సింగపూర్ పర్యటనలో ఉన్న ఆంధ్రప్రదేశ్ సీఎం చంద్రబాబు నాయుడు, అక్కడ స్థిరపడ్డ తెలుగు ప్రజలతో స్నేహపూర్వకంగా మమేకమయ్యారు. వన్ వరల్డ్ ఇంటర్నేషనల్ స్కూల్ వేదికగా జరిగిన “తెలుగు డయాస్పొరా ఫ్రం సౌత్ ఈస్ట్ ఏషియా” కార్యక్రమంలో ఆయన మాట్లాడారు. మలేషియా, థాయ్లాండ్, ఫిలిప్పీన్స్, ఇండోనేషియా లాంటి దేశాల నుంచి కూడా తెలుగు ప్రజలు హాజరయ్యారు. సభకు వచ్చిన వెంటనే ప్రజల నుంచి హర్షధ్వానాలు రావడం విశేషం.
ఈ సందర్భంగా సీఎం మాట్లాడుతూ, విదేశాల్లో స్థిరపడిన తెలుగువాళ్లు పుట్టిన గడ్డను మరవకూడదని కోరారు. ఎక్కడ ఉన్నా సంపద సృష్టించడమే కాదు, జన్మభూమి అభివృద్ధికి చేయూత ఇవ్వాలన్నారు. పన్నుల రూపంలో ప్రజలే ఇచ్చిన వనరులతో మనం ఎదిగామని గుర్తుచేశారు. కనుక పేదలకు సహాయం చేయడం, రాష్ట్రంలో పెట్టుబడులు పెట్టడం బాధ్యతగా భావించాలని చెప్పారు.
చంద్రబాబు తన సింగపూర్ పర్యటన ఉద్దేశాన్ని వివరించారు. గత ప్రభుత్వ నిర్లక్ష్యం వల్ల సింగపూర్తో వచ్చిన దూరాన్ని తగ్గించేందుకు, మళ్లీ విశ్వసనీయతను సాధించేందుకు తాను వచ్చినట్లు చెప్పారు. అమరావతికి సింగపూర్ రూపొందించిన మాస్టర్ ప్లాన్ను గుర్తుచేశారు. గత ప్రభుత్వం సింగపూర్పై అనవసర ఆరోపణలు చేయడంతో నష్టమైందని, అందుకే తిరిగి బంధాన్ని మెరుగుపరచాలని తాను ప్రయత్నిస్తున్నట్టు చెప్పారు.
ఆంధ్రప్రదేశ్లో అభివృద్ధికి విస్తృత అవకాశాలున్నాయని చెప్పారు. పోర్టులు, ఎయిర్పోర్టులు, గ్రీన్ ఎనర్జీ ప్రాజెక్టులు, లాజిస్టిక్స్ హబ్లుగా అభివృద్ధి సాధ్యమని వివరించారు. పీ4 (పీపుల్ – పబ్లిక్ – ప్రైవేట్ – పార్ట్నర్షిప్) కార్యక్రమానికి సహకరించాలని కోరారు. పీ4 ద్వారా పేదరికం తగ్గించేందుకు ‘నో పావర్టీ మిషన్’ మొదలుపెట్టినట్టు తెలిపారు.
తెలుగు ప్రజలు ఇప్పుడు ఉద్యోగులకు మించి పారిశ్రామికవేత్తలుగా ఎదుగుతున్నారని కొనియాడారు. తమ అనుభవాన్ని, పెట్టుబడులను రాష్ట్ర అభివృద్ధికి ఉపయోగించాలని సూచించారు. ప్రభుత్వం పూర్తిగా సహకరించేందుకు సిద్ధంగా ఉందన్నారు.
తిరుమల వెంకటేశ్వర స్వామి మహిమ గురించి మాట్లాడుతూ, ఆయన ఆశీస్సులతో ఏ సమస్య అయినా పరిష్కారం అవుతుందని విశ్వాసం వ్యక్తం చేశారు. ప్రపంచంలోని ప్రతి రాజధానిలో వెంకన్న ఆలయం ఉండాలనేది తన కోరిక అని చెప్పారు. సింగపూర్ నుంచి ఏపీకి నేరుగా విమాన సర్వీసులు ఏర్పాటు చేయడానికి ప్రయత్నిస్తున్నట్టు తెలిపారు. సింగపూర్ లో తెలుగు భాషను రెండో భాషగా పెట్టాలని భారత హైకమిషనర్ను కోరినట్టు వెల్లడించారు.
మోదీపై తన మద్దతు ప్రకటించిన చంద్రబాబు, ఆయన నాయకత్వం దేశానికి అవసరమన్న అభిప్రాయం వ్యక్తం చేశారు. మోదీ ఓ సమర్థవంతమైన నాయకుడు, భారతదేశానికి అంతర్జాతీయ గుర్తింపు తెచ్చారని అన్నారు. తాను స్వర్ణాంధ్ర కలలతో ముందుకు వెళ్తున్నానని, కేంద్రం వికసిత్ భారత్ లక్ష్యాన్ని మద్దతు ఇస్తున్నట్టు తెలిపారు.
ఈ కార్యక్రమానికి హైకమిషనర్ శిల్పక్ అంబులే, మంత్రులు నారా లోకేష్, నారాయణ, టీజీ భరత్, ఎన్నార్టీ ఛైర్మన్ వేమూరి రవికుమార్ తదితరులు హాజరయ్యారు. కార్యక్రమం చివరికి మంచి ఉత్సాహంతో ముగిసింది.