ఆంధ్రప్రదేశ్లో కూటమి ప్రభుత్వం ఏర్పడి 23 నెలలు పూర్తవుతున్న నేపథ్యంలో ప్రభుత్వం సాధించిన “100 విజయాలు” పేరుతో విస్తృత నివేదికను విడుదల చేసింది. సంక్షేమం, సామాజిక భద్రత, వ్యవసాయం, మౌలిక సదుపాయాలు, పెట్టుబడులు, విద్య, వైద్యం, గ్రీన్ ఎనర్జీ, డిజిటల్ గవర్నెన్స్, పరిశ్రమలు, శాంతిభద్రతలు వంటి అనేక రంగాల్లో తీసుకున్న నిర్ణయాలు, అమలు చేసిన పథకాలను ఇందులో ప్రస్తావించారు.
సూపర్ సిక్స్ హామీల అమలుతో ప్రజల్లో విశ్వాసం పెరిగిందని ప్రభుత్వం పేర్కొంది. “తల్లికి వందనం” కింద 67.27 లక్షల మంది విద్యార్థులకు రూ.10,090 కోట్లు చెల్లించగా, మహిళల కోసం “స్త్రీ శక్తి” పథకం ద్వారా ఉచిత ఆర్టీసీ బస్సు ప్రయాణం కల్పించింది. దివ్యాంగులకు “దివ్యాంగ శక్తి” పథకం, దీపం-2 కింద ఉచిత గ్యాస్ సిలిండర్లు, అన్న క్యాంటీన్ల ద్వారా కోట్లాది భోజనాలు అందించినట్లు తెలిపింది.
రైతుల కోసం “అన్నదాత సుఖీభవ” ద్వారా వేల కోట్ల సాయం అందించగా, ఎన్టీఆర్ భరోసా పింఛన్ల కోసం భారీగా నిధులు వెచ్చించినట్లు వెల్లడించింది. ఆటో డ్రైవర్లు, మత్స్యకారులు, అంగన్వాడీ కార్యకర్తలు, ఆశా వర్కర్లు, చేనేత కార్మికులు, పాస్టర్లు, ఇమామ్లు, పురోహితులు, నాయీ బ్రాహ్మణులు వంటి వర్గాలకు ప్రత్యేక సంక్షేమ కార్యక్రమాలు అమలు చేసినట్లు పేర్కొంది.
బీసీ, ఎస్సీ, ఎస్టీ, మైనారిటీల కోసం పలు కీలక నిర్ణయాలు తీసుకున్నట్లు ప్రభుత్వం తెలిపింది. ఎస్సీ వర్గీకరణ అమలు, స్వర్ణకారులకు ప్రత్యేక కార్పొరేషన్, మైనారిటీల సంక్షేమానికి వేల కోట్ల కేటాయింపులు, సోలార్ రూఫ్టాప్ పథకాలు, మహిళా పారిశ్రామికవేత్తలకు ప్రోత్సాహం వంటి అంశాలను ప్రాధాన్యంగా చూపించింది.
ఉద్యోగాల భర్తీ విషయంలో మెగా డీఎస్సీ ద్వారా 15,941 టీచర్ పోస్టుల నియామకం, కానిస్టేబుల్ పోస్టుల భర్తీ, కొత్త జాబ్ క్యాలెండర్ విడుదల, ప్రభుత్వ ఉద్యోగుల బకాయిల చెల్లింపులు వంటి నిర్ణయాలను ప్రభుత్వం విజయాలుగా పేర్కొంది.
అమరావతిని శాశ్వత రాజధానిగా అభివృద్ధి చేస్తూ రహదారులు, హైవేలు, బుల్లెట్ ట్రైన్, పోర్టులు, ఫిషింగ్ హార్బర్లు, భోగాపురం విమానాశ్రయం, రైల్వే ప్రాజెక్టులు, కొత్త జిల్లాల ఏర్పాటు వంటి మౌలిక సదుపాయాల అభివృద్ధిపై ప్రభుత్వం ప్రత్యేక దృష్టి పెట్టినట్లు తెలిపింది.
పరిశ్రమలు, పెట్టుబడుల రంగంలో ఏపీ దేశవ్యాప్తంగా గుర్తింపు తెచ్చుకుందని ప్రభుత్వం పేర్కొంది. CII సమ్మిట్, SIPB సమావేశాల ద్వారా లక్షల కోట్ల పెట్టుబడులు, లక్షల ఉద్యోగ అవకాశాలు వచ్చినట్లు వెల్లడించింది. విశాఖ ఐటీ హబ్గా ఎదుగుతోందని, టీసీఎస్, కాగ్నిజెంట్, గూగుల్ ఏఐ డేటా సెంటర్, రిలయన్స్ డేటా సెంటర్, సెమీకండక్టర్, డిఫెన్స్, గ్రీన్ ఎనర్జీ ప్రాజెక్టులు రాష్ట్రానికి రానున్నాయని వివరించింది.
వ్యవసాయం, నీటి నిర్వహణలో పోలవరం, వెలిగొండ, హంద్రీనీవా, చింతలపూడి వంటి ప్రాజెక్టులకు భారీగా నిధులు ఖర్చు చేస్తున్నట్లు ప్రభుత్వం తెలిపింది. రైతులకు రికార్డు స్థాయిలో ధాన్యం సేకరణ, మార్కెట్ ఇంటర్వెన్షన్ ద్వారా పంటల రక్షణ, సాగునీటి సంఘాల పునరుద్ధరణ వంటి చర్యలు తీసుకున్నట్లు పేర్కొంది.
డిజిటల్ గవర్నెన్స్లో “మన మిత్ర” వాట్సాప్ సేవల ద్వారా 1,035 సేవలు అందుబాటులోకి తెచ్చినట్లు ప్రభుత్వం తెలిపింది. విద్యా, వైద్య రంగాల్లో డిజి హెల్త్ కేర్, యూనివర్సల్ హెల్త్ పాలసీ, మెగా పేరెంట్స్ టీచర్స్ మీటింగ్, ముస్తాబు వంటి కార్యక్రమాలు అమలు చేస్తున్నట్లు వివరించింది.
విద్యుత్ రంగంలో యూనిట్ కాస్ట్ తగ్గింపు, ఈవీలకు ప్రోత్సాహం, 90 గిగావాట్ల గ్రీన్ ఎనర్జీ ప్రాజెక్టుల ఒప్పందాలు జరిగాయని తెలిపింది. శాంతిభద్రతల పరిరక్షణలో క్రైమ్ రేట్ తగ్గిందని, గంజాయి-డ్రగ్స్ నియంత్రణ కోసం ఈగల్ టాస్క్ ఫోర్స్ ఏర్పాటు చేశామని ప్రభుత్వం పేర్కొంది.
కూటమి ప్రభుత్వం విడుదల చేసిన ఈ “23 నెలలు – 100 విజయాలు” నివేదిక ప్రస్తుతం రాజకీయంగా కూడా చర్చనీయాంశంగా మారింది. అభివృద్ధి, సంక్షేమం, పెట్టుబడులు, పరిపాలనలో తీసుకున్న నిర్ణయాలను ప్రజల్లోకి తీసుకెళ్లేందుకు ప్రభుత్వం ఈ నివేదికను ప్రధానంగా ఉపయోగిస్తోంది.