మాస్కుల హామీ మడత పడిందా?

ఆంధ్రప్రదేశ్ లోని ప్రతి ఒక్కరికీ మూడు మాస్కుల చొప్పున 16 కోట్ల మాస్కులు ఉచితం పంపిణీ చేస్తాం. ఈ బాధ్యతను స్వయం సహాయక సంఘాల మహిళలకు అప్పగించాం. తద్వారా ఈ లాక్ డౌన్ కాలంలో వారికి రోజుకు రూ.500 వరకు సంపాదించుకునే అవకాశం కలుగుతుంది. – ఇదీ నెల రోజుల క్రితం ఏపీ సర్కారు ఘనంగా చేసిన ప్రకటన. కానీ వాస్తవ పరిస్థితి మాత్రం అందుకు విరుద్ధంగా ఉంది.

మాస్కుల తయారీ ప్రారంభించి దాదాపు నెలరోజులు కావొస్తున్నా, ఇప్పటికీ చాలా ప్రాంతాల్లో ఎవరికీ అవి అందలేదు. రోజుకు గతనెల 19నాటికి 7.28 మాస్కులు తయారు కాగా, ఆ తర్వాత రోజుకు 30 లక్షల మాస్కులు తయారుచేసేలా కార్యాచరణ రూపొందించినట్టు ప్రభుత్వం ప్రకటించింది. ఆ లెక్కన 16 కోట్ల మాస్కులు పూర్తి కావడానికి 53 రోజుల సమయం అవసరం. ఆ లెక్కన ఈ రోజు వరకు దాదాపు ఆరు కోట్ల మాస్కుల పంపిణీ పూర్తి కావాలి.

కానీ ప్రభుత్వ లెక్కల ప్రకారం ఇప్పటివరకు 3.86 కోట్ల మాస్కులు మాత్రమే కుట్టడం పూర్తయి మండల కేంద్రాలకు డిస్పాచ్ అయ్యాయి. ఈ లెక్కన 16 కోట్ల మాస్కులు కుట్టి పంపిణీ చేయాలంటే కనీసం రెండు నెలలపైనే పడుతుంది. మరోవైపు ఇప్పటివరకు పూర్తయిన మాస్కుల్లో కూడా ప్రజలకు పంపిణీ చేసింది చాలా తక్కువ.

మండల కేంద్రాలకు సరిపడా లెక్కన మాస్కులు రాకపోవడంలో వాటి పంపిణీ ప్రహసనంగా మారింది. ఒకరికి ఇచ్చి మరొకరికి ఇవ్వకుంటే సమస్యలు తప్పవనే ఉద్దేశంలో చాలాచోట్ల వాటి పంపిణీ ప్రారంభించలేదు. కొన్ని చోట్ల కుటుంబానికి ఒకటి లేదా రెండు మాస్కులు మాత్రమే ఇచ్చి చేతులు దులుపుకొన్నారు. సరైన ప్రణాళిక లేకపోవడంతోపాటు అధికారుల అలసత్వం, మంత్రులు, ఎమ్మెల్యేలు పట్టించుకోకపోవడం వల్లే ఈ పరిస్థితి తలెత్తిందనే అభిప్రాయాలు వినిపిస్తున్నాయి.

ప్రస్తుతం రాష్ట్రవ్యాప్తంగా దాదాపు 63వేల మంది మహిళలు ఈ మాస్కుల తయారీలో నిమగ్నమై ఉన్నారు. వీరి సంఖ్యను పెంచడం ద్వారా మాస్కుల తయారీని వేగవంతం చేసే అవకాశాలున్నా.. అధికారులు ఆ దిశగా దృష్టి సారించడంలేదు. దీంతో మాస్కుల పంపిణీ హామీ ఆశించిన విధంగా నెరవేరడంలేదు. కరోనా విజృంభిస్తున్న తరుణంలో మాస్కుల పంపిణీ ఎంత త్వరగా పూర్తిచేస్తే దాని వల్ల అంత ఉపయోగం ఉంటుంది.