తెలంగాణలో ఆవిర్భావ దినోత్సవ సంబరాలు.. ఏపీలో ఏవీ ఎక్కడ.?

జూన్‌ 2న ఉమ్మడి ఆంధ్రప్రదేశ్‌ నుంచి తెలంగాణ రాష్ట్రం విడిపోయింది. విభజన చట్టం ప్రకారం, అదే రోజు రెండు కొత్త రాష్ట్రాలు ఏర్పడ్డాయి. ఒకటి పాత పేరుతో ఏర్పడ్డ కొత్త రాష్ట్రం ఆంధ్రప్రదేశ్‌ అయితే, ఇంకోటి తెలంగాణ. ఆ లెక్కన, జూన్‌ 2 , రెండు తెలుగు రాష్ట్రాలకు ఆవిర్భావ దినోత్సవం కిందనే భావించాల్సి వుంటుంది.

కానీ, ఆంధ్రప్రదేశ్‌ పరిస్థితులు వేరు. ఉమ్మడి రాష్ట్రం విడిపోయాక, 13 జిల్లాల ఆంధ్రప్రదేశ్‌కి తొలి ముఖ్యమంత్రిగా చంద్రబాబు జూన్‌ 8వ తేదీన పదవీ ప్రమాణ స్వీకారం చేశారు. జూన్‌ 2 నుంచి 8వ తేదీ వరకు పలు కార్యక్రమాలు (నిరసనల్లాంటివి) చంద్రబాబు చేయించేవారు అధికారికంగా. విభజన గాయాల్ని పదే పదే గుర్తు చేయడానికన్నమాట ఈ కార్యక్రమం.

ఇక, ఇప్పుడు వైఎస్‌ జగన్‌ సర్కార్‌, జూన్‌ 2వ తేదీకి ఎలాంటి ప్రత్యేకతనూ ఆపాదించడంలేదు. నిజానికి, మద్రాసు రాష్ట్రం నుంచి 13 జిల్లాల ఆంధ్రప్రదేశ్‌ విడిపోయింది అక్టోబర్‌ 1న. అమరజీవి పొట్టి శ్రీరాములు ఆత్మబలిదానంతో ఆంధ్ర రాష్ట్రం సిద్ధించింది. ఆ తర్వాత, నవంబర్‌ 1న అప్పటి హైద్రాబాద్‌ రాష్ట్రం (ప్రస్తుత తెలంగాణ) కలవడంతో.. మొత్తంగా ఆంధ్రప్రదేశ్‌ ఏర్పడింది. ప్రత్యేక తెలంగాణ ఉద్యమం.. ఈ క్రమంలో తెలుగు ప్రజల మధ్య ప్రాంతీయ విద్వేషాలు.. ఇవన్నీ చూశాం. అవన్నీ గతం.

ఆరేళ్ళయింది ఉమ్మడి ఆంధ్రప్రదేశ్‌ రెండుగా విడిపోయి. ఈ ఆరేళ్ళలో తెలంగాణ రాష్ట్రం అనూహ్యమైన అభివృద్ధిని సాధించింది. కాళేశ్వరం ప్రాజెక్టు ఇందులో అతి ముఖ్యమైన ఘనతగా చెప్పుకోవచ్చు. వరుసగా రెండో సారి టీఆర్‌ఎస్‌ అధినేత కేసీఆర్‌, తెలంగాణ ముఖ్యమంత్రిగా బాధ్యతలు స్వీకరించారు. తెలంగాణలోనూ రాజకీయాలున్నాయి.. రాజకీయ పార్టీల మధ్య రాజకీయ పోరు వుంది. కానీ, అది అభివృద్ధికి ఆటంకంగా మాత్రం మారలేదు. కాళేశ్వరం విషయంలో ఎంత యాగీ జరిగిందో చూశాం.

మరి, ఆంధ్రప్రదేశ్‌లో అభివృద్ధి ఎందుకు ఆగిపోయింది.? అమరావతి ఎందుకు పూర్తవలేదు.? పోలవరం ప్రాజెక్టు ఎందుకు నిర్మాణం పూర్తి చేసుకోలేదు.? ప్రత్యేక హోదా ఎందుకు రాలేదు.? దేశంలో ఎక్కడా లేని దిక్కుమాలిన రాజకీయాలు ఆంధ్రప్రదేశ్‌లోనే వున్నాయి. రాష్ట్ర ప్రయోజనాల కంటే రాజకీయ ప్రయోజనాలే ఎక్కువగా రాష్ట్రాన్ని పరిపాలించిన, పరిపాలిస్తున్న పార్టీలు భావిస్తుండడమే ఆంధ్రప్రదేశ్‌ ప్రస్తుత దుస్థితికి కారణం.