సంక్రాంతి పండుగ సందడి మధ్య తెలుగు ప్రేక్షకులను అలరించేందుకు సిద్ధమవుతున్న అసలైన ఫ్యామిలీ ఎంటర్టైనర్ ‘అనగనగా ఒక రాజు’. వరుస విజయాలతో స్టార్ ఎంటర్టైనర్గా నిలిచిన నవీన్ పొలిశెట్టి హీరోగా నటించిన ఈ చిత్రం, పండుగ వాతావరణానికి తగ్గట్టు నవ్వులు, ఎమోషన్, వినోదాన్ని కలబోసిన సినిమాగా రూపొందింది. సితార ఎంటర్టైన్మెంట్స్, ఫార్చ్యూన్ ఫోర్ సినిమాస్ బ్యానర్లపై సూర్యదేవర నాగవంశీ, సాయి సౌజన్య నిర్మించిన ఈ చిత్రాన్ని శ్రీకర స్టూడియోస్ సమర్పిస్తోంది. నూతన దర్శకుడు మారి దర్శకత్వం వహించగా, మీనాక్షి చౌదరి కథానాయికగా నటించారు. మిక్కీ జె. మేయర్ సంగీతం సినిమాకు ప్రత్యేక ఆకర్షణగా నిలుస్తోంది.
2026 జనవరి 14న థియేటర్లలో విడుదల కానున్న ఈ సినిమాపై ఇప్పటికే భారీ అంచనాలు నెలకొన్నాయి. ఇటీవల విడుదలైన ట్రైలర్కు వచ్చిన స్పందన సినిమాపై ఆసక్తిని మరింత పెంచింది. ట్రైలర్లోని హాస్యం, క్యారెక్టర్లు, పండుగ ఫీల్ సోషల్ మీడియాలో వైరల్గా మారాయి. ఈ నేపథ్యంలో చిత్ర బృందం నిర్వహించిన ప్రీ రిలీజ్ ప్రెస్ మీట్లో చిత్ర విశేషాలను పంచుకున్నారు.
నవీన్ పొలిశెట్టి మాట్లాడుతూ, సంక్రాంతి అనేది తెలుగు వారికి ఒక భావోద్వేగ పండుగ అని, ఆ పండుగలో ఉండే ఆనందం, నవ్వులు, కుటుంబంతో గడిపే క్షణాలే ఈ సినిమాలో కనిపిస్తాయని అన్నారు. ఒత్తిడిని మర్చిపోయేలా, హాయిగా నవ్వించే సినిమా ఇదని తెలిపారు. ట్రైలర్కు వచ్చిన అద్భుత స్పందన తమ నమ్మకాన్ని పెంచిందని, బుకింగ్స్కు ముఖ్యంగా ఓవర్సీస్లో విశేష ఆదరణ లభిస్తోందని చెప్పారు.
మీనాక్షి చౌదరి ఈ సినిమా ప్రేక్షకులను నిరాశపరచదని, కుటుంబంతో కలిసి చూసి నవ్వుకునే పూర్తి స్థాయి ఎంటర్టైనర్ అని తెలిపారు. దర్శకుడు మారి మాట్లాడుతూ, సంక్రాంతి కానుకగా విడుదలవుతున్న ఈ సినిమా రెండున్నర గంటల పాటు ప్రేక్షకులను నవ్వులతో నింపుతుందని చెప్పారు. నిర్మాత సూర్యదేవర నాగవంశీ గోదావరి నేపథ్యంలో సాగే అందమైన కథతో పాటు, నవీన్ శైలిలో కామెడీ, చివర్లో బలమైన ఎమోషన్ ఉంటుందని వెల్లడించారు. గ్రామీణ నేపథ్యంలోని పొలిటికల్ సెటైర్ ఎపిసోడ్ కూడా సినిమాకు ప్రత్యేక ఆకర్షణగా నిలుస్తుందని తెలిపారు.
మొత్తంగా ‘అనగనగా ఒక రాజు’ ఈ సంక్రాంతికి థియేటర్లలో నవ్వుల పండుగను తీసుకురావడానికి సిద్ధంగా ఉంది. కుటుంబమంతా కలిసి చూసి ఎంజాయ్ చేసే పక్కా పండుగ సినిమా కావడంతో, ప్రేక్షకుల్లో ఈ చిత్రంపై ఆసక్తి రోజురోజుకు పెరుగుతోంది.