ఏపీ సర్కారు సంక్రాంతి దోపిడీ: సామాన్యుల్ని ఉద్ధరించడానికే.!

పండగ పేరు చెప్పి ప్రయాణీకుల్ని దోచేయడాన్ని ఏ తరహా ‘జనోద్ధరణ పథకం’ అనుకోవాలి.? సంక్షేమ పథకాల పేరుతో వందల కోట్లు, వేల కోట్లు ఖర్చు పెడుతూ, ఓటు బ్యాంకు రాజకీయాలు చేస్తున్న వైఎస్ జగన్ సర్కారు, విజయదశమి, సంక్రాంతి పండుగల నేపథ్యంలో ప్రత్యేక బస్సుల్లో అదనపు ఛార్జీలు వసూలు చేయకుండా వుంటే ఎంత బావుంటుంది.?

కానీ, అలా చేస్తే ‘కిక్కు’ ఎలా లభిస్తుంది.? పండగొచ్చినప్పుడే ప్రయాణీకుడ్ని దోచుకోవాలన్నట్టుగా ప్రత్యేకంగా ఏర్పాటు చేసే బస్సుల్లో అదనపు ఛార్జీల పేరుతో బాదుడు బాదేస్తోంది. గతంలో చంద్రబాబు హయాంలో కూడా ఇలాగే చేశారు కాబట్టి.. అనే కుంటి సాకు చెబితే కుదరదిక్కడ. ఎందుకంటే, అలా చేసిన చంద్రబాబుని పక్కన కూర్చోబెట్టారు ప్రజలు. చంద్రబాబు ఐదేళ్ళ తర్వాత మూల కూర్చున్నారు గనుక, తానూ ఐదేళ్ళ తర్వాత మూల కూర్చోవాలని జగన్ భావిస్తే.. ఇక, అనడానికేమీ లేదు.

పొరుగు రాష్ట్రం తెలంగాణ కూడా ప్రత్యేక బస్సుల్ని వేస్తోంది సంక్రాంతి పండక్కి. ఆంధ్రప్రదేశ్‌లో అన్ని మూలలకూ దాదాపుగా తెలంగాణ ఆర్టీసీ బస్సులు నడపనుంది సంక్రాంతి పండగ నేపథ్యంలో. ఈ ప్రత్యేక బస్సుల్లో అదనపు ఛార్జీలేమీ వాయించడంలేదు.

చిత్రమేంటంటే, తెలంగాణ ఆర్టీసీ చర్యని, ఏపీఎస్ఆర్టీసీ తప్పుపడుతోంది. ప్రైవేటు బస్సులకు ఊతమిచ్చేలా తెలంగాణ రాష్ట్ర రోడ్డు రవాణా సంస్థ వ్యవహరిస్తోందంటూ ఏపీఎస్ఆర్టీసీ వింత వాదనని తెరపైకి తెచ్చింది. రేట్లు పెంచితే ప్రజలు ప్రైవేటు వాహనాల వైపు చూస్తారా.? కనీసపాటి ఇంగితం లేకుండా అధికార పార్టీ చెప్పినట్టలా అధికారులు ఆడుతున్నారని అనుకోవాలేమో.

పెద్ద సినిమాల విడుదల నేపథ్యంలో టిక్కెట్ల ధర పెంపుని సినీ పరిశ్రమ ఆశిస్తోంటే, ‘సామాన్యుల్ని దోచుకుంటారా.?’ అని నిలదీస్తున్న వైసీపీ ప్రభుత్వ పెద్దలు, పండగ పేరు చెప్పి ఆర్టీసీ ప్రత్యేక ఛార్జీలతో చేస్తున్న దోపిడీపై పెదవి విప్పలేకపోవడం శోచనీయం.