‘జ..గన్’ అంటోన్న రోజా.! ‘గన్..జా’ అంటోన్న టీడీపీ.! అసలేంటి కథ.?

ఆడ పిల్లకి అన్యాయం జరిగితే, గన్ కంటే ముందుగా జగన్ అక్కడ వుంటాడంటూ పదే పదే వైసీపీ నేత రోజా చెప్పడం చూశాం. ఎమ్మెల్యేగా వున్నప్పటినుంచీ ఆమె ఇవే మాటలు చెబుతూ వస్తున్నారు. వైసీపీ అధికారంలోకి వచ్చింది.. వైఎస్ జగన్ ముఖ్యమంత్రి అయ్యారు.. ఆంధ్రప్రదేశ్‌లో ఆడపిల్లలపై అఘాయిత్యాలు జరుగుతూనే వున్నాయ్.

‘అబ్బే, దొంగతనం చేయడానికి వచ్చారు.. అనుకోకుండా అత్యాచారం జరిగిపోయింది..’ అంటూ ఓ అత్యాచార ఘటనపై హోంమంత్రి (మహిళ అయి వుండి కూడా) ఎలా మాట్లాడారో చూశాం. అంతే కాదు, ఆడపిల్లలపై అఘాయిత్యాలు జరగడానికి, అమ్మాయిల్ని సరిగ్గా పెంచలేని తల్లులదే బాధ్యత.. అంటూ హోంమంత్రి స్టేట్మెంట్ ఇచ్చేశారు.

గన్నూ లేదు.. జగన్నూ లేదు.. అంటూ విపక్షాలు విమర్శలు చేయడం మామూలే.! తాజాగా ‘జ..గన్’ అన్నమాటకి అసలు అర్థం ఇదీ.. అంటూ టీడీపీ నేత ఒకరు సంచలన వ్యాఖ్యలు చేశారు. ‘రోజక్కా.. నువ్వు చెబుతున్న జ..గన్ నిజం కాదు. దాన్ని తిరగెయ్.. గన్..జా.. అంటే గంజాయ్..’ అంటూ టీడీపీ నేత ఆనం వెంకట రమణారెడ్డి సంచలన వ్యాఖ్యలు చేశారు.

రాజకీయాల్లో ప్రాసలకీ, క్రియేటివిటీకి బోల్డంత ప్రాధాన్యత పెరిగిపోయింది. మంత్రులు, ఎమ్మెల్యేలు.. ఇతర రాజకీయ నాయకులు.. ప్రాస కోసం పడుతున్న పాట్లు అన్నీ ఇన్నీ కావు. ఈ క్రమంలో అందరూ ఒకింత ‘కళాపోషణ’ ప్రదర్శించక తప్పడంలేదు.

వైఎస్ జగన్ మోహన్ రెడ్డి పేరులోని ‘జగన్’ని కాస్తా.. ‘జ..గన్’ అని మంత్రి రోజా అభివర్ణిస్తోంటే, ఆ పేరుని రివర్స్ చేసి.. ‘గన్..జ’ అంటూ ‘గంజాయి’కి లింక్ చేయడం ఏదైతే వుందో, ఆ క్రియేటివిటీకి హేట్సాఫ్ చెప్పాల్సిందే. అన్నట్టు, ఏపీ గంజా విషయంలో దేశంలోనే పాపులర్ స్టేట్ అయిపోయింది.

ఎవరు ఔనన్నా ఎవరు కాదన్నా, గంజాయి స్మగ్లింగ్ కార్యకలాపాలకు సంబంధించి దేశంలోనే ఆంధ్రప్రదేశ్ రాష్ట్రం నెంబర్ వన్.. అంటూ వార్తలొస్తున్న సంగతి తెలిసిందే. దేశంలో ఎక్కడ గంజాయి వ్యవహారం వెలుగు చూసినా, లింకులు ఏపీలోనే దొరుకుతున్నాయ్ మరి.!