అంటే సుందరానికీ రివ్యూ: ఫన్ ఫ్యామిలీ డ్రామా

న్యాచురల్ స్టార్ నాని నటించిన లేటెస్ట్ ఫ్యామిలీ డ్రామా అంటే సుందరానికీ. ఈరోజే విడుదలైన ఈ చిత్రం ఎలా ఉందో చూద్దామా.

కథ:

సుందర్ ప్రసాద్ (నాని), లీల థామస్ (నజ్రీయ) చిన్నప్పటి నుండి స్నేహితులు. సుందర్ కు చిన్నతనం నుండే లీల అంటే ఆకర్షణ ఉంటుంది కానీ తన మనసులోనే దాచేసుకుంటాడు. పెద్దయ్యాక ధైర్యం చేసి లీల కు ప్రపోజ్ చేయగానే ఆమె ఒప్పేసుకుంటుంది.

ఇప్పుడు రెండు భిన్నమైన మతాల నుండి వచ్చిన ఈ ఇద్దరూ తమ పెద్దలను పెళ్ళికి ఎలా ఒప్పించారు. వాళ్ళు వేసిన ప్లాన్ వల్ల ఎలాంటి ఇబ్బందులు వచ్చాయి అన్నది మెయిన్ పాయింట్.

నటీనటులు:

నాని ki ఇలాంటి రోల్స్ కొత్త కాదు. అమాయకంగా ఉంటూ అల్లరి చేసే పాత్రలు చాలానే చేసినా ఇందులో కొత్తగా కనిపిస్తాడు. ఈ చిత్రానికి తనదైన శైలిలో పెర్ఫార్మన్స్ ఇచ్చి వెన్నుముకగా నిలిచాడు. అటు కామెడీతో అలరించినా, ఇటు ఎమోషనల్ గా ఆకట్టుకున్నా కూడా నానికే చెల్లింది.

నజ్రీయ ఈ చిత్రంతోనే తెలుగులో డెబ్యూ చేసినా కానీ అదే తన తొలి సినిమాగా ఎక్కడా అనిపించదు. బబ్లీ నటనతో ఆకట్టుకుంది. నానితో ఆమె కెమిస్ట్రీ సూపర్బ్ గా వర్కౌట్ అయింది.

ఇక హీరో హీరోయిన్లకు తల్లిదండ్రులుగా నటించిన నరేష్, రోహిణి, నదియా, పెరుమాల్ లు ఆకట్టుకున్నారు. వీరిలో నరేష్ పాత్ర ప్రత్యేకంగా అనిపిస్తుంది. హర్షవర్ధన్ చాలా కాలం తర్వాత మంచి పాత్రలో ఆకట్టుకున్నాడు.

చిన్న పాత్రలో మెరిసినా అనుపమ మెప్పిస్తుంది. మిగతావారు కూడా పాత్రలకు తగ్గట్లు నటించారు.

సాంకేతిక వర్గం:

వివేక్ సాగర్ అందించిన సంగీతం సినిమాకు ప్రధాన ఆకర్షణగా నిలిచింది. అటు పాటలు కానీ ఇటు బ్యాక్ గ్రౌండ్ మ్యూజిక్ కానీ సినిమాకు బలంగానే నిలిచాయి. సినిమాటోగ్రఫీ చాలా బాగుంది. ఎడిటింగ్ ఇంకా క్రీస్ప్ గా ఉండొచ్చు. ముఖ్యంగా ఫస్ట్ హాఫ్ లో కొన్ని సన్నివేశాలు ఎడిట్ చేసేయొచ్చు. నిర్మాణ విలువులకు డోకా లేదు.

ఇక వివేక్ ఆత్రేయ సింపుల్ కథనే తీసుకుని దానికి తనదైన శైలి నరేషన్ ను జత చేసాడు. ముఖ్యంగా స్క్రీన్ ప్లే పరంగా వివేక్ ఆత్రేయ ఆకట్టుకుంటాడు.

పాజిటివ్ పాయింట్స్:

• స్క్రీన్ ప్లే
• పెర్ఫార్మన్స్
• మ్యూజిక్

నెగటివ్ పాయింట్స్:

• ఫస్ట్ హాఫ్ లో ల్యాగ్ సీన్స్
• రన్ టైం

చివరిగా:

కొన్ని సీన్స్ లో ల్యాగ్ అనిపించినా కానీ మొత్తంగా చూసుకుంటే అంటే సుందరానికీ మెప్పిస్తుంది. ఈ వారంతం హాయిగా ఫ్యామిలీతో కలిసి చూడగలిగే చిత్రమిది.

తెలుగు బులెటిన్ రేటింగ్: 3/5