క్యాంటీన్ వేడి చల్లారుస్తున్నారు

ఆంధ్రప్రదేశ్ లో అన్న క్యాంటీన్ల మూసివేతపై కొనసాగుతున్న రగడను చక్కదిద్దడంపై అధికార వైఎస్సార్ సీపీ దృష్టి సారించింది. ఈ అంశంలో భారీగా డ్యామేజీ జరగడంతో దిద్దుబాట చర్యలు ప్రారంభించింది. త్వరలోనే వైఎస్సార్ క్యాంటీన్ల ను ప్రారంభించనుంది. తొలుత ఆస్పత్రుల్లో వీటిని మొదలుపెట్టి.. నెమ్మదిగా విస్తరించనుంది. అన్న క్యాంటీన్ల మూసివేత విషయంలో జగన్ సర్కారు అనాలోచిత నిర్ణయం తీసుకుంది. ఎంతోమంది పేదలపై ప్రభావం చూపే ఇలాంటి వ్యవహారాల్లో ఆచితూచి అడుగు వేయాల్సి ఉండగా.. తొందరపాటుతో వాటిని మూసివేసి, ప్రతిపక్ష తెలుగుదేశం పార్టీకి తానే అస్త్రాన్ని అందించినట్టయింది.

పేదల కడుపు నింపే ఈ పథకాన్ని కూడా రాజకీయ కోణంలో చూడటం సబబు కాదనే అభిప్రాయాలు వ్యక్తమయ్యాయి. దివంగత సీఎం వైఎస్ రాజశేఖరరెడ్డి ప్రవేశపెట్టిన ఆరోగ్యశ్రీ పథకాన్ని అటు ఏపీ, ఇటు తెలంగాణలో తర్వాత వచ్చిన ప్రభుత్వాలు కొనసాగించాయి. తెలంగాణలో ఆరోగ్యశ్రీ పేరుతోనే కొనసాగుతుండగా ఏపీలో మాత్రం ఎన్టీఆర్ వైద్య సేవగా పేరు మార్చి కొనసాగించారు. ఇలా ప్రజామోదం పొందిన పథకాలకు స్వల్ప మార్పులు చేసైనా కొనసాగిస్తే ఎలాంటి సమస్యా ఉండదు.

కానీ ఏపీలో అధికారంలోకి వచ్చిన జగన్ సర్కారు మాత్రం ఇందుకు భిన్నమైన ధోరణిలో వెళ్తుండటం విమర్శలకు తావిచ్చింది. రూ.5కి పేదల కడుపు నింపుతున్న అన్న క్యాంటీన్లకు ప్రత్యామ్నాయం చూపకుండానే మూసివేసింది. దీంతో పెద్ద ఎత్తున విమర్శలు వచ్చాయి. ప్రతిపక్ష తెలుగుదేశం పార్టీకి చక్కని అస్త్రం లభించడంతో చెలరేగిపోయింది. క్యాంటీన్ల మూసివేతను నిరసిస్తూ ఆందోళనలు మొదలుపెట్టింది. సహజంగానే వీటికి ప్రజల నుంచి మద్దతు లభించింది. తాము క్యాంటీన్లను మూసివేయడంలేదని, ఆహార సరఫరా సంస్థతో ఒప్పందం ముగిసిపోవడంతోనే వాటిని తాత్కాలికంగా మూసివేశామని, త్వరలోనే ప్రారంభిస్తామని అధికార పార్టీ నేతలు చెప్పినా జనాలు సంతృప్తి చెందలేదు.

దీంతో ఆత్మరక్షణలో పడిన జగన్ సర్కారు దిద్దుబాటు చర్యలు చేపట్టింది. వెంటనే అన్న క్యాంటీన్లను తెరిస్తే ఆ క్రెడిట్ తెలుగుదేశం పార్టీలోకి వెళుతుందనే భావనతో రాజకీయం ప్రదర్శించింది. తొలుత ఆస్పత్రుల్లో వైఎస్సార్ క్యాంటీన్లను తెరుస్తామని ప్రకటించింది. వీటిని అన్న క్యాంటీన్లకు కొనసాగింపులా జనం భావించకుండా తమ పథకంగానే గుర్తించాలని వైఎస్సార్ సీపీ యోచిస్తోంది. ఈ నేపథ్యంలోనే ఇందుకు సంబంధించిన విధివిధానాలను ఖరారు చేయాలని సీఎం జగన్ అధికారులను ఆదేశించారు. ఇలా రాష్ట్రవ్యాప్తంగా ఆస్పత్రుల్లో వీటిని ఏర్పాటు చేస్తారు. అనంతరం రాష్ట్రంలోని ముఖ్యమైన ప్రదేశాలకు విస్తరిస్తారు. మొత్తమ్మీద క్యాంటీన్ వేడిని ఇలా చల్లార్చాలని నిర్ణయించారు.