ఆంధ్రప్రదేశ్‌లో విభజన రాజకీయం.. దేనికి సంకేతం.?

ఉమ్మడి తెలుగు రాష్ట్రం నుంచి, ప్రస్తుత ఆంధ్రప్రదేశ్ గెంటివేయబడింది. అంతకు ముందు, ఉమ్మడి మద్రాసు రాష్ట్రం నుంచి కూడా ఆంధ్ర రాష్ట్రం గెంటివేయబడింది. ఈ రెండు సందర్భాల నుంచీ, ఆంధ్రప్రదేశ్ ఏమీ నేర్చుకోలేకపోయింది.! దేశంలో ఎక్కడా లేని కులజాడ్యం, మత పైత్యం.. ఇవన్నీ ఆంద్రప్రదేశ్ రాష్ట్రంలోనే కనిపిస్తుండడానికి కారణమేంటి.?

ఎవడన్నా రాష్ట్ర రాజధానిని సామాజిక వర్గం కోణంలో చూస్తాడా.? ఏపీలో చూశారు, చూస్తున్నారు. అమరావతిని నిస్సిగ్గుగా కమ్మరావతి పేరుతో పిలుస్తున్నారు కొందరు రాజకీయ నాయకులు. ఆ పేరు చెప్పి, మూడున్నరేళ్ళుగా రాష్ట్రానికి రాజధాని వుందో లేదో తెలియని అయోమయ స్థితిని తీసుకొచ్చారు.

‘మేం మూడు రాజధానులు చేసి తీరతాం. అమరావతి మాత్రం ముమ్మాటికీ కమ్మరావతే..’ అంటూ వైసీపీ, నిస్సిగ్గు రాజకీయాలు చేస్తోంది. రోజులు గడుస్తున్నాయ్.. నెలలు, సంవత్సరాలు కూడా గడిచిపోతున్నాయ్. సమీప భవిష్యత్తులో ఆంధ్రప్రదేశ్ రజాధానికి సంబంధించిన గందరగోళానికి తెరపడే అవకాశాలైతే కనిపించడంలేదు.

మూడు రాజధానుల మాయలో పడ్డ రాయలసీమలో కొందరు మేధావులు, రాజధానిని విశాఖకు తరలించేందుకు ఒప్పుకుంటున్నారు. అసలు న్యాయ రాజధాని అంటే ఏంటి.? దాని వల్ల రాయలసీమకు ప్రయోజనమేంటి.? అన్నదానిపై ఇసుమంత కూడా పరిజ్ఞానం ఈ మేధావుల్లో కనిపించడంలేదు.

పైగా, ఇతర రాజకీయ పార్టీలకు చెందిన నేతలు ఉత్తరాంధ్రకు వెళ్ళినా, రాయలసీమకు వెళ్ళినా చంపేస్తామంటూ అధికార పార్టీ నాయకులే బెదిరింపులకు దిగుతున్న వైనాన్ని చూస్తున్నాం. దేనికి సంకేతం ఇదంతా.? రాష్ట్రాన్ని రెండు ముక్కలు చేసే వికృత రాజకీయ క్రీడలో భాగంగానే ఇదంతా జరుగుతోందా.? అంటే, ఔనని చెప్పక తప్పదు.

ఆంధ్రప్రదేశ్ రాష్ట్రం ఇంకో విభజనను తట్టుకోగలదా.? ఇదే ఇప్పుడు మిలియన్ డాలర్ల ప్రశ్న.