బూతులు, నీతులు.. సిగ్గొదిలేసిన ఏపీ రాజకీయం.!

ఆంధ్రప్రదేశ్ రాష్ట్రంలో రాజకీయ నాయకులు చాలామంది సిగ్గూ ఎగ్గూ వదిలేశారు. రాయడానికి వీల్లేని బూతులు మాట్లాడుతున్నారు.. అక్కడికి అదేదో హీరోయిజం అనుకుంటున్నారు కొందరు. ‘మీ ఇంట్లో, మీ భార్య ముందు.. మీ పిల్లల ముందు కూడా ఇలాగే మాట్లాడతారా.?’ అంటూ ఓ ప్రముఖ బులుగు నాయకుడ్ని ప్రశ్నిస్తే, ‘నేనెక్కడైనా ఒకేలా మాట్లాడతాను’ అని నిస్సిగ్గుగా చెప్పేశాడాయన. ‘దయచేసి నాతో ఇంటర్వ్యూ సందర్భంగా బూతులు మాట్లాడొద్దు..’ అంటూ ఓ మహిళా జర్నలిస్టు, ఆ ప్రముఖ బులుగు నాయకుడికి సీరియస్ వార్నింగ్ ఇచ్చిందనుకోండి.. అది వేరే సంగతి.

తాజాగా, టీడీపీ నేత ఒకరు ఏపీ ముఖ్యమంత్రిపైనా, పలువురు మంత్రులపైనా, ఆఖరికి హోం మంత్రిపైనా జుగుప్సాకరమైన వ్యాఖ్యలు చేశారు. టీడీపీ నేత చేసిన వ్యాఖ్యలు జుగుప్సాకరమే.. అయితే, అంతకన్నా జుగుప్సాకరంగా వైసీపీ నేతలు చాలామంది మాట్లాడారు.. మంత్రులు కూడా మాట్లాడారు. అత్యంత గౌరవ ప్రదమైన పదవిలో వున్న వ్యక్తి అయితే, ‘లంజత్వం’ అనే పదాన్ని వాడేశారు (క్షమించాలి.. నాయకులు మాట్లాడుతున్న మాటల తీవ్రతను చెప్పేందుకే ఈ ప్రయత్నం..). టీడీపీ అనుకూల మీడియాకి కేవలం వైసీపీ బూతులు మాత్రమే కనిపిస్తాయి.

వైసీపీ అనుకూల మీడియాకి టీడీపీ బూతులు మాత్రమే వినిపిస్తాయి. ఇక్కడో సిగ్గుమాలిన విషయమేంటంటే, ఓ మీడియా సంస్థ.. అదేనండీ మెరుగైన సమాజం కోసమని చెప్పుకునే బురద ఛానల్, గతంలో జనసేన అధినేత మీద ఓ సినీ నటితో బూతు తిట్టు తిట్టించి.. ఇప్పుడేమో, ‘మేం అలాంటి బూతుల్ని ప్రోత్సహించం..’ అంటూ నంగనాచి కబుర్లు చెబుతోంది. ‘బీప్’ ఎందుకు వేస్తున్నారంటూ సదరు ఛానల్‌ని వీక్షకులు ప్రశ్నించేస్తున్నారట. అందుకోసమని, టీడీపీ నేత బూతుల్ని తప్పనిసరి పరిస్థితుల్లో ఒక్కసారికి మాత్రమే వేసి చూపించేశారు.

పనిలో పనిగా వైసీపీకి చెందిన ఓ ముఖ్య నేత పదే పదే టీడీపీ అధినేత మీద వెదజల్లే బూతుల ప్రవాహాన్ని కూడా వినిపించి వుంటే బావుండేదేమో. ఇటు మెయిన్ స్ట్రీమ్ మీడియా సిగ్గొదిలేసి.. అటు రాజకీయ నాయకులూ సిగ్గొదిలేసి.. అసలు రాష్ట్రం ఏమైపోతోంది.? సోసల్ మీడియా సంగతి సరే సరి. వెబ్ మీడియా గురించి చెప్పుకునేదేముంది.? రాష్ట్రం మాత్రం.. ఈ తరహా బూతులతో బూతులాంధ్రప్రదేశ్‌లా మారిపోయేలా వుంది.. ఈ బూతు నాయకుల కారణంగా. ‘రెడ్ లైట్’ రాజకీయం.. అని రాష్ట్ర రాజకీయం గురించి అభివర్ణిస్తే అది అతిశయోక్తి కాదంటూ నెటిజన్లు తీవ్రస్థాయిలో రాజకీయ పార్టీలు, నాయకుల మీద తమ ఆవేదన వెల్లగక్కుతున్నారు.