవి ఖాళీగా ఉంచడం వీలుకాదు కాబట్టి, మధ్యే మార్గంగా కొత్త ఎస్ఈసీని నియమించి ఎన్నికలకు వెళ్లాలని సర్కారు భావిస్తున్నట్టు సమాచారం.

ఎస్ఈసీ వ్యవహారంలో అటు నిమ్మగడ్డ, ఇటు ప్రభుత్వ పెద్దలు పట్టుదలగానే ముందుకెళ్తున్నారు. హైకోర్టు తీర్పు అనుకూలంగా వచ్చిన వెంటనే తాను బాధ్యతలు చేపట్టినట్టు నిమ్మగడ్డ ప్రకటించారు. వెంటనే పలు ఆదేశాలు జారీచేశారు. విజయవాడ నుంచి హైదరాబాద్ కు వాహనాలు పంపించాలని, ఎన్నికల కమిషన్ న్యాయవాదిని రాజీనామా చేయాలని సూచించారు. కోర్టు తీర్పు వచ్చే వరకు కూడా ఆయన వేచి చూడకుండా హడావుడిగా ఆదేశాలిచ్చారు.

అయితే, దీనిపై ఆగ్రహం వ్యక్తంచేసిన ప్రభుత్వం.. అప్పటికప్పుడు ఎన్నికల కమిషన్ కార్యదర్శిని మార్చేసి.. నిమ్మగడ్డ ఇచ్చిన ఉత్తర్వులను నిలుపుదల చేయించింది. దీంతో కంగుతిన్న నిమ్మగడ్డ.. కోర్టు ధిక్కరణ పిటిషన్ వేయడానికి సన్నద్ధమవుతున్నారు. ఈ తరుణంలో సుప్రీం తలుపు తట్టిన ఏపీ సర్కారు.. హైకోర్టు తీర్పుపై స్టే విధించాలని అభ్యర్థించింది. అక్కడ స్టే వస్తే.. తదుపరి కార్యాచరణ వేగంగా జరిగిపోనుంది. వెంటనే ఓ ఆర్డినెన్స్ ద్వారా మన్మోహన్ సింగ్ ను నియమించే అవకాశం ఉంది. ఒకవేళ స్టే రాకుంటే ఏమి చేయాలనే అంశంపైనా సర్కారు ఇప్పటికే తగిన వ్యూహం సిద్ధం చేసుకున్నట్టు సమాచారం.